1Joale lengeloi la mpontša nōka ea metsi a bophelo, e benyang joaloka lehakoe, e kollang teroneng ea Molimo le ea Konyana. 2Bohareng ba lebala la motse oo, lipakeng tsa makala a mabeli a nōka, ho metse sefate sa bophelo, se behang litholoana haleshome le metso e 'meli ka selemo, e leng hanngoe ka khoeli e 'ngoe le e 'ngoe, 'me mahlaku a sona a phekola lichaba. 3Thōhako e ke ke ea hlola e e-ba teng. Terone ea Molimo le ea Konyana e tla ba teng motseng oo, 'me bahlanka ba hae ba tla mo sebeletsa. 4Ba tla bona sefahleho sa hae, 'me lebitso la hae le tla be le le liphatleng tsa bona. 5Ha ho sa tla ba le bosiu; ha ba sa tla hloka leseli la lebone kapa leseli la letsatsi, hobane Morena o tla ba bonesetsa, 'me ba tla busa kamehla le mehla.
Ho khutla ha Jesu
6Joale lengeloi la re ho 'na: “Lipolelo tsena lia tšepahala, ke tsa 'nete. Morena, Molimo ea neang baporofeta moea oa hae, o rōmetse lengeloi la hae ho tla bontša bahlanka ba hae tse tšoanelang ho etsahala haufinyane.
7“Bona, ke tla tla kapele. Ho lehlohonolo ea bōlōkang mantsoe a boporofeta a bukeng ena.”
8'Na Johanne, ke utloile tsena, 'me ke li bone. Ha ke se ke li utloile, 'me ke li bone, eaba ke itihela maotong a lengeloi le neng le mpontša tsena, ka re kea le khumamela. 9Lengeloi la re ho 'na: “Se etse joalo, hobane ke molekane oa hao oa bohlanka, le oa bana beno, baporofeta, le oa ba bōlōkang mantsoe a buka ena. Khumamela Molimo.”
10La boela la re ho 'na: “Mantsoe a boporofeta a bukeng ena, u se ke ua a etsa pinyane, hobane nako e se e atametse. 11Tlohela ea etsang tse sa lokang a 'ne a etse tse sa lokang, ea silafetseng a 'ne a etse tse litšila; ea lokileng a 'ne a etse tse lokileng, le ea halalelang a 'ne a halalele.
12“Bona, ke tla tla kapele, ke tlise moputso ho o nea motho ka mong ho ea kamoo a sebelitseng kateng. 13Ke 'na Alfa le Omega, Oa Pele le Oa ho Qetela, Qalo le Qetello.
14“Ho lehlohonolo ba hlatsoang liaparo tsa bona, e le hore ba tle ba be le tokelo ea ho ja sefate sa bophelo, le ea ho kena motseng ka likhoro tsa oona. 15Kantle ho tla sala lintja, le baloi, le lihlola, le babolai, le ba khumamelang melimo ea bohata, le bohle ba ratang leshano, ba etsang tseo e seng tsa 'nete.
16“'Na Jesu, ke le rōmetse lengeloi la ka ho tla paka tsena likerekeng. 'Na ke lehlōmela le setlōhōlō sa Davida; ke naleli ea meso e khanyang.”
17Moea le monyaluoa ba re: “Tloo.”
Ea utloang le eena a ke a re: “Tloo.” Ea nyoriloeng a ke a tle; ea ratang a ke a noe metsi a bophelo, a fanoang feela.
18'Na Johanne, ke tiisetsa e mong le e mong ea utloang mantsoe a boporofeta a bukeng ena hore, haeba e mong a ka eketsa ho hong ho 'ona, Molimo o tla mo ekeletsa likotlo tse ngotsoeng bukeng ena. 19Hape, haeba e mong a ka fokotsa ho hong mantsoeng a boporofeta a bukeng ena, Molimo o tla mo amoha kabelo eo a nang le eona sefateng sa bophelo, le motseng o halalelang, e leng tse hlalositsoeng bukeng ena.
20Ea pakang tsena o re: “E, ke tla tla kapele.”
A ho be joalo! Tloo, Morena Jesu.
21Mohau oa Morena Jesu o ke o be le lōna bohle.
