Hezekeli 15

₁Livi laSimakadze lefika kimi, latsi: ₂“Ndvodzana yemuntfu, lukhuni lwemvini luncono ngani kunelweligala lalesinye nje sihlahla lesisehlatsini? ₃Lukhuni luke lutsatfwe yini kuwo kutsi kutekwentiwa ngalo intfo lenelusito? Bayawenta yini emahhuka ngawo ekulengisa timphahla? ₄Lutsi lungafakwa emlilweni njengelukhuni, nemlilo ulushise ngala nangale, luvutse ekhatsi nendzawo, luphindze lube nawo yini lomunye umsebenti? ₅Nangabe belungenamsebenti walutfo lusaphelele, belutawuba lusito kancane kangakanani-ke, nase lulunyekwe ngemlilo lwasha lwaphela?

₆“Ngako-ke naku lokushiwo yiNkhosi Simakadze, itsi: Njengobe nginike lukhuni lwemvini emkhatsini wetihlahla telihlatsi kutsi lubaswe emlilweni, ngiyawubaphatsa kanjalo-ke bantfu labahlala eJerusalema. ₇Ngiyawubhekisa buso bami ngakubo ngimelane nabo. Nome baphumile emlilweni, noko lomlilo usetawubacedza. Ngesikhatsi ngibhekisa buso bami ngakubo ngimelana nabo, niyawukwati-ke kutsi mine nginguSimakadze. ₈Ngiyawukwenta live libe lihlane, ngobe bebangaketsembeki, kusho iNkhosi Simakadze.”