Kholiso ea bana
1Ea ratang mora oa hae
o tla mo shapa khafetsa,
e le hore a tle a thabisoe ke eena
boqhekung ba hae.
2Ea rupelang mora oa hae
o tla phomella ka eena,
'me o tla ithorisa ka eena
har'a mehahabo.
3Ea rutang mora oa hae
o tla honoheloa ke lira tsa hae,
'me o tla ithoka ka eena
ka pele ho metsoalle.
4Leha ntat'ae a shoele, ho tšoana
leha eka ha a shoa,
hobane o siile mora ea tšoanang
le eena.
5Bophelong ba hae o ne a thabela
ho ba le eena,
lekhatheng la lefu ha a ngongorehe.
6O siile ea tla mo phetetsa
ho lira tsa hae,
le ea tla busetsa molemo
ho metsoalle ea hae.
7Ea senyang mora oa hae
o tla tlama maqeba a hae,
'me maikutlo a hae a tla tšoenyeha
sellong ka seng.
8Pere e sa thapisehang e ba manganga,
'me le mora ea sa rutoang boitšoaro
o ba hlooho e thata.
9Bokotsa ngoana, 'me o tla u tšosa;
bapala le eena, o tla u soabisa.
10U se ke ua tšeha le eena,
esere ua soaba le eena,
'me qetellong ua tsikitlanya meno.
11U se ke ua mo lumella
ho iketsetsa borata bocheng ba hae,
se iphapanyetse liphoso tsa hae.
12Mo sasare likhopong e sa le ngoana,
esere a ba chiki 'me a hana
ho u mamela.
13Rupela mora oa hao
'me u ikhathatse ka eena,
e le hore a tle a se ke a u hlabisa
lihlong ka liketso tse mpe tsa hae.
Bophelo ba 'nete
14Ho molemo ho ba mofutsana
ea phelang hantle,
'me ea matla 'meleng
ho e-na le ho ba morui
oa sekulane se seholo.
15Bophelo bo botle le katleho ea 'mele
li molemo ho feta khauta,
'me le 'mele o shahlileng
o feta maruo a se nang palo.
16Ha ho leruo le letle
ho feta bophelo ba 'mele,
'me ha ho monyaka
o ka holimo ho thabo ea pelo.
17Lefu le molemo ho e-na le bophelo
ba matlokotsi,
le phomolo e sa feleng e molemo
ho e-na le bokuli bo sa khaotseng.
18Lijo tse ntle tse apehetsoeng
ea sitoang ho ja,
li ka linyehelo tsa lijo tse beoang
holim'a lebitla.
19Thuso ea nyehelo ke efe
ho molimo oa bohata,
hobane ha o na ho ja
leha e le ho fofonela?
O joalo ea otliloeng ke Morena:
20o sheba ka mahlo a hae,
'me oa lumaela;
o tšoana le lehaole ha le kopile
moroetsana ka molala 'me le lumaela.
Thabo le masoabi
21Se ineelle masoabi,
'me u se ikutloise bohloko ka boomo.
22Monyaka oa pelo ke bophelo
ba motho,
'me thabo ea motho ke telefatso
ea litšiu tsa hae.
23Khotsofatsa moea oa hao,
'me u tšelise pelo ea hao,
'me u lelekele masoabi hole le uena;
hobane masoabi a timelitse bongata,
'me ha ho letho le molemo ho 'ona.
24Mona le khalefo li khutsufatsa
bophelo,
'me ho ngongoreha ho potlakisa
boqheku.
25Bopelo-tšoeu bo thusa ho thabela
lijo, le ho li fola molemo.
