1 kubaseThesalonika 1

₁Lencwadzi iphuma kuboPawula, naSilasi, naThimothi; iya kubaseThesalonika labalibandla laNkulunkulu, longuBabe, neleNkhosi Jesu Khristu.

Umusa nekuthula akube kini.

₂Sibonga Nkulunkulu njalo ngani nonkhe, sinikhulekela singakhawuli emithandazweni yetfu ₃kuNkulunkulu wetfu, longuBabe, sikhumbula imisebenti yenu yekukholwa, nemisiphalato yelutsandvo, nekubambelela kwenu etsembeni leliseNkhosini yetfu Jesu Khristu. ₄Siyati, bazalwane labatsandzekako kuNkulunkulu, kutsi nguye lonikhetsile. ₅Ngobe liVangeli lesanishumayela lona alifikanga kini ngemavi kuphela, kodvwa lefika ngemandla, nangaMoya Longcwele, seneliseka kutsi inshumayelo yetfu iliciniso. Niyati kutsi sasitiphatsa kanjani ngesikhatsi sisemkhatsini wenu. Konkhe loko sasikwenta ngenca yenu. ₆Nani naba balingisi betfu nebeNkhosi; ngobe, nome nanisenhluphekweni lenkhulu, nemukela livi ngenjabulo lenaniyinikwe nguMoya Longcwele, ₇nadzimate naba sibonelo kubo bonkhe labakholwako eMasedoniya nase-Akhaya. ₈Ngobe kuvakala kwelivi leNkhosi lokwachamuka lapho kini akuvakalanga eMasedoniya nase-Akhaya kuphela, kodvwa kukholwa kwenu nguNkulunkulu sekuvakele kuto tonkhe tindzawo, ngako-ke asinasidzingo sekulandzisa ngako. ₉Ngobe bona ngekwabo babika ngatsi kutsi nasemukela kahle kangakanani, nekutsi naphendvukela kanjani kuNkulunkulu, nashiya tithico tenu, kuze nikhonte Nkulunkulu lophilako nalonguye sibili. ₁₀Nonkhe nilindzele kuchamuka kweNdvodzana yakhe ezulwini, layivusa kulabafile. LeNdvodzana nguJesu losikhulula elulakeni lolutako.