SOLOMONE 8

₁Empa, ka matla a bona,

bo nama ho tloha pheletsong

e 'ngoe ea lefatše ho isa ho e 'ngoe.

'me bo hlophisa lintho tsohle

ka makhethe.

₂Ke ile ka bo rata, ka bo batla

ho tloha bocheng ba ka,

'me ka laba-labela ho bo etsa

monyaluoa oa ka,

ka khahloa ke botle ba bona.

₃Bo eketsa khanya

ea tsoalo e khabane ea bona

ka ho phela le Molimo,

'me Morena oa lintho tsohle

o bo ratile.

₄Bo na le kabelo liphiring

tsa tsebo ea Molimo,

'me ke bona bo khethang

seo eena a tla se etsa.

₅Haeba maruo ke ntho e lakatsehang

bophelong,

ke lefe leruo le fetang Bohlale,

boo e leng moetsi oa lintho tsohle?

₆Haeba kelello ea motho

e fela e sebetsa,

na moqapi oa lintho tsohle

a ke ke a sebetsa ho feta na?

₇Na u rata ho loka?

Makhabane ke litholoana

tsa mesebetsi ea Bohlale;

hobane bo ruta boitšoaro, seli,

toka le matla,

'me bophelong ba batho ha ho letho

le molemo ho feta tsona.

₈Na u nyoretsoe tsebo e sephara

ea tsa bophelo?

Bohlale bo tseba tsa khale

'me bo hakanya tse tlang;

bo tseba ho hlalosa maele

le ho qhaqholla malepa;

bo tseba e sa le pele lipontšo

le limakatso,

le lietsahala tsa mengoaha le linako.

₉Joale ka ikemisetsa

ho bo etsa molekane oa ka,

ka ho tseba hore bo tla nkeletsa

katlehong,

'me bo ntšelise mathateng le lillong.

₁₀Ka hopola hore, ka bona,

ke tla tlotlisoa ke matšoele,

'me ke hlompshoe ke baholo

leha ke sa le mocha.

₁₁Ke tla fumanoa ke le kelello

e chorileng kahlolong,

'me ke tla babatsoa ke ba boemong.

₁₂Ha ke khutsitse ba tla emela

hore ke bue,

'me ha ke bua ba tla hloaea litsebe;

ha ke bua haleletsana,

ba tla bea matsoho a bona

melomong ea bona.

₁₃Ka baka la Bohlale nke ke ka shoa,

'me ke siele bahlahlami ba ka

setumo se sa feleng.

₁₄Ke tla busa machaba

'me lichaba li tla ba tlas'a ka.

₁₅Babusi ba tšajoang ba tla tšoha

ha ba utloa ka 'na.

Ke tla ipontša ke le molemo

ho batho ba ka,

'me ntoeng ke le sebete.

₁₆Ha ke fihla lapeng, ke tla phomola

lehlakoreng la Bohlale,

hobane setsoalle le bona

ha se na tse babang,

'me ho phela le bona

ha bo na bohloko,

empa ke thabo le nyakallo feela.

₁₇Ha ke inahana tjena,

ka hopola kelellong ea ka

hore ho ba mong ka Bohlale

ho tsoala ho-se-shoe,

₁₈le hore setsoalleng le bona

ho teng thabo ea sebele,

le ka mesebetsi ea matsoho a bona

ho fumanoa leruo le sa feleng,

le tulong le bona

ho fumanoa kutloisiso,

le botumo ka ho buisana le bona.

Ka baka lena ka ea kahohle ke batla

ho iphumanela bona.

₁₉Ke ne ke le ngoana

ea filoeng ka tlhaho,

'me moea o motle e le kabelo ea ka.

₂₀Kapa, ke le ea lokileng,

ka kena 'meleng o sa silafalang.

₂₁Empa ke ne ke tseba

hore nke ke ka rua Bohlale,

haese ka neo ea Molimo;

ho elelloa hore na ke mpho ea mang

e ntse e le bopaki ba kutloisiso.

Ka hona ka ipiletsa ho Morena,

ka mo rapela ka pelo eohle ea ka,

ka re: