Bomalimabe ba bophelo ba motho
1Mesebetsi e boima e etselitsoe
motho ka mong,
'me ho na le joko e imetseng
bana ba Adama,
ho tloha ka letsatsi leo ba tsoileng
popelong ea 'm'a bona ka lona,
ho fihlela letsatsi leo ba tla khutlela
ho 'm'a bohle ka lona.
2Metouto ea bona,
le tšabo ea pelo ea bona,
li bakoa ke ho lebella ka matšoenyeho
letsatsi la lefu.
3Ho qala ka motho ea lutseng
teroneng e tlotlehang,
ho isa ho ea kokobelitsoeng
leroleng le moloreng;
4ho qala ka motho ea apereng
tse perese,
ea roetseng mofapahlooho,
ho isa ho ea apereng tse mahoashe;
5ho teng ho bona bohle
khalefo le mona
le pherekano le ho hloka phomolo
le tšabo ea lefu le lisua le liqabang.
Leha motho a phomola
liphateng tsa hae,
le bona boroko ba bosiu
bo luba kelello ea hae.
6O fumana phomolonyana
kapa ha a e fumane,
'me kamorao, litorong tsa hae,
joaloka hoja e le motšeare,
o tšosoa ke lipono
tse ka menahanong ea hae,
joaloka mothobi
ea phonyohileng ntoeng.
7Motsotsong oa ho pholosoa ha hae
oa phaphama,
'me oa hlolloa hore tšabo ea hae
e ne e le lefeela-feelane.
8Ho libopuoa tsohle, ho qala ka motho
ho isa ho sebatana,
empa ho baetsalibe
ka mokhoa o fetang hasupa,
9ke lefu le tšollo ea mali le litsekisano
le sabole,
le likoluoa le tlala, le tlokotsi le seoa.
10Tsena tsohle li ne li etsetsoe
ba khopo,
'me ka baka la bona moroallo oa tla.
11Ntho tsohle tse tsoang mobung
li khutlela mobung,
'me tse tsoang metsing
li boela leoatleng.
Tholoana tsa bokhopo
12Litjotjo tsohle le ho hloka toka
li tla felisoa,
empa botšepehi bo tla ba teng
ka ho sa eeng kae.
13Leruo la motho ea sa lokang
le tla psha joaloka noka,
'me le fele joaloka ho thoathoaretsa
ho matla ha letolo puleng.
14Motho ea fanang o tla thaba;
athe batloli ba molao ba tla timela tu!
15Litloholo tsa ba sa tšabeng Molimo
li ke ke tsa sitsoa ka litloholoana,
ke methapo e otileng holim'a selomo.
16Lehlaka le melang metsing
afe kapa afe, le lebopong la noka,
le tla tsomuloa pele ho joang
bofe kapa bofe.
17Empa phano e ka serapa
sa mahlohonolo,
'me mpho ea mohau e hlola
ka ho sa eeng kae.
Thabo bophelong ba motho
18Bophelo ba motho ea lokolohileng
le ba ea sebetsang bo monate;
empa ea tholang letlotlo
o lehlohonolo ho feta bana ba babeli.
19Ho ba le bana le ho hloma motse
li tumisa motho;
empa ho ba le mosali
ea se nang letheba
ho molemo ho feta tsena tse peli.
20Veine le 'mino li thabisa pelo;
empa lerato la bohlale
le feta tseo tse peli.
21Lekolulo le harepa
li etsa molumo o monate;
empa lentsoe le monate
le feta tseo tse peli.
22Leihlo le thabela bokhabane le botle;
empa le thabela botala
bo fupuhang litlhakung
ho feta tseo tse peli.
23Motsoalle kapa molekane
ba teana ha ba rata;
empa ba fetoa ke kopano
ea mosali le monna oa hae.
24Bana babo motho le bathusi
ba mo phallela mohla tsietsi;
empa mpho ea mohau
e mo ntša tsietsing
ho feta lihlopha tseo tse peli.
25Khauta le silefera li tiisa
boemo ba motho;
empa keletso e ntle e ananeloa
e le molemo ho feta tseo tse peli.
26Maruo le matla li matlafatsa pelo;
empa tšabo ea Morena
e molemo ho feta tseo tse peli.
Ha ho tahlehelo tšabong ea Morena,
'me ea nang le eona ha a hloke
ho batla thuso.
27Tšabo ea Morena e ka serapa
sa mahlohonolo,
'me e sireletsa motho hantle
ho feta tlotla efe kapa efe.
Ho kopa
28Ngoan'a ka, u se ke ua phela
bophelo ba mokopa-kopa;
ho molemo ho shoa,
ho e-na le ho kopa.
29Haeba motho a kokela lijo
tsa e mong,
bophelo ba hae bo ke ke ba talingoa
e le bophelo.
O itlontlolla ka lijo tsa motho e mong;
athe motho ea bohlale
'me ea holisitsoeng hantle
o itebetse pel'a tse joalo.
30Molomong oa ea se nang lihlong
ho kopa ho monate,
empa ka mpeng ea hae
ke mollo o tukang.
