Dutheronomi 19

₁“Utawutsi Simakadze Nkulunkulu wenu angatibhubhisa letive letikulelive Simakadze Nkulunkulu wenu lanipha lona kutsi libe lenu, nitsi ningatidvudvula nitikhiphe, bese nakha kulamadolobha ato nasetindlini tato, ₂niyakube senitehlukanisela nine emadolobha lamatsatfu latabasemkhatsini welive Simakadze Nkulunkulu wenu lanipha lona kutsi libe lenu. ₃Yakhani imigwaco leya kuwo, bese nilehlukanisa tigaba letitsatfu lelive Simakadze Nkulunkulu wenu lanipha lona kutsi libe lifa lenu, khona kutawutsi lowo lobulele umuntfu abalekele khona. ₄Lena-ke yindzaba yemuntfu lobulele lomunye wase ubalekela khona kuyawusindzisa kuphila kwakhe, lowo lobulele makhelwane wakhe angakacondzi, futsi lobekangesiso sitsa sakhe. ₅Ase ngitsi nangu umuntfu uhamba namakhelwane wakhe uya ehlatsini kuyawukabha tinkhuni, bese utsi uphakamisa lizembe atewujuba sihlahla, kuphunyuke lelizembe lishaye lomakhelwane afe khona lapho, lowo muntfu angabaleka ayewukhosela kulelinye lalawo madolobha, kuze atewusindzisa kuphila kwakhe. ₆Ngaphandle kwaloko umphindziseli losihlobo sengati semufi lofuna kumbulala, kungenteka amcoshe aze amkhandze, nangabe libanga lilidze kakhulu, bese uyambulala, nome ngabe abengakafaneli kubulawa, ngobe lomakhelwane wakhe amfele ngesiphosiso. ₇Ngikusho ngaleso sizatfu-ke kutsi kufanele nitehlukanisele nine emadolobha lamatsatfu.

₈“Nangabe Simakadze Nkulunkulu wenu alandzisa lelive lenu, njengobe etsembisa ngesifungo kubokhokho benu, bese unipha lonkhe lelive labetsembisa lona, ₉ngobe nimlandzele nagcina yonkhe lemiyalo lengininika yona lamuhla, yekutsandza Simakadze Nkulunkulu wenu nekuhamba ngemiyalo yakhe ngaso sonkhe sikhatsi, niyawuvele nengete ngetulu lamanye emadolobha lamatsatfu. ₁₀Loko nibokwenta khona kutewutsi ingati lete licala ingetiwucitselwa lite eveni lenu, Simakadze Nkulunkulu wenu lanipha lona kutsi libe lifa lenu, kuze nani ningabi nacala lekucitsa ingati.

₁₁“Kodvwa nangabe umuntfu atondza makhelwane wakhe aze amlalele endleleni, amshaye ambulale, bese ubalekela kulelinye lalamadolobha, ₁₂baholi belidolobha lakhe bayawumlandza, bambuyisele edolobheni lakhe, bese bamnikela kulowo mphindziseli losihlobo sengati semufi atembulala. ₁₃Lowo muntfu ningamhawukeli. Kufanele kukhishwe kuphele ka-Israyeli kucitsa ingati lengenacala, khona kutawunihambela kahle.”

₁₄“Ungatikhweshisi tikhonkhwane temnyele wamakhelwane wakho, nawe lowatikhandza setifakwe ngulabo labefika kucala kunawe kulelo live Simakadze Nkulunkulu wakho lakupha lona kutsi libe lakho.”

₁₅“Bufakazi bemuntfu munye abukeneli kutsi kungaze kulahlwe ngabo umbekwacala. Indzaba kufanele ibe nabofakazi lababili nome labatsatfu. ₁₆Nangabe fakazi wemanga avukela umuntfu amlahle ngelicala lelibi, ₁₇labantfu lababili lababangako kufanele beme embikwaSimakadze embikwebaphristi nebehluleli bangaleso sikhatsi. ₁₈Behluleli kufanele bayihlolisise lendzaba, kepha nangabe lofakazi atfolakala kutsi unemanga ngekunika bufakazi lobungemacebo ngemnakabo, ₁₉ngako kufanele bente kuye loko abecondze kukwenta kumnakabo. Niyawukukhipha kanjalo-ke lokubi lokumila emkhatsini wenu. ₂₀Labanye bantfu bayawutsi bangeva ngaloko bese bayesaba, leyontfo ingaphindzi yentiwe emkhatsini wenu. ₂₁Ningabi nasihawu: kuphila ngekuphila, liso ngeliso, litinyo ngelitinyo, sandla ngesandla, lunyawo ngelunyawo.”