1“Sesuka lapho sancandzeka sacondza ehlane, ngendlela leya eLwandle Lolubovu, njengobe Simakadze abevele ashito kimi kucala. Sacitsa sikhatsi lesidze sizulazula, situngeleta live letintsaba taseSeyiri.
2“Simakadze wase ukhuluma kimi utsi: 3‘Senihambe sikhatsi lesidze seloku nitungeleta lelive letintsaba, manje-ke sale nijikela ngasenyakatfo. 4Nika labantfu nansi imiyalo utsi: “Senitalidzabula ekhatsi lelive lebanakenu, titukulwane ta-Esawu, letihlala eSeyiri. Batawunesaba, kodvwa nibocaphela. 5Ningabachukuluti kutsi baze balwe nani, ngobe ngingeke ngininike, ngisho nalokuncane kwalelive labo, ngisho nekwekubeka lunyawo lwenu imbala. Ngilinike Esawu lelive letintsaba iSeyiri, kutsi libe lakhe. 6Kufanele nibakhokhele ngesiliva konkhe kudla kwabo lenikudlako, nemanti abo leniwanatsako.” ’
7“Simakadze Nkulunkulu wenu unibusisile ngayo yonkhe imisebenti yenu yetandla leniyentako. Uninakekele ngesikhatsi nisahamba nidzabula lelihlane lelikhulukati. Kuyo yonkhe leminyaka lengema-40 Simakadze Nkulunkulu wenu abesolomane anani, anizange seneswele lutfo.
8“Ngako sahamba sendlula labanaketfu labatitukulwane taka-Esawu, lababehlala eSeyiri. Sawushiya umgwaco i-Arabha lochamuka e-Elathi nase-Esiyoni Geberi; sahamba ngemgwaco welihlane lakaMowabi. 9Simakadze wakhuluma kimi, watsi: ‘Ningawahlaseli emaMowabi, futsi ningawachukuluti kutsi aze alwe, ngobe ngingeke ngininike, ngisho nencenye nje yelive lawo. I-Ari yona ngiyiphe titukulwane taLoti kutsi ibe yato.’ ”
10Ema-Emi abehlala lapho. Lesi bekusive lesasinemandla, kantsi sasisinyenti; sasisidze njengema-Anaki. 11Naso sasatiwa kutsi singemaRefa njengawo ema-Anaki; kodvwa emaMowabi abesibita ngekutsi ngema-Emi. 12EmaHori abehlala eSeyiri, kodvwa titukulwane taka-Esawu tawacosha. Tawabhubhisa onkhe emaHori labelapho, kwabe sekuhlala tona kuleyo ndzawo yawo, njengobe ema-Israyeli enta eveni lanikwa lona nguSimakadze kutsi alidle.
13“Simakadze wakhuluma watsi: ‘Khuphukani manje newele umfudlana iZeredi.’ Savele sewela. 14Kwendlula iminyaka lengema-38 kusukela esikhatsini sekusuka eKhadeshi Bhaneya. Ngaleso sikhatsi lonkhe lelo butfo lemadvodza aleso situkulwane abesafe aphela, njengobe Simakadze abefungile. 15Sandla saSimakadze sachubeka kumelana nabo, baze bafa bonkhe baphela enkambu.
16“Kwatsi kube kufe ekugcina kulawo madvodza, emkhatsini walabo bantfu, 17Simakadze wakhuluma kimi, watsi: 18‘Lamuhla nitakwewelela ngesheya kwe-Ari lekungumnyele welive lakaMowabi. 19Nase nifike esiveni sema-Amoni, ningawachukuluti futsi ningawakhubi, ngobe ngingeke ngininike, ngisho nencenye nje yalelive lawo kutsi libe lifa lenu, ngobe phela ngalipha titukulwane taLoti kutsi libe lifa lato.’ ”
20Lelo bekutsiwa live lemaRefa labehlala kulo kucala; kodvwa ema-Amori abewabita ngekutsi ngemaZamzumi. 21Bekusive lesasinemandla, kantsi futsi sasisinyenti, futsi sisidze njengema-Anaki, kodvwa Simakadze wawabhubhisa. Kwefika ema-Amoni acosha lamaRefa, kwase kwakha wona kulelo live. 22Simakadze bekatentele njalo titukulwane taka-Esawu letatihlala eSeyiri, ngesikhatsi abhubhisa emaHori, lawacosha kulelo live, kwabe sekwakha tona kuze kube ngulamuhla. 23Ema-Avi labakhe emadolobheni lagudla lwandle kuze kuyewufika eGaza, wona-ke abhujiswa ngemaKhrethe labechamuka eKhrethe. Lelive lase lidliwa ngulawo maKhrethe.
24“Sukumani, nihambe nidzabule Sihosha sase-Anoni. Bukani la, indzawo yaSihoni, um-Amori, inkhosi yaseHeshboni, nelive lakhe, ngikwetfule etandleni tenu. Mhlaseleni nidle lelive lakhe. 25Kusukela lamuhla ngitawucala kwenta tonkhe tive temhlaba tinesabe titfutfumele ngani. Nativa kukhulunywa ngani, tiyawukwesaba tikhatsateke kakhulu ngani.”
Ema-Israyeli ancoba inkhosi Sihoni
26“Ngako ngatfumela titfunywa ngesikhatsi siseseHlane laseKhedemothi, taya enkhosini Sihoni, eHeshboni, ngatsi tibofike tikhulume ngemavi ekuthula titsi: 27‘Sicela kwendlula sidzabule lelive lakho. Sitawuhamba ngemgwaco, singeke siphambukele ngesekudla nome ngesancele. 28Sitsengisele kudla, khona sitekudla, usitsengisele nemanti sitewunatsa; konkhe usitsengisele ngesiliva. Sicela mane usivumele kutsi sendlule ngetinyawo, 29njengobe kwenta titukulwane taka-Esawu letihlala eSeyiri, nanjengobe kwenta emaMowabi lahlala e-Ari, size sewelele ngesheya kweJordane, eveni lasinika lona Simakadze Nkulunkulu wetfu.’
30“Kodvwa Sihoni, inkhosi yaseHeshboni, akazange asivumele kutsi sendlule sidzabule live lakhe, ngobe Simakadze Nkulunkulu wenu wenta umoya wakhe waba lukhuni nenhlitiyo yakhe yaba nenkhani; loko wakwentela kutsi atekumnikela etandleni tenu, njengobe kunjalo lamuhla.
31“Simakadze wakhuluma kimi, watsi: ‘Buka la, Sihoni nelive lakhe sengimnikele kuwe. Cala manje kumncoba, khona utekulidla lelive lakhe.’
32“Sihoni nemabutfo akhe waphuma atewusihlasela emphini yaseJahasi, 33Simakadze Nkulunkulu wetfu wamnikela kitsi, samncoba yena nemadvodzana akhe kanye nesive sakhe sonkhe. 34Ngaleso sikhatsi sawatsatsa onkhe emadolobha akhe, sawabhubhisa onkhe, nemadvodza, nebafati, nebantfwana. Akuzange kusale ngisho namunye. 35Kodvwa tifuyo nalesasikutfumbe emadolobheni lesasiwancobile sakutfutsa sahamba nako. 36Kusukela e-Aroyeri lesemngcengcemeni weSihosha sase-Anoni, kanye nekusuka edolobheni lelisesikhunjini semfula, kuze kuyewufika eGileyadi kwabate ngisho nalinye lidolobha lelaba ngetulu kwemandla etfu. Simakadze Nkulunkulu wetfu wawanikela kitsi onkhe. 37Kodvwa asizange sisondzele eveni lema-Amoni: nome eceleni kugudla umfula iJabhoki, nome ngasemadolobheni laseveni letintsaba, nome ngukuphi-ke lapho Simakadze Nkulunkulu wetfu abesiyale kutsi singayi khona.”
