Imisebenti yebaPhostoli 3

₁Ngalelinye lilanga boPhetro naJohane baya ethempelini ntsambama ngeli-awa lesitsatfu, ngesikhatsi semkhuleko. ₂Kwakukhona indvodza letsite leyayisishosha seloku yatalwa. Yayihleti endzaweni lekutsiwa “Intfunja Lenhle”. Yayetfwalwa onkhe emalanga ibekwe ngasentfunjeni yentele kucela kubantfu lababengena ethempelini. ₃Yatsi nayibona boPhetro naJohane bangena, yacela kutsi bayiphe noma ngayini lababengahle bayiphe kona. ₄Bayibukisisa, Phetro watsi kuyo: “Ase ubuke ngala ngakitsi.” ₅Yababuka, seyilindzele kutsi bayiphe lutfo. ₆Phetro watsi kuyo: “Anginamali, kodvwa ngitakunika loko lenginako: Ngelibito laJesu Khristu waseNazaretha ngitsi kuwe: Sukuma uhambe!” ₇Wase uyibamba ngesandla sangasekudla ayisita kutsi isukume. Masinyane tinyawo tayo nemacakala ayo acina. ₈Yesuka emankayi yaya etulu, yema ngetinyawo tayo, yahamba, yangena ethempelini kanye nabo, ihamba isuka emankayi idvumisa Nkulunkulu. ₉Bonkhe bantfu bayibona seyihamba idvumisa Nkulunkulu; ₁₀batsi nase babone kahle kutsi ngiyo lendvodza lebeyihlala ngase “Ntfunjeni Lenhle” yelithempeli, bamangala kakhulu ngaloko lokwase kwentekile.

₁₁Lendvodza yalandzela boPhetro naJohane, bonkhe bantfu bamangala bagijima baya endzaweni leyayibitwa ngekutsi: “NguMhubhe waSolomoni”. ₁₂Nakabona labantfu Phetro, watsi kubo:

“Madvodza aka-Israyeli, kunimangaliselani loku, nisigolotelelani kangaka? Nicabanga kutsi kungebungcwele betfu yini nome ngemandla etfu yini kutsi sente lomuntfu wahamba? ₁₃Nkulunkulu wa-Abrahama na-Isaka naJakobe, Nkulunkulu wabokhokho, usikhatimulisile Sisebenti sakhe lesinguJesu, lenamniketa etiphatsimandleni, namlahla embikwaPhilatu, namala nome Philatu asatimisele kumkhulula. ₁₄Abengcwele alungile, kodvwa namala, namlahla, esikhundleni sakhe nacela Philatu kutsi anikhululele sigelekece. ₁₅Ngako nabulala uMtfombo Wemphilo. Kodvwa Nkulunkulu wamvusa kulabafile, tsine-ke sibofakazi baloko. ₁₆Ligama laJesu nekukholwa egameni lakhe lokucinise lendvodza leniyibonako naleniyatiko; nekukholwa lokungaJesu kunike imphilo lephelele kulomuntfu, njengobe nani nibona nje.

₁₇“Noko, bomnaketfu, ngiyati kutsi loko nakwentiswa kungati njengebaholi benu. ₁₈Nkulunkulu wakumemetela kucala ngabo bonkhe baphrofethi kutsi Khristu abefanele kuhlupheka; nembala loko sekugcwalisekile ngalendlela. ₁₉Ngako, phendvukani, nibuyele kuNkulunkulu, kuze esule licala letono tenu, ₂₀kuze kufike tikhatsi Nkulunkulu ahlumelelise imiphefumulo yenu ngekutfumela Jesu longuKhristu, lanikhetsela yena kucala. ₂₁Kufanele ahlale ezulwini kuze kufike sikhatsi lapho konkhe kuyakwentiwa kube kusha, njengobe Nkulunkulu amemetela emandvulo ngebaphrofethi bakhe labangcwele. ₂₂NaMosi watsi: ‘INkhosi, Nkulunkulu wenu, iyawunitfumelela umphrofethi, njengobe nami angitfuma, loyawuba wesive sakini. Nibolalela konkhe latanitjela kona. ₂₃Lowo longalaleli loko lokushiwo ngulowo mphrofethi uyakwehlukaniswa nesive saNkulunkulu abhujiswe.’ ₂₄Nebaphrofethi bonkhe lababenelivi njengaSamuweli nalabeta emvakwakhe, bamemetela ngawo lamalanga. ₂₅Tetsembiso taNkulunkulu ngebaphrofethi bakhe ngetenu, ninesabelo nani kulesivumelwane lesentiwa nguNkulunkulu kubokhokho benu. Washo naku-Abrahama watsi: ‘Ngesitukulwane sakho ngiyawubusisa bonkhe bantfu emhlabeni.’ ₂₆Ngako Nkulunkulu wasikhetsa wasitfuma Sisebenti sakhe kini kucala kutenibusisa ngekunenta nonkhe niphendvuke nitishiye tindlela tenu tekonakala.”