Ho phelisoa ke Moea o Halalelang
1Joale he, ba leng ho Kreste ha ba sa tla ahlōloa, 2hobane molao oa Moea o Halalelang o re phelisang ho Kreste Jesu o ntōkōlōtse molaong oa sebe le lefu. 3Seo Molao o neng o sitoa ho se etsa, ka baka la ho fokola ha botho, Molimo o se entse. Ka ho rōma Mora oa hae e le sehlabelo sa sebe, a inketse botho bo tšoanang le ba baetsalibe, Molimo o ahlōtse sebe bothong. 4Hona ho entse hore se batloang ke Molao se tle se phethoe ke rōna ba laoloang ke Moea, e seng ke botho.
5Ba laoloang ke botho ba thahasella tsa botho, empa ba laoloang ke Moea ba thahasella tsa Moea, 6'me ho thahasella tsa botho ho tlisa lefu, empa ho thahasella tsa Moea ho tlisa bophelo le khotso. 7Ea thahasellang tsa botho ke sera sa Molimo: Ha a ikokobetse tlas'a Molao oa Molimo, etsoe oa sitoa. 8Ba laoloang ke botho ba sitoa ho khahlisa Molimo.
9Lōna ha le laoloe ke botho, le laoloa ke Moea, haeba Moea oa Molimo o fela o phela ka ho lōna; athe ha motho a se na Moea oa Kreste, hase oa Kreste. 10Empa haeba Kreste a phela ka ho lōna, 'mele o tla shoa ka baka la sebe, athe Moea o Halalelang o tla le phelisa ka baka la ho lokafatsoa ha lōna. 11Haeba Moea oa ea tsositseng Jesu bafung o phela ka ho lōna, ea tsositseng Kreste bafung o tla phelisa le 'mele ea lōna e shoang, ka Moea oa hae o phelang ka ho lōna.
12Ka baka leo, bana beso, ha rea tlangoa ke botho hore re phele ka ho ea ka botho. 13Ha le phela ka ho ea ka botho, le tla shoa, empa haeba le bolaea liketso tsa botho ka Moea, le tla phela. 14Bohle ba tsamaisoang ke Moea oa Molimo ke bana ba Molimo. 15Moea oo le o amohetseng hase moea oa bokhoba o boelang o le tšabisa, empa ke moea o le etsang bana ba Molimo, oo re hōoang ka oona, re re: “Abba!” ke ho re: “Ntate!” 16Ka sebele sa oona, Moea oa Molimo o pakelana le meea ea rōna hore re bana ba Molimo. 17Ha re le bana ba Molimo, re majalefa, majalefa a Molimo; re majalefa hammoho le Kreste, ha re fela re e-na le kabelo mahlōkōng a hae, hore re tle re be le kabelo tlotlisong ea hae.
Tlōtla e tlang
18Ke hopola hore bohlōkō ba nako ea joale ha bo lokele ho lekanngoa le tlōtla eo re tla e senoleloa. 19Lihloliloeng tsohle li lebeletse ka tlhōlōhelo e kholo ho bonahatsoa ha bana ba Molimo, 20hobane lihloliloeng li beiloe pusong ea lefeela, e seng ka ho rata ha tsona, empa e le ka baka la ea li beileng pusong ea lona. Leha ho le joalo, tšepo e teng ea hore. 21le tsona lihloliloeng li tla lōkōlloa bokhobeng ba tšenyeho, li be le kabelo tōkōlōhong e tlōtlehang ea bana ba Molimo.
22Rea tseba hore, ho fihlela joale, lihloliloeng tsohle li feheloa hammoho, 'me li utloa bohlōkō bo kang ba pelehi. 23Hase tsona feela, empa le rōna, ba neiloeng Moea e le mpho ea ho qala ea Molimo, re fehelloa ka lipelong, re ntse re lebeletse hore Molimo a re amohele re le bana ba hae, 'me a lopolle le 'mele ea rōna. 24Re pholositsoe ka ho lebella ka tšepo, empa ho lebella se seng se le teng ha e sa le ho tšepa, hobane motho a ka lebella joang seo a seng a e-na le sona? 25Empa ha re tšepile ho fumana seo re e-song ho be le sona, re se lebella ka mamello.
26Ka mokhoa o joalo Moea o re thusa bofokoling ba rōna, hobane ha re tsebe ho rapela ka mokhoa o tšoanelang, empa Moea ka booona o re rapella ka mefehelo e ke keng ea boleloa. 27Ea bonang se ka lipelong, o tseba sepheo sa Moea, hobane Moea o rapella balumeli ho ea ka thato ea Molimo.
28Joale rea tseba hore ba ratang Molimo, ba bitsitsoeng ka morero oa hae, tsohle li ba tlisetsa molemo. 29Bao a ba tsebileng e sa le pele, o ba khethile e sa le pele hore ba tšoane le Mora oa hae, e le hore Mora e be letsibolo har'a bana ba bangata ba Molimo. 30Bao a ba khethileng e sa le pele, o bile o ba bitsitse; bao a ba bitsitseng, o bile o ba lokafalitse; bao a ba lokafalitseng, o bile o ba tlotlisitse.
Lerato la Molimo
31Joale re tla re'ng ka litaba tsee? Ha Molimo a eme le rōna, ke mang ea ka re loantšang? 32Ha e le moo a sa ka a qenehela Mora oa hae ka sebele, a mpa a mo neetse lefu ka baka la rōna bohle, na a ke ke a re nea lintho tsohle hammoho le eena na? 33Ke mang ea tla qosa bakhethoa ba Molimo, athe Molimo oa ba lokafatsa? 34Ke mang ea ka ba ahlōlang, athe Kreste Jesu o ile a shoa, a ba a tsoha bafung, eena ea leng ka letsohong le letona la Molimo, ea bileng a re rapelang? 35Ke mang he, ea tla re arohanya le lerato la Kreste? Na ke matšoenyeho, kapa litlallo, kapa tlhoriso, kapa tlala, kapa tlhōbōlo, kapa kotsi, kapa sabole? 36Joalokaha ho ngotsoe, ho thoe:
“Ke ka baka la hao,
re bolaoang ka mehla,
re nkoang re le linku tse hlajoang.”
37Empa linthong tsena tsohle re hlōla ka mokhoa o phethehileng ka ea re ratileng. 38Ke kholisehile hore leha e le lefu kapa bophelo, leha e le mangeloi, leha e le meea e meng e busang kapa e matla, leha e le tse teng kapa tse tlang ho ba teng, 39leha e le tse holimo kapa tse tlase, leha e le sebōpuoa sefe kapa sefe, li ke ke tsa re arohanya le lerato la Molimo, leo a re bontšitseng lona ka Kreste Jesu, Morena oa rōna.
