2 kubaseKorinthe 2

₁Kungako ngatimisela ngekutsi ngingaphindzi kunivisa buhlungu ngekunivakashela. ₂Ngobe nangabe nginivise buhlungu, ngubani longangitfokotisa? Kungaba nguye yena lowo lese ngimvise buhlungu? ₃Nguloko lokwabangela kutsi ngibhale njengaloku ngenta. Ngangentela kutsi nangifika ngingete ngaviswa buhlungu ngulabo lekufanele bangijabulise. Mine nginati kahle kamhlophe, kangangekutsi ngingasho ngitsi nangijabulile mine, nani nijabulile. ₄Nganibhalela ngisebuhlungwini ngidzabukile enhlitiyweni, tinyembeti tigcwele emehlo, hhayi ngobe ngifuna kunivisa buhlungu, kepha kuze nati kutsi nginitsandza kangakanani.

₅Nakukhona lovise lomunye buhlungu, akevisi mine ngedvwa, ngalenye indlela usivise buhlungu sonkhe, noko angengeti ngekusho njalo. ₆Kwenele nje lokwekutsi linyenti limlahlile lowo. ₇Nyalo-ke sekufuneka nine nimcolele nibuye nimkhutsate, ningamyekeleli etinhlungwini adzimate aphele. ₈Ngako ngiyanincenga kutsi nimkhombise kutsi nimtsandza ngempela. ₉Empeleni ngakubhalela kutsi nginihlole nje kutsi nihlonipha kuko konkhe yini. ₁₀Nome ngubani lenimtsetselelako, nami ngiyamtsetselela; ngobe mine nase ngitsetselele, ngisuke ngikwente ngempela, ngikwentele nine kube shangatsi ngusebukhoneni baKhristu. ₁₁Siyawati emachinga aSathane; ngako-ke akukafaneli simvumele asehlule.

₁₂Mhlazana ngifika eThrowasi kuyawushumayela liVangeli laKhristu, umnyango wawungivulekele kabanti kutsi ngisebentele iNkhosi. ₁₃Kodvwa ngabate kuphumula emphefumulweni, ngobe ngangingakamboni Thithusi umzalwane. Ngako-ke ngase ngiyabavalelisa, ngaya eMasedoniya.

₁₄Kodvwa akabongwe Nkulunkulu losihola njalo eludvwendvweni lwekuncoba ngaKhristu. Nkulunkulu usebentisa tsine kutsi etindzaweni tonkhe avakalise liphunga lelimnandzi lekumati Khristu. ₁₅Ngempela siliphunga lelimnandzi laKhristu kuNkulunkulu, emkhatsini walabasindziswako nasemkhatsini walabasendleleni lebange ekubhujisweni. ₁₆Siliphunga lekufa kube kufa kulababhujiswako, kantsi siliphunga lekuphila kube kuphila kulabasindziswako. Ngubani-ke longakumela loko? ₁₇Tsine-ke asinjengabo bantfu labanyenti labenta livi laNkulunkulu libe yindali; kodvwa tsine lesikuKhristu sikhuluma kwaNkulunkulu ngekuciniseka ebukhoneni bakhe.