Imisebenti yebaPhostoli 7

₁UmPhristi Lomkhulu wabuta Stefano watsi: “Ngabe kunjalo yini?” ₂Stefano waphendvula watsi: “Bazalwane, nani bobabe, lalelani kimi! Nkulunkulu weludvumo wabonakala kukhokho wetfu Abrahama asahlala eMesophothamiya, asengakatfutsi kuyakwakha eHarani, ₃watsi kuye: ‘Suka ushiye lusendvo lwakini nelive lakini uye eveni lengiyawukukhombisa lona!’ ₄Wesuka-ke kulelive lemaKhaledi waya eHarani. Asafile uyise, Nkulunkulu wamsusa Abrahama wamletsa kulelive, lona leli lenakhe kulo. ₅Nkulunkulu akamnikanga Abrahama lendzawo kutsi ibe yakhe, ngisho neligajana nje lemhlaba imbala; kepha Nkulunkulu wetsembisa kutsi uyawumnika lelive libe lakhe netitukulwane takhe emvakwakhe. Ngalesikhatsi Nkulunkulu enta lesetsembiso Abrahama abengenamntfwana. ₆Nkulunkulu watsi kuye: ‘Titukulwane takho tiyawuhlala eveni letive, lapho tiyawuba tigcili khona tiphatseke kabuhlungu, kuze kuphele iminyaka lengema-400. ₇Kodvwa ngiyakusehlulela leso sive lesiyawube sibagcilata, emvakwaloko bayawusuka baphume kulelo live bete batengikhonta kulendzawo.’ ₈Nkulunkulu wanika Abrahama lisiko lekusoka, kwaba sibonakaliso sesivumelwane. Ngako Abrahama watala Isaka, wamsoka ngemvakweliviki atelwe; na-Isaka wasoka Jakobe, naJakobe wasoka bokhokho labali-12.

₉“Bokhokho baba nemona ngaJosefa, bamtsengisa njengesigcili eGibhithe. Kodvwa Nkulunkulu waba naye, ₁₀wamsindzisa kuto tonkhe tinhlupheko takhe. Josefa watsi nakema embikwaFaro, inkhosi yaseGibhithe, Nkulunkulu wamnika umoya lomuhle nekuhlakanipha. Faro wamenta umbusi etikwalo lonkhe laseGibhithe nasetikwendlu yakhe yonkhe. ₁₁Kwase kuba khona indlala kulo lonkhe laseGibhithe naseKhenani, leyaletsa kuhlupheka lokukhulu. Nabokhokho kwabaphelela kudla. ₁₂Ngako-ke watsi Jakobe nakeva kutsi kukhona kudla eGibhithe, watfumela emadvodzana akhe, labokhokho betfu, kutsi aye khona kwekucala. ₁₃Nase babuyela eGibhithe kwesibili, Josefa wase uyativeta kubomnakabo, kulapho-ke naFaro acala khona kulwati lusendvo lwakuboJosefa. ₁₄Ngako-ke Josefa watfumela umlayeto kuyise Jakobe, ambita kutsi akete nendlu yakhe yonkhe eGibhithe; sebabonkhe labo bantfu babengema-75. ₁₅Wehla-ke Jakobe waya eGibhithe, lapho yena nabokhokho betfu, bahlala khona baze bafa. ₁₆Tidvumbu tabo tamikiswa eShekhemu, lapho tangcwatjwa khona edlizeni lelalitsengwe ngu-Abrahama ngemali esiveni saHamori eShekhemu.

₁₇“Kwatsi nase sisondzele sikhatsi sekugcwaliseka kwesetsembiso Nkulunkulu lasenta ku-Abrahama, sive sakitsi sandza kakhulu saba sinyenti eGibhithe. ₁₈Ekugcineni lenye inkhosi leyayingamati Josefa yacala kubusa eGibhithe. ₁₉Yacala yasihlupha sive sakitsi, yaba nelulaka kubokhokho betfu, ibaphoca ngekutsi ibalahlise tinswane tabo, khona phela titewufa. ₂₀Ngiso-ke lesikhatsi latalwa ngaso Mosi, labengumntfwana lotsandzekako kuNkulunkulu. Wakhulela ekhaya tinyanga letintsatfu. ₂₁Kwatsi nasasusiwe ekhaya lakubo iNkhosatana yaFaro yamtsatsa, yamfaka esiswini sayo yamkhulisa imphatsa njengendvodzana yayo. ₂₂Mosi wafundziswa yonkhe inhlakanipho yemaGibhithe, waba lijaha leliyindvodza leyayinemandla ekukhulumeni nasetentweni.

₂₃“Nasaneminyaka lengema-40 Mosi watimisela kutsi avakashele bantfu bakubo ema-Israyeli. ₂₄Wabona lomunye wabo ashaywa ngumGibhithe; wase uvikela lowakubo, wamkhiphela sibhongo ngekubulala lomGibhithe. ₂₅Abecabanga kutsi emaJuda, bantfu bakubo, abetakubona kutsi Nkulunkulu utawusebentisa yena ekuwakhululeni kulobugcili; kodvwa wona akakubonanga loko. ₂₆Ngakusasa wabona ema-Israyeli lamabili alwa, wetama kuwalamula. Watsi kubo: ‘Madvodza, lalelani la, nine nibandzawonye, nibangani?’ ₂₇Kodvwa lona abeshaya lomunye wakhweshisa Mosi watsi: ‘Ngubani losakwente waba ngumbusi nemehluleli etikwetfu wena? ₂₈Sewufuna kungibulala nami, njengalomGibhithe lombulele itolo?’ ₂₉Watsi nakuva loko Mosi wabaleka eGibhithe waye wahlala njengesihambi eveni lakaMidiyani. Watalela khona emadvodzana lamabili.

₃₀“Ngemuva kweminyaka lengema-40, ingilosi yatibonakalisa kuMosi isemalangabini esihlahla lesasivutsa ehlane madvutane neNtsaba yaseSinayi. ₃₁Mosi wamangala ngaloko lakubona, asasondzele madvutane kuyawubukisisa lesihlahla lesasivutsa weva livi leNkhosi litsi: ₃₂‘NginguNkulunkulu wabokhokho bakho, Nkulunkulu wabo-Abrahama, na-Isaka, naJakobe.’ Mosi wavevetela entiwa kwesaba, wehluleka nekusibukisisa kahle. ₃₃INkhosi yase itsi kuye: ‘Khumula tincabule etinyaweni takho, ngobe lendzawo lome kuyo ingcwele. ₃₄Ngibukile ngabona kuhlupheka kwesive sami eGibhithe. Sengikuvile kukhala nekububula kwaso, sengehlile kutasisindzisa. Wota-ke manje, ngitekutfumela eGibhithe.’

₃₅“Nguye loMosi lowaliwa bantfu baka-Israyeli labambuta batsi: ‘Ngubani losakwente umbusi nemehluleli etikwetfu?’ Nguye lowatfunywa nguNkulunkulu kutsi abe ngumbusi nemkhululi, ngekusitwa yingilosi layibona esihlahleni lesasivutsa umlilo. ₃₆Wabahola wabakhipha bantfu eGibhithe, enta timangaliso netibonakaliso eGibhithe naseLwandle Lolubovu, elugwadvule nasehlane iminyaka lengema-40. ₃₇Nguye loMosi lowatsi kubantfu baka-Israyeli: ‘Nkulunkulu uyawunitfumelela umphrofethi, njengobe angitfuma nami, uyawuba ngumuntfu wesive sakini.’

₃₈“Nguye labehlangene nebantfu baka-Israyeli ehlane; abelapho nabokhokho betfu kanye nengilosi leyakhuluma kuye eNtsabeni yaseSinayi; wemukela emavi laphilako aNkulunkulu kuze awendlulisele kitsi.

₃₉“Kodvwa bokhokho betfu bala kumlalela; bamkhweshisela eceleni bafisa shangatsi ngabe babuyela emuva eGibhithe. ₄₀Ngako base batsi ku-Aroni: ‘Sentele titfombe letitawuhamba embikwetfu. Asati kutsi sewudliwe yini loMosi lowasikhipha eGibhithe.’ ₄₁Ngulapho-ke benta khona sitfombe lesaba nesimo lesinjengeselitfole, base banikela imihlatjelo kuso, benta lidzili badvumisa lobekungumsebenti wetandla tabo. ₄₂Kodvwa Nkulunkulu wabashiya basale bakhonta tinkhanyeti tasezulwini, njengobe kubhaliwe encwadzini yebaphrofethi kutsi:

₄₄“Bokhokho betfu babenelithende lapho kwakuhlala khona Nkulunkulu emkhatsini wabo ehlane. Lalentiwe njengobe Mosi abetjelwe nguNkulunkulu kutsi alente, Mosi walenta ngalendlela abekhonjiswe yona. ₄₅Emvakwaloko, bokhokho betfu labemukela lelithende kuboyise babo baletfwala bahamba nalo naJoshuwa, balitsatsa lelive Nkulunkulu lacosha letinye tive kulo. Baligcina kwaze kwaba sikhatsi saDavide. ₄₆Davide watsandzeka kuNkulunkulu, wase ucela kuNkulunkulu kutsi amvumele kube amakhele indlu leyawusetjentiswa titukulwane taJakobe, ₄₇kodvwa nguSolomoni lowaze wamakhela indlu. ₄₈Kodvwa loNkulunkulu Losetikwako Konkhe akahlali etindlini letakhiwe ngetandla, njengekusho kwemphrofethi lotsi:

₅₁“Maye, ninenkhani! Maye, anikholwa etinhlitiyweni tenu! Maye, nitihhulu ekuveni livi laNkulunkulu! Nifute bokhokho benu, nani niphikisana naMoya Longcwele. ₅₂Ukhona nje yena munye umphrofethi longazange ahlushwe bokhokho benu? Babulala titfunywa taNkulunkulu, letatimemetela ngembili ngekufika kweSisebenti sakhe lesilungile. Manje senimtsengisile nambulala. ₅₃Ningibo labemukela umtsetfo waNkulunkulu, lowendluliselwa tingilosi kini, nawo anizange seniwulalele!”

₅₄Liqoqo letiphatsimandla lisalalele Stefano latfukutsela kakhulu, lacucudza imihlatsi. ₅₅Kodvwa Stefano agcwele Moya Longcwele, wabuka ezulwini wabona bukhatikhati baNkulunkulu, naJesu eme ngasesandleni sekudla saNkulunkulu.

₅₆Watsi: “Ase nibuke! Ngibona lizulu livulekile neNdvodzana yeMuntfu ime ngesandleni sekudla saNkulunkulu.”

₅₇Bamemeta kakhulukati bavala tindlebe tabo, bamtselekela bonkhe kanyekanye, ₅₈bamhudvulela ngephandle kwelidolobha, bamgcoba ngematje. Bofakazi babeka timphahla tabo phansi kutsi tigadvwe lijaha lelalibitwa ngekutsi nguSawula. ₅₉Basachubeka bamgcoba ngematje Stefano, wakhala ngelivi lelikhulu watsi: “Nkhosi Jesu, yemukela umoya wami.”

₆₀Waguca phansi wamemeta ngelivi lelikhulu watsi: “Nkhosi! Ungababekeli sono ngaloku labakwentako!” Wase uyafa.