Thapelo ea Tobite
1Ka sisimoha ke pelo-bohloko, 'me ka lla; ka qala ho rapela ke ntse ke feheloa, ka re:
2“U lokile, Morena,
le mesebetsi eohle ea hao e lokile.
Litsela tsohle tsa hao
ke tsa mohau le 'nete;
ke uena ea ahlolang lefatše.
3Joale, Morena, ak'u nkhopole
'me u ntalime.
U se ke ua nkotla
ka baka la libe le liphoso
tseo rona le bo-ntate re li entseng.
Re u sitetsoe ka ho etsa sebe,
4ra tlola melao ea hao;
'me uena u re tloheletse ho oela
khapong, kholehong le lefung;
re se re fetohile pale, sesomo
le sekhobo lichabeng tsohle,
tseo u re qhalantseng har'a tsona.
5Likahlolo tsohle tsa hao li nepahetse,
ha u nkotla ka ho ea ka libe tsa ka
le tsa bo-ntate;
hobane ha rea ka ra phetha
litaelo tsa hao,
leha e le ho tsamaea pel'a hao
ka botšepehi.
6Joale, etsa ka 'na
kamoo u ratang kateng;
ak'u laele hore ke amohuoe bophelo,
hore ke tlohe lefatšeng,
ke boele mobung.
Ho molemo ho 'na ho shoa
ho e-na le ho phela,
hobane ke utloile ke hlapaoloa
ka ntle ho lebaka
'me ke masoabing a maholo.
Morena, laela hore
ke lokolloe mathateng ana,
ntumelle ke ikele qalong ea bosafeleng;
u se mpatele sefahleho sa hao, Morena.
Ho molemo ho shoa
ho e-na le ho phela
har'a mathata a makana
le ho utloa mahlapa a tjena.”
Tsietsi ea Sara
7Ka letsatsi lona leo ha etsahala hore Sara, morali oa Raguele ea neng a ahile Ekebatana, naheng ea Media, le eena a utloe mahlapa a le leng la makhabunyane a ntat'ae. 8O ne a ile a nyaloa hasupa, empa banna ba hae kaofela ba ile ba bolaoa ke Asemodea, modemona o khopo, ba e-s'o qale ho phela le eena lenyalong. Joale lekhabunyane le ne le re: “Ke uena ea bolaeang banna ba hao. U s'u ile ua nyaloa ke banna ba supileng, empa ha ua ka ua ipitsa le ka a le mong oa bona. 9Ke'ng ha u re hlokofatsa ka baka la banna ba hao ba shoeleng? E-ea ho bona, re tle re se ke ra bona le ka mohla ngoana ea tsoetsoeng ke uena, oa moshanyana kapa oa ngoanana.”
10Tsatsing leo pelo ea Sara ea e-ba bohloko; a lla, a nyolohela kamoreng e kaholimo tlung eabo, ka morero oa ho ikhama. Empa a boela a imamela, a re: “E seng batho ba tla hlapaola ntate, ba re: U n'u e-na le morali a le mong ea ratuoang, empa o ikhamme ka baka la matšoenyeho a hae! Hona ho ka hlahisetsa ntate, ea seng a holile, masoabi a ka mo isang Qalong ea bafu. Ho e-na le ho ikhama, ho molemo ho rapela Morena hore ke shoe, ke tle ke se ke ka hlola ke utloa mahlapa a tjena bophelong ba ka.”
Thapelo ea Sara
11Ka nako le motsotso a otlollela matsoho a hae nqeng ea festere, a rapela, a re:
“U bokoe, uena Molimo ea mohau.
Ho bokoe Lebitso la hao ka mehla,
'me mesebetsi eohle ea hao
e u boke ho se khaotso.
12Joale ke phahamisa hlooho,
ke lelaletsa mahlo a ka ho uena.
13Ak'u laele hore ke tlosoe lefatšeng,
e le hore ke se hlole ke utloa
mahlapa a tjena.
14Ua tseba, uena Morena,
hore ke hloekile,
ha ke e-s'o etse bobe
le monna ofe kapa ofe.
15Ha ke e-s'o silafatse lebitso la ka,
leha e le la ntate,
naheng ena ea kholeho.
Ke ngoana a inotši oa ntate,
ha a na ngoana e mong
eo e ka bang mojalefa;
ha ho motho eo ba amanang le eena,
ha ho mohahabo eo nka phelelang
ho nyaloa ke eena.
Ke se ke hlokahaletsoe
ke banna ba supileng:
ke sa phelela'ng hape?
Ha eba e se thato ea hao
ho nkamoha bophelo,
ak'u ntalime ka mohau,
e le hore ke se hlole ke utloa
mahlapa a tjena.”
Molimo o mamela thapelo ea Tobite le ea Sara
16Motsotsong oona oo, thapelo ea bona bobeli ea amoheleha pel'a botlotlehi ba Molimo. 17Ke ha Rafaele a rongoa ho ba folisa bobeli ba bona. O ne a lokela ho tlosa matheba a masoeu a ka mahlong a Tobite, e le hore a tle a tsebe ho bona leseli la Molimo ka mahlo. Hape, o ne a lokela ho nyalisa Tobiase, mor'a Tobite, le Sara, morali oa Raguele, le ho namolela Sara likhathatsong tsa Asemodea, modemona o khopo. Hobane e ne e le tokelo hore a nyaloe ke Tobiase pele a nkoa ke mang kapa mang. Motsotsong oo ka oona Tobite a neng a khutla lebaleng, a o ka tlung ea hae, le eena Sara, morali oa Raguele, o ne a theoha kamoreng e kaholimo.
