Kahlōlo e lokileng ea Molimo
1Ka baka leo, uena motho ea ahlōlang, leha u ka ba mang kapa mang, u hloka boitatōlo, hobane ka ho ahlōla ba bang, ua ikahlōla, kaha uena ea ahlōlang u ntse u etsa tsona tseo. 2Re tseba hore Molimo o ahlōla ka nepo ba etsang tse joalo. 3Joale uena motho ea ahlōlang ba bang ba etsang tse joalo, empa u ntse u li etsa, na u hopola hore u tla phonyoha kahlōlong ea Molimo? 4Kapa u nyelisa boholo ba mosa oa hae, le ba boiphapanyo ba hae, le ba mamello ea hae, hobane u sa tsebe hore mosa oa Molimo o u isa pakong?
5Empa ka baka la bothata ba pelo ea hao e sa bakeng, u ikekeletsa khalefo mohl'a letsatsi leo ka lona Molimo a tla bonahatsa khalefo ea hae le kahlōlo ea hae e lokileng. 6Molimo o tla putsa e mong le e mong ho ea ka liketso tsa hae. 7Ba batlang tlōtla le hlompho le ho se shoe, ka ho tiisetsa ho etsa tse lokileng, o tla ba nea bophelo bo sa feleng. 8Empa ba ithatang bobona, ba sa lateleng 'nete, ba mpang ba latela bokhopo, ba tla putsoa ka khalefo le bohale. 9Matšoenyeho le mahlomola a tla tlela motho ka mong ea etsang bobe, Mojuda pele, le eena molichaba. 10Empa tlōtla, le hlompho, le khotso e tla ba tsa e mong le e mong ea etsang tse lokileng, Mojuda pele, le eena molichaba. 11Molimo ha a ee ka tšobotsi.
12Bohle ba sitiloeng ba sa tsebe Molao oa Moshe, ba tla timela ba ntse ba sa tsebe Molao oo, empa bohle ba sitiloeng ba ntse ba tseba Molao oa Moshe, ba tla ahlōloa ka Molao oo. 13Ba lokileng pel'a Molimo hase ba utloang Molao ka litsebe feela, empa ba phethang Molao ke bona ba tla lokafatsoa. 14Ha balichaba ba sa tsebeng Molao oa Moshe, ba phetha litaelo tsa Molao ka bobona, bona bao ba sa tsebeng Molao oa Moshe, molao oa bona ke bona ka sebele. 15Ba bontša hore mesebetsi ea Molao e ngotsoe lipelong tsa bona; matsoalo a bona a ntse a ba pakela, ha mehopolo ea bona e ba qosa kapa e ba emela. 16Ho ea ka molaetsa o molemo, oo ke o bolelang, ho tla ba joalo mohl'a letsatsi leo ka lona Molimo a ahlōlang liphiri tsa batho ka Jesu Kreste.
Bajuda le Molao
17Joale uena ea bitsoang Mojuda, u tšepile Molao, u ithorisa ka Molimo, 18u tseba thato ea hae, u tseba ho khetha tse fetisang ka bohlokoa, kaha u rutiloe Molao. 19U ikholisitse hore u motsamaisi oa lifofu, leseli la ba lefifing, 20morupeli oa lithoto, moruti oa ba e-song ho be le kutloisiso, le hore u fumane tsebo le 'nete eohle Molaong. 21Uena ea rutang ba bang, na ua ithuta? Uena ea bolelang hore ho se ke ha utsuoa, na ha u utsoe? 22Uena u reng ho se ke ha fejoa, na ha u febe? Uena ea nyonyang melimo ea bohata, na ha u utsoe tsa litempele? 23Uena ea ithorisang ka Molao, na ha u hlompholle Molimo ka ho tlōla Molao oo? 24Lebitso la Molimo le nyefoloa har'a lichaba ka baka la lōna, joalokaha ho ngotsoe.
25Efela lebōllo le na le thuso ha u bōlōka Molao, empa ha u itloaelitse ho tlōla Molao, ho bōlla ha hao ho tšoana le boqai. 26Ha leqai le bōlōka litaelo tsa Molao, na leqai leo le ke ke la nkoa le bōlōtse? 27Ha leqai leo le phetha Molao, le tla u ahlōla, uena ea itloaelitseng ho tlōla Molao, leha u ntse u e-na le buka ea Molao, 'me u bile u bōlōtse.
28Hantle-ntle Mojuda oa 'nete hase eo e leng eena ka tšobotsi, esita le lebōllo la 'nete hase letšoao le ka bonoang nameng, 29empa Mojuda oa 'nete ke eo e leng eena ka pelong, le lebōllo la 'nete ke la pelo. Lona ke mosebetsi oa Moea o Halalelang, e seng taba ea buka ea Molao feela. Thoriso ea hae e tsoa ho Molimo, e seng ho batho.
