1Molimo o bopile motho
ka mobu oa lefatše,
'me o mo khutlisetsa ho lona hape.
2A nea batho matsatsi a itseng,
a ba beela nako ea bophelo,
a ba fa le matla holim'a tsohle
tse lefatšeng.
3A ba apesa matla a kang a hae,
a ba bopa ka setšoantšo sa hae.
4Libopuoeng tsohle a kenya
tšabo ea motho;
a mo fa borena holim'a libatana
le linonyana.
6A bopela batho maleme,
mahlo le litsebe,
a ba fa kelello ea ho inahana.
7A ba tlatsa ka tsebo le kutloisiso,
a ba fa tsebo ea botle le bobe.
8Pelong ea bona a kenya leseli la hae,
hore ba bone boholo
ba mesebetsi ea hae.
10Ba tla rorisa Lebitso
le halalelang la hae,
ba phatlalatse boholo
ba mesebetsi ea hae.
11A ba nea le tsebo,
a ba fa molao oa bophelo
e le lefa la bona.
12A hlaba selekane se sa feleng le bona,
a ba tsebisa likahlolo tsa hae.
13Ba boha ka mahlo boholo
ba tlotla ea hae,
ba utloa ka litsebe lentsoe
le tlotlehang la hae.
14A re ho bona: “Itlhokomeleng
ho tsohle tse sa lokang.”
A ruta e mong le e mong
tšoanelo ea hae mabapi le oa habo.
Molimo ke moahloli
15Ho eena metsamao ea bona
e totobetse ka nako tsohle,
e sitoa ho pateha mahlong a hae.
17O ile a khethela sechaba ka seng
'musi,
empa ha e le Iseraele
eona ke kabelo ea Morena.
19Mesebetsi eohle ea batho
e joaloka letsatsi ka pele ho eena,
mahlo a hae ha a phetse ho bona
litsela tsa bona.
20Bokhopo ba bona ha bo patehe
mahlong a Morena,
'me libe tsohle tsa bona
li ka pele ho eena.
22Ketso ea mohau ea motho
e ka reng ea borena ho Morena;
'me o tla baballa ketso e molemo
ea motho joaloka thaka ea leihlo.
23Ka le leng Morena o tla ema,
a buseletse ba khopo,
a theolele kotlo holim'a bona.
24Molimo o lumella ba bakang
ho khutlela ho eena,
o khothaletsa ba nyahameng pelo
ho tiisetsa.
Piletso pakong
25Sokolohela ho Morena,
u lahle sebe;
rapela ka pel'a sefahleho sa hae
'me u fokotse molato.
26Khutlela ho Ea holimo-limo,
u furalle bokhopo;
seo a se nyonyang u se hloee ruri.
27Qalong ea bafu ke mang
ea ka rorisang Ea holimo-limo,
joalokaha ba phelang ba mo tlotlisa?
28Teboho ea khaotsa ha motho
a e-shoa, 'me a se a le sieo;
ea ka rorisang Morena ke ea phelang,
ea bophelong bo botle.
29O moholo hakaakang
mohau oa Morena,
le tšoarelo ea hae
ho ba khutlelang ho eena!
30Matla a ho etsa tsohle hase a motho,
kaha bana ba batho ba abetsoe lefu.
31Ke'ng e ka khanyang ho feta letsatsi,
leha le ee le tlohe le bole?
Ka mokhoa o joalo, motho
oa nama le mali o rera bobe.
32Morena o hlahloba makhotla
a leholimo;
athe batho bohle bona ke lerole
le molora.
