Eksodusi 16

₁Sonkhe sive sema-Israyeli sesuka e-Elimu. Kwatsi ngelilanga leli-15 enyangeni yesibili siphumile eGibhithe, sefika ehlane laseSini, emkhatsini we-Elimu neSinayi. ₂Sonkhe sive sema-Israyeli sakhonona sisola boMosi na-Aroni ehlane. ₃Sakhuluma kubo satsi: “Sifisa shangatsi ngabe Simakadze wamane wasibulalela khona le eGibhithe, ngobe phela lapho besitihlalela phansi ngasemabhodweni, bese sidla inyama nekudla ngekutsandza kwetfu. Kodvwa nisiletse lapha ehlane kutewusibulala ngendlala sonkhe lesive.”

₄Simakadze wakhuluma kuMosi, watsi: “Lalela la! Ngitanehlisela imvula yesinkhwa lesivela ezulwini. Onkhe emalanga ekuseni bantfu kufanele baphume bayewutibutsela kudla lokwanele lilanga lonkhe. Ngalendlela-ke ngitawube ngiyabavivinya kutsi batawuyilandzela yini imiyalo yami nome cha. ₅Ngelilanga lesitfupha babotilungiselela kubutsa kudla lokulingene emalanga lamabili.”

₆Ngako-ke boMosi na-Aroni bakhuluma kuma-Israyeli onkhe, batsi: “Lamuhla kusihlwa nitawukwati kahle kutsi nguSimakadze lowanikhipha eveni laseGibhithe. ₇Kusasa ekuseni nitawubona inkhatimulo yebukhona baSimakadze, ngobe ukuvile kukhonona kwenu ngaye. Tsine besiyini nje kutsi ningakhonona ngatsi?” ₈Mosi wachubeka watsi: “Simakadze utanipha inyama kusihlwa, ekuseni aniphe sinkhwa lesenele, ngobe sewukuvile kukhonona kwenu. Tsine siyini nje? Phela anikhononi ngatsi, kodvwa nikhonona ngaSimakadze.”

₉Mosi wakhuluma ku-Aroni, watsi: “Khuluma kubo bonkhe labantfu ubatjele utsi: ‘Sondzelani embikwaSimakadze, ngobe ukuvile kukhonona kwenu.’ ” ₁₀Watsi Aroni asakhuluma kubo, bagucuka babuka ngasehlane babona inkhatimulo yebukhosi baSimakadze ibonakala efini. ₁₁Simakadze wakhuluma kuMosi watsi: ₁₂“Ngikuvile kukhonona kwebantfu baka-Israyeli. Batjele utsi: ‘Kusihlwa nitawudla inyama, ekuseni nibe nenala yesinkhwa. Nitawukwati-ke kutsi mine nginguSimakadze longuNkulunkulu wenu.’ ”

₁₃Kusihlwa kwefika lifu letigwaca, lasibekela yonkhe inkambu; ekuseni kwalala ematolo yonkhe indzawo ngasenkambu. ₁₄Atsi kube ahamuke ematolo, kwasala emacebelengwane lamancane phansi lapho ehlane; kwakucolisakele kutintfwatfwasi letifanana nesitfwatfwa. ₁₅Atsi ema-Israyeli kube akubone loko, akhuluma abutana odvwana atsi: “Yini lena?” ngobe abengati kutsi kuyini.

Mosi wabaphendvula, watsi: “Sinkhwa lenisiphiwe nguSimakadze kutsi nisidle. ₁₆Ngiko loko Simakadze lakhulume ngako, atsi: ‘Ngulowo nalowo akatibutsele loko lokungamenelisa, lekungemalitha langaba mabili umuntfu amunye, kulowo nakulowo mndeni.’ ”

₁₇Ema-Israyeli enta njalo; lamanye abutsa kwaba kunyentana, lamanye abutsa kwaba kuncane. ₁₈Batsi nase bakukala ngesikali lesingemalitha labengaba mabili, bakhandza kutsi lobekabutse kakhudlwana akasalelwanga lutfo, nalobekabutse kancane akazange eswele. Ngulowo nalowo bekabutse loko bekakudzinga. ₁₉Mosi wakhuluma kubo watsi: “Akubete loshiyela likusasa lokudla.” ₂₀Kodvwa abazange bamlalele Mosi; labanye lokudla bakushiyela likusasa. Kwatsi kusa, lokudla kwabe sekuphetfuka tibungu, kunuka bumunyu; Mosi wabatfukutselela. ₂₁Onkhe emalanga ekuseni lowo nalowo watibutsela loko abekudzinga kuphela. Lalitsi lingaphakama lilanga, bese kuyancibilika.

₂₂Ngelilanga lesitfupha babutsa kudla kwemalanga lamabili, emalitha labengaba mane umuntfu amunye. Bonkhe baholi bema-Israyeli beta kuMosi, bafike bamlandzisa ngalendzaba, ₂₃wase ukhuluma kubo utsi: “Simakadze uyale watsi: ‘Kusasa lilanga lekuphumula, liSabatha lelingcwele kuSimakadze. Yosani loko lenifuna kukosa, nipheke loko lenifuna kukupheka. Lokusele nikushiyele likusasa.’ ” ₂₄Ngako benta njengobe Mosi abebayalile ngekutsi lokunye bakubekele likusasa, akuzange kuphetfuke tibungu, akunukanga nebumunyu. ₂₅Mosi wakhuluma kubo watsi: “Kudleni lamuhla, ngobe lamuhla liSabatha kuSimakadze. Ningeke nikutfole etsafeni. ₂₆Kudla niyakukubutsa emalanga lasitfupha, kodvwa ngelilanga lesikhombisa, lekuliSabatha, kuyawubate.”

₂₇Ngelilanga lesikhombisa labanye bantfu baphuma bayawubutsa, kodvwa abazange batfole lutfo. ₂₈Simakadze wakhuluma kuMosi watsi: “Kuyawuze kube ngunini nala kugcina imiyalo nemitsetfo yami? ₂₉Bukani la! Mine Simakadze ngininike liSabatha, ngiko nje ngelilanga lesitfupha ngitaboninika kudla lokwanele emalanga lamabili. Ngulowo nalowo kufanele ahlale endlini kakhe angaphumi, ngalelilanga lesikhombisa.” ₃₀Ngako-ke bantfu baphumula ngelilanga lesikhombisa. ₃₁Ema-Israyeli lokudla akwetsa libito atsi “yimana.” Kwakufanana nenhlanyelo lencane lemhlophe, kunambitseka njengemicatsane leyentiwe ngeluju. ₃₂Mosi wakhuluma watsi: “Simakadze ukhulume watsi: ‘Nibolondvolota imana lengagcwala emalitha langaba mabili, niyilondvolotele titukulwane tenu, kuze tibone kudla lenganondla ngako ehlane, nanginikhipha eveni laseGibhithe.’ ” ₃₃Mosi wakhuluma ku-Aroni watsi: “Tsatsa lijeke, ufake emalitha langaba mabili emana, uyibeke embikwaSimakadze, kuze ilondvolotelwe titukulwane tetfu.” ₃₄Aroni wenta njengobe Mosi abeyalwe nguSimakadze. Wayibeka embikwelibhokisi lesivumelwane, khona itawulondvoloteka kahle. ₃₅Ema-Israyeli aphila ngekudla imana iminyaka lengema-40, adzimate efika eveni lelalakhelwe bantfu; adla imana adzimate efika emnyeleni welive laseKhenani. ₃₆Lesilinganiso lesasisemtsetfweni sasingemalitha labengaba ngema-20.