Pono ea boraro: Khoele e methang
1Ka boela ka talima, 'me ka bona motho ea tšoereng khoele e methang! 2Eaba kea 'motsa, ke re: “U ea kae?”
Motho eo a araba, a re: “Ke il'o metha Jerusalema, ke tle ke fumane bophara le bolelele ba eona.”
3Ka bona lengeloi le neng le bua le 'na le atamela, 'me lengeloi le leng la atamela ho tla le khahlanyetsa. 4Lengeloi la bobeli la re ho la pele: “Matha, u e'o bolella mohlankanyana eo, u re: ‘Ka baka la bongata ba batho le ba mehlape, Jerusalema ha e na ho haheletsoa ka marako. 5'Na ka sebele ke tla e kopela kamahohle, ke be lerako la mollo,’ ho rialo Morena, ‘ke be tlōtla kahar'a eona.’
6“Tsoang! Tsoang! Balehang naheng e ka lebōea,” ho rialo Morena, “hobane ke ne ke le qhalanyelitse liqoleng tse 'ne tsa lefatše,” ho rialo Morena.
7“Tsoa, uena Sione, uena ea phelang le Morali oa Babilona!” 8Morena oa mabōtho, eena ea ileng a ntlotlisa, a ba a nthōma ho balichaba ba ileng ba le tlatlapa, o re: “Ea le amang o thetsa thaka ea leihlo la ka. 9Ke tla otlollela letsoho la ka holim'a bona, 'me ba tla lobèloa ke ba kileng ba ba sebeletsa. Ke hona le tla tseba hore Morena oa mabōtho o nthōmme.
10“Hōoeletsa, u nyakalle, uena Morali oa Sione, hobane kea tla, ke tlil'o lula le uena,” ho rialo Morena.
11“Mohl'a tsatsi leo balichaba ba bangata ba tla ikopanya le Morena, e be sechaba sa hae. O tla lula le lōna, 'me le tla tseba hore Morena oa mabōtho o nthōmme ho lōna. 12Naheng eo e halelang Morena o tla inkela Juda, e be lefa le hae, a boele a ikhethele Jerusalema. 13Lōna batho bohle, khutsang ha le le kapele ho Morena, hobane o tsoa ka Tempeleng ea hae e halalelang.”
