Dutheronomi 32

₁“Lalelani, mazulu, ngitawukhuluma.

Vani, wena mhlaba,

emavi emlomo wami.

₂Imfundziso yami ayehle njengemvula,

emavi ami ahhohloke njengematolo; yebo,

njengemabhudlo etjanini lobuluhlata,

nanjengemvula lenkhulu etikwalokumilile.

₃Ngiyawumemetela Libito laSimakadze,

kudvunyiswe bukhulu baNkulunkulu wetfu.

₄“Yena uLidvwala, imisebenti yakhe iphelele;

yebo, netindlela takhe tonkhe tilungile.

Nkulunkulu lowetsembekile longakwenti lokubi,

ucotfo akakhetsi muntfu.

₅Bonile kuye, batindlisamahloni.

Ngako-ke abasesibo bantfwana bakhe,

kodvwa situkulwane lesesigwegwile,

nalesintsamo yaso ishwilekile.

₆Kungabe lena nguyona ndlela yini

lenibonga ngayo kuSimakadze,

nine sive lesilibele nalesingakahlakaniphi?

Akusiyena yini longuyihlo,

uMdali wenu,

lowo lowanenta wanibumba?

₇“Khumbulani tikhatsi tasemandvulo,

cabangani ngetitukulwane lese tendlula kadzeni.

Buta kuboyihlo, batakunitjela,

nakubo labadzala, batawunichazela.

₈Ngesikhatsi Losetikwako Konkhe

abela tive emafa ato,

mhlazana ehlukanisa tive ngetive

wemisa iminyele yetive,

kwaya ngebungako bemadvodzana a-Israyeli.

₉Ngobe sabelo saSimakadze sive sakhe,

Jakobe losabelo lesilifa lakhe.

₁₀“Eveni lelisehlane,

lapho amtfola khona,

esikhotseni kalashameshame,

wamvikela wamnakekela;

wamlondvolota njengenhlavu yeliso lakhe,

₁₁njengelusweti lolunyakatisa sidleke salo,

lundizele etikwemazini alo,

lwendlale timphiko talo,

kuze luwabambe ngato,

luwetfwale ngetingwabha talo.

₁₂NguSimakadze kuphela lowamhola;

kwakute namunye

nkulunkulu wetive labenaye.

₁₃“Wamgibelisa eticongweni etindze temhlaba,

wamondla ngetitselo tesiganga.

Wamkhuluphalisa ngeluju lwemadvwala

nangemafutsa asemifantfwini, ematjeni emlilo.

₁₄Wamkhuluphalisa ngemasi nangelubisi lwemhlambi

yetinkhomo netimbuti,

nangemazinyane lakhuluphalisiwe etimvu netimbuti,

nangetihhanca telikhetselo taseBhashani,

nangetinhlavu letikhetsekile takolo.

Wanatsa liwayini lelimnandzi kakhulu lelibovu.

₁₅“Jeshuruni wazimuka wakhahlela;

wesutsa kudla, wesuleka, watamasa.

Wamfulatsela Nkulunkulu lowamenta,

walala Lidvwala lelinguMsindzisi wakhe.

₁₆Bamenta waba nesikhwele

ngabonkulunkulu babo betive;

bamtfukutselisa ngaleto tithico

tabo letinengekako.

₁₇Benta imihlatjelo emadimonini

langasiye Nkulunkulu,

bonkulunkulu labangazange sebaze babati,

bonkulunkulu lababesandza kuvela nje,

bonkulunkulu boyihlo labebangazange sebabesabe.

₁₈Nalilahla Lidvwala lelaba nguyihlo kini,

namkhohlwa Nkulunkulu lowanitala.

₁₉“Simakadze wakubona loko, wabalahla,

ngobe abetfukutseliswe

ngemadvodzana nemadvodzakati akhe.

₂₀Watsi: ‘Ngiyawubufihla buso bami kubo,

ngibone kutsi siphetfo sabo kutawuba yini.

Ngobe basitukulwane lesigwegwile,

bantfwana labangaketsembeki.

₂₁Bangenta ngaba nesikhwele

ngalokungesiye nkulunkulu.

Bangitfukutselisa

ngetithico tabo letingenamsebenti.

Ngiyawubenta babe nemona

ngalabo labangesiso sive.

Ngiyawubatfukutselisa ngesive lesingenakucondza.

₂₂Ngobe umlilo uphembeke ngentfukutselo yami,

umlilo lovutsa ufike phansi

ekujuleni endzaweni yalabafile.

Uyawudla umhlaba kanye netivuno tawo,

ulumeke umlilo etisekelweni tetintsaba.

₂₃“ ‘Ngiyawubutsisa tehlakalo etikwabo

ngibafumbe ngemicibisholo yami.

₂₄Ngiyawubahlasela ngendlala lephundlako,

namashaya acotfule wetifo letibulalanako,

kanye netijeziso letibulalako.

Ngiyawubahlasela ngetidladla tetilwane tesiganga,

nangesihlungu setindlondlo

letintjuma elutfulini.

₂₅Esitaladini inkemba iyawubenta

babe ngulabangenabantfwana.

Emakhaya abo kuyawubusa luvalo.

Emajaha netintfombi kuyawubhubha,

emakhehla netinswane kuphele.

₂₆Ngatsi ngiyawubasakata,

ngesule nekukhunjulwa kwabo

etingcondvweni tebantfu.

₂₇Kodvwa ngakwesaba kucolosha kwesitsa,

funa sitsa singacondzisisi kahle, bese sitsi:

“Sandla sami sincobile

akukentiwa nguSimakadze konkhe loku.” ’

₂₈“Basive lesite ingcondvo,

kute kubo kwehlukanisa lokubi nalokuhle.

₂₉Kube mane bebangahlakanipha,

bakucondze loku, bakhanyelwe

kutsi siphetfo sabo sitakuba yini!

₃₀Kodvwa indvodza yinye ingawacosha kanjani

emadvodza layinkhulungwane,

nome-ke lamabili acoshe emadvodza

latinkhulungwane letilishumi,

ngaphandle kwekutsi Lidvwala labo libatsengisile,

ngaphandle kwekutsi Simakadze ubanikele kubo?

₃₁Ngobe lidvwala labo alifanani neLidvwala letfu,

ngisho netitsa tetfu tiyakuvuma loko.

₃₂Umvini wabo uphuma emvinini waseSodoma

nasemasimini aseGomora.

Emagelebisi abo agcwele shevu,

netitfungo tabo ticuketse kubaba.

₃₃Liwayini labo lisihlungu setinyoka,

sihlungu lesibulalako semfeti.

₃₄“Loku angikakugcini yini esilulwini,

ngakubeka luphawu etingungwini tami?

₃₅Kuphindzisela kwami;

ngimi loyawutibuyiselela.

Ngesikhatsi lesikahle

lunyawo lwabo luyawushelela.

Lilanga labo lekuhlupheka selisedvute,

kubhujiswa kwabo kuyabahlasela.”

₃₆ Simakadze uyawusehlulela sive sakhe.

Unesihawu etincekwini takhe,

nase abone kutsi emandla ato aphelile,

sekute namunye losasele,

sigcili nome lokhululekile.

₃₇Uyawutsi: “Manje sebaphi bonkulunkulu babo,

lelo lidvwala lababephephele kulo.

₃₈Sebaphi bonkulunkulu

labadla emanoni emihlatjelo yabo,

banatsa liwayini leminikelo yabo yekunatsa?

Abavuke batenisita!

Ababe sivikelo senu, banivikele!

₃₉“Bonani-ke manje kutsi Ngimi leNginguye,

kute lomunye nkulunkulu ngaphandle kwami.

Ngiyisa ekufeni, ngibuyise ekuphileni;

ngilimatile ngiyawuphilisa futsi.

Kute longakhulula lutfo esandleni sami.

₄₀Ngiphakamisela sandla sami ezulwini,

ngimemetele ngitsi:

‘Njengobe ngiphila kuze kube phakadze,

₄₁nangilola inkemba yami lekhaliphako

ngiyibambe ngesandla sami nangehlulela,

ngiyakuphindzisela etitseni tami,

ngitiphindzisele kulabo labangitondzako.

₄₂Imicibisholo yami ngiyakuyenta idzakwe yingati,

ngesikhatsi inkemba yami idla inyama,

ingati yalabagwaziwe nalabatfunjiwe,

tinhloko tebaholi betitsa.’ ”

₄₃Jabulani nine tive kanye nesive sakhe,

ngobe uyawutiphindzisela ngengati yetinceku takhe.

Uyawutiphindzisela etitseni takhe,

ente inhlawulo yekubuyisana

nelive lakhe nesive sakhe.