Eksodusi 6

₁Simakadze watsi kuMosi: “Utawubona-ke nyalo lengitakwenta kuFaro. Utabakhulula bantfu bami bahambe ngenca yesandla lesinemandla; yebo, ngenca yesandla sami lesinemandla uyawubacosha besuke eveni lakhe.”

₂Nkulunkulu wakhuluma kuMosi, watsi: “NginguSimakadze. ₃Ngabonakala ku-Abrahama, naku-Isaka, nakuJakobe kutsi nginguNkulunkulu Somandla, kodvwa angizange ngibatise lelibito lami lelingcwele, Simakadze. ₄Ngaphindze ngenta sivumelwane sami kanye nabo, ngabetsembisa kutsi ngiyawubanika live laseKhenani, lapho babehlala khona njengetihambi. ₅Ngikuvile, futsi, kububula nekukhala kwesive sami ema-Israyeli lagcilatwe ngemaGibhithe; ngisikhumbulile sivumelwane sami. ₆Ngako-ke tjela ema-Israyeli utsi: ‘NginguSimakadze; ngitanikhulula kulokugcilatwa kwenu ngemaGibhithe. Ngengalo yami leyelulekile nangetento temandla lengiyawubajezisa ngato ngiyawunephula kubo. ₇Ngitanenta nibe sive sami, mine ngibe nguNkulunkulu wenu. Nine-ke niyawungati kutsi nginguSimakadze longuNkulunkulu wenu lowanikhipha ngaphansi kwelijoko laseGibhithe. ₈Ngitaningenisa eveni njengobe ngafunga ngekuphakamisa tandla kutsi ngitalinika bo-Abrahama, na-Isaka, naJakobe. Ngitanipha lona libe live lenu. NginguSimakadze.’ ” ₉Mosi wawatjela loko ema-Israyeli, kodvwa akazange amlalele, ngobe umoya wawo wawephulwe sihluku nekugcilatwa kwawo.

₁₀Simakadze wakhuluma kuMosi, watsi: ₁₁“Hamba utjele Faro, inkhosi yaseGibhithe, kutsi akakhulule ema-Israyeli aphume kulelive lakhe.”

₁₂Kodvwa Mosi waphendvula Simakadze, watsi: “Ingani ema-Israyeli akangilaleli; pho, Faro angangilalela kanjani? Angisilo libeka ekukhulumeni.”

₁₃Simakadze wakhuluma kuMosi na-Aroni, watsi: “Tjelani ema-Israyeli naFaro, inkhosi yaseGibhithe, kutsi nginitfume kutsi nihole ema-Israyeli aphume eGibhithe.”

₁₄Laba-ke baholi betive tabo: Emadvodzana aRubeni, labelitubulo la-Israyeli: bekuboHanoki, naPhalu, naHesroni, naKhami; leyo-ke bekungimindeni yakaRubeni. ₁₅Emadvodzana aSimeyoni bekuboJemuweli, naJamini, na-Ohadi, naJakhini, naSohari, naShawula, indvodzana yemKhenanikati; leyo-ke bekungimindeni yakaSimeyoni. ₁₆Lawa ngemabito emadvodzana aLevi: bekuboGeshoni, naKhohati, naMerari; leyo-ke bekungimindeni yakaLevi. Levi waphila wadzimate waba neminyaka leli-137 budzala. ₁₇Emadvodzana aGeshoni, ngemindeni yayo, bekuboLibni naShimeyi. ₁₈Emadvodzana aKhohati bekubo-Amramu, naJisihari, naHebroni, na-Uziyeli. Khohati waphila wadzimate waba neminyaka leli-133 budzala. ₁₉Emadvodzana aMerari bekuboMahali naMushi. Leyo-ke bekungimindeni yakaLevi kanye netitukulwane tayo.

₂₀Amramu watsatsa Jokhebedi, labengudzadzewaboyise; wamtalela Aroni naMosi. Amramu waphila wadzimate waba neminyaka leli-137 budzala. ₂₁Emadvodzana aJisihari bekuboKhora, naNefegi, naZikhri. ₂₂Emadvodzana a-Uziyeli bekuboMishayeli, na-Elsafani, naSithri.

₂₃Aroni watsatsa Elisheba, indvodzakati ya-Aminadabi, dzadzewaboNasoni. Wamtalela Nadabi, na-Abihu, na-Eleyazare, na-Ithamari. ₂₄Emadvodzana aKhora bekubo-Asiri, na-Elkhana, na-Abiyasafa; leyo-ke bekungimindeni yakaKhora. ₂₅Eleyazare, umsa wa-Aroni, watsatsa indvodzakati yaPhutiyeli; wamtalela Finehasi. Ngito leti-ke tinhloko tetindlu temaLevi ngemindeni yato.

₂₆Bo-Aroni naMosi ngibo lakhuluma kubo Simakadze, watsi: “Khiphani sive sema-Israyeli onkhe eveni laseGibhithe.” ₂₇Ngibo lababekhuluma naFaro, inkhosi yaseGibhithe, kutsi akakhulule sive sema-Israyeli siphume eGibhithe.

₂₈Mhlazana Nkulunkulu akhuluma kuMosi aseveni laseGibhithe, ₂₉watsi: “NginguSimakadze. Tjela Faro, inkhosi yaseGibhithe, konkhe loko lengikutjela kona.”

₃₀Kodvwa Mosi waphendvula Nkulunkulu watsi: “Nawe uyati kutsi angisilo libeka ekukhulumeni; pho, Faro angangilalela kanjani?”