SIRAKA 47

₂Joalokaha mafura a beelloa

kathoko sehlabelong,

ka mokhoa o joalo Davida a khethoa

ka har'a bara ba Iseraele.

₃A bapala le litau

joalokaha eka ke lipotsanyane,

le libere joalokaha eka ke likonyana.

₄Bocheng ba hae a fenetha seqhobane

'me a hlakola sekhobo

sa sechaba sa hae,

ha a betsa lejoe ka letjeketjane,

'me a lahla fatše Goliate oa moikakasi.

₅A ipiletsa ho Morena,

Ea holimo-limo,

'me eena a mo fa matla

ka letsohong la hae le letona,

ho bolaea mohlabani ea matla,

'me a tsosa sechaba sa habo molota.

₆Ka hoo a rokoa e le ea hlotseng

likete tse leshome

'me a rorisoa ka baka la mahlohonolo

a tsoang ho Morena,

ha a roesoa mofapahlooho

o tlotlisehang.

₇Eaba o timetsa lira

tse mo pota-potileng,

'me a ripitla Bafilesita

ba mo loantšang,

hoo matla a bona a ileng a fela

ho fihlela le kajeno a 'makajeno.

₈Ho tsohle tseo a 'nileng a li etsa

a lebisa liteboho le tlotliso

ho Ea halalelang, Ea holimo-limo.

A bina lifela ka pelo eohle ea hae,

ho bontša lerato ho 'Mopi oa hae.

₉A laela libini ho ema

ka pele ho aletare,

le ho natefisa 'mino ka liharepa.

₁₀A etsa hore mekete e be mahlonoko,

a hlophisa linako tsa eona

ka mokhoa o phethehileng,

e le hore batho ba rorise

Lebitso le halalelang la Morena,

'me Sehalalelo se lume e sa le hoseng.

₁₁Morena a mo leballa libe tsa hae,

'me a phahamisa matla a hae

ka ho sa eeng kae;

a mo etsa khosi ka ho hlaba

selekane le eena,

a mo hloesetsa teroneng

e tlotlisehang Iseraele.

₁₂Ka mora' hae ha hlaha

mora ea bohlale, Solomone,

ea neng a phela a khatholohile

ka baka la ntat'ae.

₁₃Solomone o ne a rena

mehleng ea khotso,

'me Molimo a mo sireletsa

ka mahlakoreng 'ohle,

hore a tle a hahele Lebitso la hae

Ntlo ea thapelo

le ho mo lokisetsa Sehalalelo

se tla ema ka ho sa eeng kae.

₁₄U bile bohlale hakaakang, Solomone,

bocheng ba hao;

ua ba le kutloisiso e khaphatsehang

joaloka noka!

₁₅Moea oa hao oa aparela lefatše,

'me ua le tlatsa ka lipapiso le malepa.

₁₆Botumo ba hao ba fihla

lihleke-hlekeng tse hole,

'me ua ratoa ka baka la khotso ea hao.

₁₇Ka baka la lipina le maele

le lipapiso tsa hao,

le ka baka la litlhaloso tsa hao

lefatše la hlolloa ke uena.

₁₈Ka lebitso la Morena Molimo,

ea bitsoang Molimo oa Iseraele,

ua bokella khauta

joalokaha eka ke tšepe,

le silefera joalokaha eka ke loto.

₁₉Empa ua ineella basali,

ua busoa ke litakatso tsa 'mele oa hao.

₂₀Ua silafatsa lebitso la hao,

'me ua hobosa leloko la hao.

Ka hona ua biletsa bana ba hao

khalefo,

'me ba soabisoa ke botlaopa ba hao.

₂₁Joale 'muso oa aroloa koto tse peli,

'me Efraime ha theoa 'muso

oa bafetoheli.

₂₂Empa Morena ha a koenehetse

batho mohau oa hae,

leha e le ho shanofatsa le le leng

la mantsoe a hae.

Ha a ka ke a felisa litloholo

tsa mokhethuoa oa hae,

leha e le ho ripitla leloko

la morati oa hae.

Ka baka leo a siela Jakobo masalla,

le lehlomela ho Davida.

₂₃Solomone a phomotsoa le

bo-ntat'ae,

'me a siea e mong oa leloko la hae

ho mo hlahlama,

motho ea tletseng botlaopa,

'me ea hlokang kutloisiso

ho feta bohle,

e leng Rehoboame, eo ka qeto ea hae

a entseng hore sechaba se mo fetohele.

Jeroboame, mora oa Nebate, a etsa

hore Israele e oele sebeng,

'me a nea Efraime tsela ea bokhopo.

₂₄Libe tsa bona tsa ngatafala

ka mokhoa o tšabehang,

hoo ba bileng ba ntšoa naheng

ea habo bona.

₂₅Ba ile ba leka mefuta eohle

ea bokhopo,

ho fihlela kotlo e ba oela holimo.