SEFILA SA LIFELA 7

₁Maoto a hao

a tšoaneloa ke meqathatso,

a tšoaneloa ke eona hakaakang,

uena khosatsana, morali oa khosi!

Thōpōla tsa hao li ka mabenyane,

mabenyane a entsoeng

ke setsebi sa mekhabiso.

₂Mokhubu oa hao o ka mopotjoana,

o sa ke be o hloke veine

e tsoakiloeng ka linōko.

Theka la hao

le tšoana le setha sa mabele,

se pota-potiloeng

ke mehalalitoe kahohle.

₃Matsoèlè a hao

a ka potsanyane tse peli,

potsanyane tsa mafahlanyana,

potsanyane tsa tšèpè.

₄Molala oa hao

o ka tora ea manaka a tlou,

mahlo a hao

a ka matšana a Heshebone,

a pel'a monyako oa motse,

motse oo o moholo.

Nko ea hao

e ka tora ea Lebanone,

tora e lebileng

ka nqeng ea Damaseka.

₅Hlooho ea hao

e phahame sa Thaba ea Karamele,

moriri oa hao

o benya sa lesela le perese,

lenyetse la hao

le hapile pelo ea khosi.

₆U motle hakaakang, uena moratuoa!

Rato la hao le khahlisa ka tsohle!

₇Seemo sa hao

se ka fate sa palema,

matsoèlè a hao

a ka masihla a morara.

₈Eaba ke re:

“Ke tla hloella

holim'a fate sena sa palema,

ebe ke khōla tholoana tsa sona.”

Matsoèlè a hao

a tla ka masihla a morara,

moea oa hao

o ke monkoane oa liapole,

₉molomo oa hao

o ke veine e monate.

A veine e lèlèmèlle ho moratuoa,

e theohele molomong

le menong a hae.

₁₀'Na ke oa moratuoa oa ka,

takatso tsa hae li tobile 'na feela.

₁₁Tloo, moratuoa, re ikele har'a naha,

re e'o ipaqamela har'a lipalesa.

₁₂A re tsohelle rapeng tsa morara,

re e'o bona

hore na morara o s'o fupile,

na thunthung tsa oona

li se li hlahile,

na likharenate

li se li thuntse na.

Lerato ke tla u abela lona re le moo.

₁₃Apole tsa moratiso

li nkha hamonate,

tholoana tsa mefuta eohle

li pel'a monyako oa rōna;

tholoana tse ncha

le tholoana tsa khale

ke u boloketse tsona,

uena moratuoa.