Eksodusi 39

₁Batfunga tembatfo letihlotjiswe kahle tebaphristi ngensontfo leluhlata njengesibhakabhaka, nalebukhwebeletane, nalebovu ngalokutopele, lekwakufanele batembatse nabakhonta endzaweni lengcwele. Batfunga tembatfo letingcwele ta-Aroni, njengobe Simakadze abeyale Mosi.

₂Benta sidziya ngemtiya welineni lecolisakele nangensontfo leluhlata njengesibhakabhaka, nalebukhwebeletane, nalebovu ngalokutopele, naleyigolide. ₃Bakha ngcwengcwe ngegolide, base bamsika imicwana yekwelukwa kanye nemitiya yelineni lecolisakele nensontfo leluhlata njengesibhakabhaka, nalebukhwebeletane, nalebovu ngalokutopele, umsebenti wengcweti lenebuciko. ₄Sidziya basenta saba nemichilo lemibili ngala nangale yekusibophela nekusihlanganisa emahlombe. ₅Lelibhande lelalelukiwe ngebungcweti leliselukhalweni balenta laba yintfo yinye nalesidziya, lentiwa ngemicwana yegolide, nensontfo lebukhwebeletane, naleluhlata njengesibhakabhaka, nalebovu ngalokutopele, nemitiya yelineni lecolisakele, njengobe Simakadze abeyale Mosi. ₆Benta ematje e-oniksi bawahlelisa bawephetsa ngegolide emaceleni, bawabhala ngekucopha emabito emadvodzana aJakobe. ₇Lamatje bawanamatsisela emichilweni yemahlombe yalesidziya, njengobe Simakadze abeshito kuMosi. Lamatje aba sikhumbuto ngemadvodzana aJakobe.

₈Batfunga sembatfo sesifuba ngebungcweti lobabusetjentiswe ekutfungeni sidziya; basitfunga ngalokuyigolide, nangalokubukhwebeletane, nangalokubovu ngalokutopele, nangemitiya yelineni lecolisakele, siphindvwe kabili sisikhwama. ₉Imihlubulo yaso yayilingana ndzawo tonkhe, umunye wawungemasentimitha labengaba ngema-22 budze, nemasentimitha labengaba ngema-22 bubanti. ₁₀Banamatsisela kuso imigca lemine yematje laligugu; emgceni wekucala banamatsisela isadiyusi, nethophazi, nerubhi; ₁₁emgceni wesibili banamatsisela simaragidu, nesafire, nedayimani; ₁₂emgceni wesitsatfu banamatsisela ihiyakinte, ne-agathe, ne-amethiste; ₁₃emgceni wesine banamatsisela ikhrisolithe, ne-oniksi, nejasiphi. Onkhe bawanamatsisela, base bawephetsa ngegolide. ₁₄Kulelo nakulelo litje kulawa lali-12 bekubhalwe ngekucopha libito lendvodzana yaJakobe. Ngulelo nalelo litje labekwa luphawu ngekucoshwa kwelibito lesive setive letili-12 taka-Israyeli. ₁₅Sembatfo sesifuba basentela imigaco leyayephotselwe njengentsambo leyelukiwe yegolide lecengekile. ₁₆Bephetsa ngemicu lemibili yegolide, base batfungela emajiva lamabili egolide emakoneni lamabili langetulu esembatfweni sesifuba. ₁₇Lemigaco lemibili yegolide bayibophela kulamajiva lamabili lasemakoneni esembatfo sesifuba. ₁₈Letinye tihloko talemigaco batibophela kulemiphetfo lemibili, ngalendlela taba ngembili emichilweni yemahlombe. ₁₉Benta emajiva lamabili egolide bawatfungela emakoneni lamabili langaphansi kulesembatfo sesifuba, ngekhatsi macondzana nesidziya. ₂₀Benta lamanye emajiva lamabili egolide, bawatfungela ngaphansi kulemichilo lemibili yesidziya, ngembili kwaso, eceleni kwemtfungo, ngetulu kwalelibhande lelelukwe kahle. ₂₁Babopha emajiva esembatfo sesifuba bawahlanganisa nemajiva esidziya ngentsambo leluhlata njengesibhakabhaka, loko kwenta kutsi sembatfo sesifuba sibe ngetulu kwelibhande, singaceki. Konkhe loko kwentiwa njengobe Simakadze abeyale Mosi.

₂₂Umjiva wonkhe longetulu kwalesidziya welukwa ngendvwangu leluhlata njengesibhakabhaka. ₂₃Imbobo yekufaka inhloko yephetfwa ngekugocotwa yatfungwa, khona ingetiwudzabuka. ₂₄Emphetfweni wawo ngaphansi bahlobisa ngekutsi batungeletise emahananandza lentiwe ngemtiya welineni lecolisakele nangensontfo leluhlata njengesibhakabhaka, nalebukhwebeletane, nalebovu ngalokutopele. ₂₅Bakha tinsimbi tegolide lecengekile, batitfungela emphetfweni wangaphansi kulomjiva tatungeleta, tabasemkhatsini walamahananandza. ₂₆Insimbi yalandzelwa lihananandza wonkhe umphetfo wemjiva, kuze kukhontwe ngawo, njengobe Simakadze abeyale Mosi.

₂₇Bo-Aroni nemadvodzana akhe babelukela babatfungela tingubo letingenamkhono ngendvwangu yelineni lecolisakele, ₂₈nemishuculo yenhloko, netincotfo tayo, nemibekelo yendvwangu yelineni lecolisakele, ₂₉nelibhande lelelukwe ngemtiya welineni lecolisakele, nangensontfo leluhlata njengesibhakabhaka, nalebukhwebeletane, nalebovu ngalokutopele; bakuhlobisa, njengobe Simakadze abeyale Mosi. ₃₀Benta ngcwengcwe ngegolide lecengekile, umhlobiso longcwele, base babhala kuye ngekucopha emagama latsi: “Kwehlukaniselwe Nkulunkulu.” ₃₁Longcwengcwe bambophela emshuculweni ngentsambo leluhlata njengesibhakabhaka; konkhe loko bakwenta njengobe Simakadze abeyale Mosi.

₃₂Bawenta bawucedza wonkhe umsebenti wekwakha lithende lekukhontela, lekulithende lekuhlangana. Ema-Israyeli akwenta konkhe Simakadze labeyale Mosi kutsi kwentiwe. ₃₃Baletsa kuMosi lithende lekukhontela nako konkhe lokuhambisana nalo: lithende, nemahhuka, netinsikabhaluko, nemakabha, netinsika, nemaseko; ₃₄nesimbonyo setikhumba tetihhanca letishukiwe taguculwa taba bovu; nesimbonyo setikhumba temahhashi aselwandle letishukwe kahle; nendvwangu levimbe libhokisi lesivumelwane; ₃₅libhokisi lesivumelwane lelalinetibhelekeca tematje, netimboko talo, nesihlalo semusa; ₃₆litafula nako konkhe lokuhambisana nalo nesinkhwa sebukhona; ₃₇lutsi lwetibane lwegolide lecengekile netibane talo, nalokuhambisana nalo, kanye nemafutsa ekukhanyisa; ₃₈lilati legolide, nemafutsa emgcobo, nemphepho lenuka kamnandzi, nendvwangu yelisango lelithende; ₃₉lilati lelitfusi, nemhlobiso walo welitfusi losasisefo, netimboko talo, nato tonkhe timphahla letihambisana nalelilati; nemgezelo nesibunu sawo; ₄₀netindvwangu tesibuya, netinsika, nemaseko ato, nendvwangu yemnyango wesibuya, netintsambo taso, netiphunti taso; netimphahla tonkhe telithende lekukhontela, lithende lekuhlangana, ₄₁netembatfo letihlotjiswe kahle letisetjentiswa ekukhonteni endzaweni lengcwele, lekutembatfo letingcwele ta-Aroni, umphristi, kanye netembatfo temadvodzana akhe, labatisebentisa nabenta inkonzo yabo yebuphristi.

₄₂Ema-Israyeli enta konkhe njengobe Mosi abeyalwe nguSimakadze. ₄₃Mosi wakuhlola konkhe wakubukisisa, wabona kutsi kwentiwe njengobe abelayelwe nguSimakadze. Ngako-ke Mosi wase uyababusisa.