SIRAKA 8

₁Se phee khang le motho oa boemo,

esere ua oela ka har'a liatla tsa hae.

₂U se ke ua qabana le motho oa morui,

esere a u imela;

hobane khauta e timelitse ba bangata,

'me e sentse kelello ea likhosi.

₃U se ke ua phea khang le lehehle;

ka hoo u tla be u roteletsa patsi

mollong oa hae.

₄U se ke ua soasoa le motho

ea holisitsoeng hampe,

esere baholo-holo ba hao

ba hlompholloa.

₅U se ke ua komela motho

ea furallang sebe;

hopola hore bohle re lokeloa

ke kahlolo.

₆U se ke ua khesa motho ha a tsofetse,

hobane ba bang ba rona

le bona ba ntse ba tsofala.

₇U se ke ua thabela lefu

la mang kapa mang;

hopola hore bohle re tla shoa.

₈U se ke ua eisa lipolelo tsa bahlalefi,

empa u ipapise le maele a bona;

hobane ka 'ona u tla ruteha,

'me u ithute ho sebeletsa ba baholo.

₉U se ke ua feta mohoalotso

thuto ea maqheku,

hobane le bona ba ne ba ithute

ho bo-ntat'a bona.

Ho 'ona u tla rua kutloisiso,

'me u ithute ho araba

ho ea kamoo ho hlokahalang kateng.

₁₀U se ke ua hotetsa

mashala a moetsalibe,

esere ua cha khabong ea mollo oa hae.

₁₁Hana ho khopisoa ke setlokotsebe,

esere a u tšoasa ka leraba

la lipolelo tsa hao.

₁₂U se ke ua alima motho ea matla

ho u feta;

empa haeba u ka mo alima,

tela ho fumana molato oo hape.

₁₃U se ke ua bea paneng seng sa hao

ka mokhoa o fetang matla a hao;

empa ha u ka etsa joalo,

itokisetse ho lefa.

₁₄U se ke ua qosa moahloli,

hobane o tla ahloleloa

ka baka la boemo ba hae.

₁₅Se tsamaee le motho oa setlokotsebe,

esere sa u qaka;

hobane se tla iketsetsa borata,

'me ka baka la botlaopa ba sona

se tla u kenya makaqabetsing.

₁₆U se ke ua qabana

le motho ea bohale,

'me u se haole nahathothe le eena;

hobane ho eena ho tšolla mali

hase letho,

'me moo ho seng ea ka u thusetsang,

o tla u otla, a u lahle fatše.

₁₇U se ke ua eletsana le setlaopa,

hobane ha se ka ke sa boloka lekunutu.

₁₈Ka pele ho motho

eo u sa mo tsebeng,

se etse letho le lokelang

ho bolokoa e le lekunutu,

hobane ha u tsebe seo

a tlang ho se hlahatsa.

₁₉U se ke ua senolela mang kapa mang

mehopolo ea hao,

kapa ho amohela tjotjo ho motho

ofe kapa ofe.