Bothoto ba ho khumamela lihloliloeng
1Ke litlaopa tsa tlhaho batho
bohle ba sa tsebeng Molimo,
bao, ka tse molemo tse bonoang,
ba sitiloeng ho tseba eena ea leng teng,
leha e le ho bona Moetsi oa mosebetsi
ha ba talima mesebetsi ea hae.
2Empa mollo, kapa moea,
kapa moea o fokang ka lebelo,
kapa linaleli tse hlahang,
kapa metsi a tuluanang,
kapa mabone a maholimo,
ke tseo ba neng ba li nka e le melimo.
3Haeba ho khahloa ke botle ba tsona
ho entse hore batho ba li nke
e le melimo,
a ba ke ba tsebe hore na Morena
oa lintho tseo tsohle
o li feta hakaakang,
hobane ke eena moqapi oa botle bohle
ea li bopileng.
4Haeba batho ba hloletsoe ke matla
le tšebetso ea tsona,
a ba ke ba lemohe ka tsona
hore na eena ea li entseng
o matla ho feta hakaakang;
5hobane boholo le botle ba libopuoa
bo re thusa ho lekanya
seo 'Mopi oa tsona a leng sona.
6Leha ho le joalo, batho bao
ba ke ke ba nyatsuoa haholo;
hobane mohlomong ba lahlehile
ba ntse ba batla Molimo
'me ba lakatsa ruri ho mo fumana.
7Erekaha ba phela
har'a mesebetsi ea hae,
eo ba lekang ho e hlahloba,
ba hohetsoe ke seo ba se bonang,
hobane tseo ba li shebileng li ntlehali.
8Empa le teng ba ke ke ba tšoareloa
ka ho tlala,
9hobane haeba ba ne ba e-na
le tsebo e kaalo,
hoo ba neng ba ka phenyekolla
lintho tsohle,
ho ea ka'ng ha ba liehile ho fumana
Morena oa tsena kaofela?
Bothoto ba ho rapela melimo ea litšoantšo
10Empa ho soto hakaakang,
batho bao, ka ho bea tšepo ea bona
linthong tse se nang bophelo,
ba bitsitseng mesebetsi
ea matsoho a batho melimo,
e leng khauta le silefera
tse sebelitsoeng ka bohlale
ho tšoantša libopuoa tse phelang,
kapa e le lejoe le se nang thuso
le betliloeng ke sebetli sa khale-khale.
11Moremi oa lifate mohlomong
a ka lihela fatše ka sakha
sefate seo a se hlokang,
a se ebola lekhapetla ka hloko,
a sebetsa ka mahlale
ho etsa ka sona sejana se nang le thuso
bophelong ba tsatsi le leng le le leng.
12Joale o besa kotoana tse lahliloeng
tsa mosebetsi oa hae
ho pheha lijo tsa hae hore a je,
a khore.
13Empa har'a tse ling ho setse
sekotoana se se nang thuso,
hobane ke thupa e tsunkaneng,
e tletseng mafito.
Oa e nka, o e betla
nakong ea phomolo,
o e fa sebopeho ka bohlale
ba motho ea iketlang,
'me o e bopa tjee ka setšoantšo
sa motho,
14kapa a etse setšoantšo sa sebopuoa
se se nang thuso;
a se tlotse ka ferefe e sootho,
a se khabise ka e khubelu,
'me a pate sepha ka seng sa sona
ka eona.
15Ebe joale o etsa lehahana
le se tšoanelang,
'me a bee tšoantšo sena leboteng,
a se tiise ka lipekere.
16Ka tsela ena o se hlokomella
hore se se tšohe se e-oa,
kaha oa tseba hore se ke ke sa ithusa,
hobane ke setšoantšo feela,
'me se hloka thuso.
17Leha ho le joalo, ha a rapella
maruo a hae, mosali le bana,
ha a lihlong ho bua le ntho ena
e se nang bophelo.
18Bakeng sa bophelo bo botle
o ipiletsa ho ntho e se nang matla;
bakeng sa ho phela
o rapela ntho e shoeleng;
bakeng sa tlatsetso o kopa thuso
ho ntho e hlokang tsebo;
bakeng sa maeto o rapela ntho
e ke keng ea nka le mohato feela;
19bakeng sa tse hlokahalang ho phela,
le mosebetsi le katleho
ea tseo a li etsang ka matsoho,
o kopa thuso ea 'nete
ho ntho eo matsoho a eona
a se nang matla ho hang.
