1Mosebetsi oa letahoa
ha a ka ke a rua;
bohlasoa linthong tse nyenyane
bo tetebetsa motho
hanyane ka hanyane.
2Veine le basali li faposa
ba bohlale tsela,
'me motho ea mathang le matekatse
o lahleheloa ke boitlhompho.
3Ho bola le liboko e tla ba
kabelo ea hae,
ho hloka boitlhompho
ho tla mo isa timelong.
4Motho ea tšepang ba bang
ka pele ho tlola
o kelello e khutšoanyane,
'me ea etsang sebe oa itšiteloa.
5Ea thabelang bokhopo o tla tsuoa;
6empa ea hloileng bohehle
o tla phema bobe.
7Se phete polelo eo u e utloileng,
'me u ke ke ua senyeheloa ke letho.
8Se bolelle mang kapa mang
tsa motsoalle leha e le tsa sera;
se senole letho,
haese ha e ka ba sebe ho thola.
9Motho a ka tšoha a u utloa
'me a u belaella;
ha a fumane monyetla,
o tla u bontša lehloeo.
10Ha u utloile monyenyetsi,
e-ba lebitla la oona;
ha o ka ke oa u qhashola.
11Bohloko bo mamelloang ke sethoto
se utloileng monyenyetsi
bo tšoana le bohloko
ba mosali ea belehang.
12Joaloka motsu o keneng
nameng ea serope,
monyenyetsi le oona o joalo
ka hare ho sethoto.
13Botsa motsoalle,
mohlaope ha aa ka a etsa letho;
'me haeba a entse letho,
a se hlole a le etsa.
14Botsa moahisani,
mohlaope ha aa ka a re letho;
empa haeba a buile letho,
a se hlole a le pheta.
15Botsa motsoalle,
hobane ho etseletsa ho atile;
ka hona se lumele tsohle
tseo u li utloang.
16Leleme le ka 'na la thella
motho a sa nahane joalo;
ke mang ea e-song ho etse tšito
ka leleme la hae?
17Botsa moahisani pele u mo sokela;
'me u fe Molao oa Ea holimo-limo
sebaka.
Bohlale ba 'nete le bo e seng ba 'nete
20Bohlale bohle ke tšabo ea Morena,
'me bohlaleng bohle ho teng
phethahatso ea Molao.
22Empa tsebo ea bokhopo hase bohlale,
'me ha ho seli boeletsing ba baetsalibe.
23Masene a teng ao e leng manyala,
ea hlokang bohlale ke setlaopa.
24Ho molemo ha motho a se na bohlale
empa a tšaba Morena,
ho e-na le ha motho a tletse bohlale
empa a roba Molao.
25Ho na le masene a fetisisang,
empa a hlokang toka;
'me ho teng batho ba qhekellang
ba bang ka bolotsana ho hlola nyeoe.
26Molotsana ke eo
a kobile hlooho bofifing,
athe pelo ea hae e tletse thetso.
27O pata sefahleho sa hae,
'me o etsa sa mokana a sa utloe,
empa moo ho seng ea 'monang,
o tla u ntša kotsi.
28Haeba ka baka la ho hloka matla
a hloloa ho etsa sebe,
o tla etsa bobe ha monyetla o hlaha.
29Motho o tsejoa ka tšobotsi ea hae,
'me u tla tseba motho ea nang
le kelello ha u qala ho 'mona.
30Kaparo ea motho, le letšeho la hae,
le motsamao oa hae,
li bontša seo a leng sona.
