Baahi ba Jerusalema ba tla hloekisoa
1“Mohl'a tsatsi leo, seliba se tla ba teng, seo ba ntlo ea Davida le baahi ba Jerusalema, ba tla hloekisoa sebe le litšila tsa bona ho sona.
2“Ka lona tsatsi leo, ke tla felisa mabitso a melimo ea bohata kahar'a naha, e le hore a tle a se ke a hlola a hopoloa,” ho rialo Morena oa mabōtho. “Ke tla tlosa le baporofeta le moea o sa hloekang naheng ena. 3Haeba ho e-na le e mong ea ka 'nang a porofeta, bo-ntat'ae le 'm'ae ba mo tsoetseng ba tla bua ho eena, ba re: ‘U ke ke ua phela, hobane u bua leshano ka lebitso la Morena.’ Bo-ntat'ae le 'm'ae ba tla 'molaea a nts'a porofeta.
4“Mohl'a tsatsi leo, moporofeta ka mong o tla hlabisoa lihlong ke pono tsa hae tsa boporofeta. Ha a ka ke a apara seaparo sa boporofeta se entsoeng ka boea, e le hore a tle a thetse. 5O tla re: ‘'Na ha ke moporofeta, ke molemi; haesale ke phela ka mobu ho tloha bocheng ba ka.’ 6Haeba e mong a ka 'motsa, a re: ‘Mehoabali ee ke ea'ng e 'meleng oa hao?’ o tla araba, a re: ‘Ke ea ha ke ne ke shapuoa ke metsoalle ea ka ka matlung a eona.’ ”
Taelo ea ho bolaea molisa oa Molimo
7“Tsoha, uena sabole,
u loantše molisa oa ka,
u loantše eena ea haufi le 'na!”
ho rialo Morena oa mabōtho.
“Otla molisa,
linku li tle li qhalane;
'na ke tla otla le likonyana.
8Har'a naha eohle,”
ho rialo Morena,
“ke tla otla
karolo tse peli tsa mohlape,
ke li otle, ke be ke li timetse,
ea boraro eona e sale e phela.
9Ena ea boraro
e tla feta har'a mollo,
ke e hloekise
sa silefera ha e hloekisoa,
ke e hlahlobe
sa khauta ha e hlahlojoa.
Chaba sa ka se tla ipiletse ho 'na,
joale 'na ke tla se araba, ke re:
‘Sena ke sona sechaba sa ka,’
'me sona se tla bolela, se re:
‘Morena ke eena Molimo oa rōna.’ ”
