SEFILA SA LIFELA 3

₁Bosiu ha ke robetse

phateng tsa ka,

ke ile ka batla

ea ratoang ke pelo ea ka;

ka 'matla, ka se ke ka mo fumana.

₂Joale ka tsoha

ka ea le motse oohle,

terateng tsa oona

le mabaleng a oona,

ke batla ea ratoang ke pelo ea ka;

ka 'matla, ka se ke ka mo fumana.

₃Ka teana le balebeli

ba ntse ba potoloha le motse,

ka re ho bona:

“Na le kile la bona

moratuoa oa ka?”

₄Eare ke sa tsoa ba feta

moratuoa oa ka ka mo fumana;

ka mo mamarela,

ka se ke ka mo tlohela

ho fihlela ke kena le eena

ka lapeng heso,

ke mo isa ka kamoreng ea 'mè,

montsoali oa ka.

₅Lōna barali ba Jerusalema,

kea le laea,

ke le laea ka litšèpè

le ka likhama tsa naha:

Le se tsose moratuoa oa ka

kapa la mo sisinya

ho fihlela eena a ka rata ho tsoha!

₆Eloa ea hlahang lehoatateng

ke mang,

ea kang mosi o lopaletseng,

ea nonelitsoeng

ka 'mira le mokubetso,

tse tsoakiloeng

ka linōko tsohle tsa khoebo?

₇Ke Solomone, o nkile malaō a hae,

o pota-potiloe ke bahale

ba mashome a tšeletseng,

mokhetho oa likoankoetla

tsa naha ea Iseraele.

₈Kaofela ha bona

ba hlometse ka lisabole,

kaofela ha bona

ntoa ba e tloaetse,

lisabole li leketla qhōlōng tsa bona,

ba laletse

ha mokhosi oa bosiu o hlajoa.

₉Khosi Solomone

o iketselitse malaō,

a a etsa ka lehong la Lebanone;

₁₀litšiea tsa 'ona

a li etsa ka silefera,

mokokotlo oa 'ona

ea e-ba oa khauta,

kallane ea e-ba ea lesela,

lesela le perese,

bokahare ba 'ona bo lōhiloe

ke barali, ba Jerusalema,

bo lōhiloe ke bona ka lerato.

₁₁Tsoang ka matlung,

lōna barali ba Sione,

tsoang le bone khosi Solomone

o roetse moqhaka,

moqhaka a o roesitsoe ke 'm'ae

mohl'a lenyalo,

mohl'a thabo e khaphatsehang

pelong ea Solomone.