SIRAKA 4

₁Ngoan'a ka, se time mofutsana

se mo phelisang,

'me u se liehe ho fa mohloki

ea lebeletseng thuso.

₂Se khalise motho ea lapileng,

leha e le ho hlabehisa

motho ea bothateng.

₃U se ke ua eketsa likhathatso

tsa pelo e halefileng,

leha e le ho liehela mohloki

ka mpho ea hao.

₄U se ke ua nyahlatsa

mokopi ea mathateng,

leha e le ho furalla mofutsana.

₅U se ke ua tlolisa mohloki

mahlo holimo,

leha e le ho mo nea monyetla

oa ho u rohaka.

₆Haeba ka pelo e bohloko

a ka u biletsa thohako,

'Mopi oa hae o tla mamela

thapelo ea hae.

₇Etsa hore u ratehe

ka har'a phutheho;

oma ka hlooho

ka pele ho motho oa boemo.

₈Sekehela mofutsana tsebe,

'me u mo arabe ka khotso

le ka bonolo.

₉Ntša ea hateletsoeng

matsohong a mohatelli,

'me u be sebete kahlolong tsa hao.

₁₀U be joaloka ntata ho likhutsana;

esita le ho 'm'a tsona,

u tšoane le mohats'a hae.

Ke moo Ea holimo-limo a tla u nka

u le mora oa hae;

'me o tla u rata ho feta kamoo 'm'ao

a u ratang kateng.

₁₁Bohlale bo holisa bana ba bona,

'me bo hlokomela ba bo batlang.

₁₂Ho bo rata ke ho rata bophelo;

ba tsohellang ho bo batla

ba tla tlala thabo.

₁₃Ea bo khomarelang

o tla fumana tlotla,

'me Morena o tla mo hlohonolofatsa

hohle moo a kenang teng.

₁₄Ba bo sebeletsang ba sebeletsa

Ea halalelang;

Morena o rata ba bo ratang.

₁₅Ea bo mamelang o tla ahlola ka toka,

'me ea bo elang hloko

o tla phela ka khotso.

₁₆Haeba a bo tšepa,

bo tla ba lefa la hae,

'me litloholo tsa hae li tla bo ja lefa.

₁₇Sethathong bo tla tsamaea le eena

litseleng tse tsoelipanang,

bo tlise tšabo le bokoala holim'a hae.

Bo tla mo tšoenya ka thupelo ea bona

ho fihlela bo ka mo tšepa,

bo mo nonye ka melao ea bona.

₁₈Joale bo tla mo busetsa

tseleng e otlolohileng,

bo mo thabise,

'me bo mo senolele makunutu a bona.

₁₉Empa ha a kheloha,

bo tla mo furalla,

'me bo mo neele timelo.

₂₀Lebella nako e nepahetseng,

empa u pheme bokhopo,

'me u se ikhelle fatše;

₂₁hobane ho teng mahlabisa-lihlong

a isang sebeng,

'me ho teng ho hlajoa ke lihlong

ho rorisehang 'me ho ratehang.

₂₂U se ke ua itsoa ho reka lifahleho

tsa ba bang;

lihlong tsa hao li se ke tsa u fetola

lesupi.

₂₃U se ke ua khutsa

ha u lokela ho bua,

'me u se pate bohlale ba hao;

₂₄hobane bohlale ba motho

bo tsejoa ka puo

le thuteho ka mantsoe ao a a buang.

₂₅Le ka mohla u se hanyetse 'nete,

u mpe u be lihlong

ka ho se tsebe ha hao.

₂₆Se be lihlong ho ipolela libe tsa hao,

'me u se leke ho thiba noka

e phallang ka matla.

₂₇U se ke ua ipea

tlas'a leoatla la motho,

leha e le ho bontša leeme

hobane motho e le oa boemo.

₂₈Ikitlaelletse 'nete ho isa lefung,

'me Morena Molimo o tla u loanela.

₂₉Se be matata puong,

empa u le lenama le bohlasoa

liketsong tsa hao.

₃₀U se ke ua ka tau lapeng la hao,

empa u le boi ho bahlanka ba hao.

₃₁Letsoho la hao

le se ke la nanabetsoa ho amohela,

empa e be lea honyetsoa

mohla le lokelang ho busetsa.