SOLOMONE 14

₁Hape motho ea itokisetsang

ho sesisa sekepe,

le ho eta holim'a maqhubu a befileng,

o rapela sekotoana sa sefate se fokolang

ho feta sekepe se mo jereng.

₂Sekepe se qapetsoe

ho fumana phaello,

'me setsebi sa likepe

se se entse ka bohlale.

₃Empa ke paballo ea hao, Ntate,

e se tsamaisang,

'me u se buletse tsela

e tsamaeang leoatleng,

e se nang kotsi har'a maqhubu.

₄U bontša ka hoo hore

u ka pholosa kotsing tsohle,

'me le motho ea se nang tsebo

a ka tšela leoatle.

₅Ha u batle hore mesebetsi

ea Bohlale ba hao

e lule e sa sebelisoe;

ka baka lena batho ba bea

bophelo ba bona

sekotoaneng se senyenyane sa sefate,

'me, ka ho monyoha har'a maqhubu

a befileng,

ba tšelela mobung, ba pholoha

ka seketsoana.

₆Ka mokhoa o joalo, tšimolohong,

ha liqhobane tsa baikhantši

li ne li timela,

tšepo ea lefatše ea tšabela

seketsoaneng,

se tsamaisoang ke letsoho la hao,

'me peo ea moloko o mocha

ea sieloa lefatše.

₇Ho ne ho hlohonolofalitsoe sefate sane

se ileng sa sebeletsa ho loka.

₈Empa ho rohakehile setšoantšo

se entsoeng ka matsoho

'moho le moetsi oa sona;

eena hobane o se entse,

sona hobane ntho e senyehang

e bitsitsoe Molimo.

₉Molimo o hloile ka ho tšoana

ba se nang borapeli

le bokhopo ba bona;

₁₀mosebetsi o tla otloa

'moho le moetsi oa oona.

₁₁Ruri Molimo o tla tla ho otla

melimo ea litšoantšo ea balichaba,

hobane leha e entsoe

ka tse hloliloeng ke Molimo,

ke manyala,

le lifi tsa meea ea batho,

le leraba la maoto a maoatla.

₁₂Morero oa ho etsa litšoantšo

tsa melimo

e bile mohloli oa bohlola,

'me ho qaptjoa ha tsona

ea e-ba ho bola ha bophelo.

₁₃Ha lia ka tsa e-ba teng tšimolohong,

'me ha li na ho ba teng

ka ho sa eeng kae.

₁₄Ke ka boithati ba batho

li ileng tsa kena lefatšeng,

'me ka hona qetello e potlakileng

ea tsona ea hlophisoa.

₁₅Mohlomong ntata ea siametseng

ngoana ea khaolelitsoeng ke lefu,

a etsa setšoantšo sa ngoana eo oa hae

ea shoeleng ka sekhahla,

'me a hlompha joaloka molimo

seo e kileng ea e-ba mofu pele,

'me a laea ba lelapa la hae

meetlo le litšebeletso.

₁₆Joale, ha nako e ntse e feta,

moetlo oo o khopo oa matlafala

'me oa nkoa e se e le molao.

Hape, ke ka taelo ea likhosi

tse tšajoang,

litšoantšo tse betliloeng

li ileng tsa khumameloa.

₁₇Hobane batho ba ne ba sitoa

ho hlompha khosi

moo e leng teng, e le ba ahileng hole;

joale ka khakanyo ea tšobotsi ea eona,

ba etsa setšoantšo se bonahalang

sa khosi eo e hlomphehang,

e le hore, mafolo-folong a bona,

ba kakamatse motho ea leng sieo

joaloka hoja a le teng

₁₈Esita le har'a batho ba sa tsebeng

khosi,

tlotliso ea eona ea hola ka tšusumetso

ea sebetli se ratang botumo.

₁₉Sona, mohlomong ka ho rata

ho khahlisa khosi,

sa sebelisa mahlale a sona

ho ntlafatsa setšoantšo sa eona ho feta.

₂₀Joale sechaba sa hapeha

ke botle ba mosebetsi;

'me eo pele a neng a hlompshoa

joaloka motho, a khumameloa.

₂₁Ha ho le joalo,

hona ho ile ha fetoha leraba ho lefatše,

e le ha batho ba oetsoeng

ke bomalimabe

kapa ba tlas'a tlatlapo ea borena,

ba bitsa lejoe kapa sefate

ka lebitso le sa lokelang ho

arolelanoa.

₂₂Ho feta moo ha hoa ka ha ba lekana

ho fosa tabeng ea tsebo ea Molimo.

Batho bao ba phela

pherekanong e kholo

e tsoaloang ke ho se tsebe,

'me ba bitsa bobe bo bokaalo khotso.

₂₃Ba boloka meetlo ea ho bolaea bana,

kapa ba etsa litšebeletso tsa sephiri,

ba tšoeroe ke motheke-theke,

ba etse tse fapaneng.

₂₄Ha ba sa hlompha bophelo

leha e le bohloeki ba lenyalo,

empa ba bolaeana ka mamene-mene,

'me ba utloisana bohloko ka bohlola.

₂₅Tsohle ke lephehlo-phehlo

le tšabehang

la mali le lipolao, bosholu le mano,

ho bola, ho se tšepahale, pherekano,

ho hlapanyetsa leshano,

₂₆ho se tsebe ho lokileng,

ho hloka teboho,

tšilafalo ea meea, maotoana,

qhoebeshano lenyalong, bohlola,

le bohlaha boitšoarong.

₂₇Efela tšebeletso ea melimo ea bohata,

e mabitso a ke keng a boleloa,

ke qaleho, sesosa le qetello

ea bokhopo bohle.

₂₈Bakhumameli ba eona

ba phofa ke nyakallo,

kapa ba porofeta bohata,

kapa ba phela ka bokhopo,

kapa ha ba qea-qee

ho hlapanyetsa leshano.

₂₉Hobane ba tšepa melimo ea bohata,

e se nang bophelo,

ba hlapanya ka phoso, ba sa lebelle

ho tsoa kotsi ke hona.

₃₀Empa kahlolo e tla ba khaoletsa

tseleng ka ntlha tse peli:

kahobane ba ile ba hopola

ka Molimo hampe

ka ho ineela melimo ea bohata,

'me kahobane ka mano

ba ile ba hlapanyetsa leshano,

ba nyelisa tsohle tse halalelang.

₃₁Hase matla a lintho tseo batho

ba hlapanyang ka tsona

empa ke toka,

ha e iphetetsa ho baetsalibe,

e ahlolang kamehla litšito

tsa ba sa lokang.