Hezekeli 42

₁Lendvodza yangihola yangicondzisa ngasenyakatfo esibuyeni sangephandle, yangiyisa emakamelweni lamacondzana nelibala lelithempeli namalungana nelubondza lwangephandle ngasenyakatfo. ₂Lendlu leyayinemnyango lowawubheke ngasenyakatfo, yayingemamitha labengaba ngema-50 budze, nemamitha labengaba ngema-25 bubanti. ₃Kuyo yomibili lemihlubulo, umhlubulo lowawungemamitha labengaba lishumi, kanye nalomhlubulo lomalungana nesiyilo sesibuya sangephandle, lendlu yayinelitsala lelibhekene nelitsala etigabeni letintsatfu. ₄Embikwalamakamelo ayo bekunemhubhe wangekhatsi lowawungemamitha labengaba sihlanu bubanti, nemamitha labengaba ngema-50 budze. Iminyango yalemihubhe yayingasenyakatfo. ₅Lamakamelo langetulu abengumntjuntju, ngobe lamatsala abetsetse indzawo lenkhulu kuwo kunakulamakamelo langaphansi nakulawo lasemkhatsini waleyondlu. ₆Lamakamelo lasesitezi sesitsatfu abete tinsika njengaletibuya; abenetiyilo letincane kunetalawa labengaphansi netalawa labesemkhatsini. ₇Kwakunelubondza lwangephandle lolwalulinganise nalamakamelo nalesibuya sangephandle, lwalujuba embikwalamakamelo emamitha labengaba ngema-25 budze. ₈Loluhla lwemakamelo langasesibuyeni sangephandle lwalungemamitha labengaba ngema-25 budze, bese kutsi loluhla lolusedvutane nendzawo lengcwele lona lube ngemamitha labengaba ngema-50 budze. ₉Lamakamelo langaphansi wona abenemnyango ngasemphumalanga, nangabe umuntfu angena esuka esibuyeni sangephandle.

₁₀Ngaseningizimu kwelibala lelithempeli kugudla lubondza lwesibuya sangephandle, kwakunemakamelo labhekene nelubondza lwangephandle. Lamakamelo ₁₁abenemhubhe embikwawo, abefanana nalamakamelo langasenyakatfo; afanana ngebudze, nangebubanti, nangeminyango yekuphuma, nangebukhulu. Leminyango leyayingasenyakatfo ₁₂yayifanana ncamashi neyemakamelo langaseningizimu. Kwakunemnyango ekucaleni kwalomhubhe lowawulinganise nalolubondza lolwalushona ngasemphumalanga, lekwakungenwa ngawo emakamelweni.

₁₃Lendvodza yakhuluma kimi, yatsi: “Lamakamelo langasenyakatfo nangaseningizimu labhekene nelibala lelithempeli ngemakamelo langcwele ebaphristi, lapho baphristi labatakuya kuSimakadze batawufike badlele khona iminikelo lengcwelengcwele. Ngulapho-ke lapho bayawubeka khona iminikelo lengcwelengcwele: iminikelo yalokutinhlavu, neminikelo yesono kanye neminikelo yelicala, ngobe lendzawo ingcwele. ₁₄Batawutsi labaphristi bangangena kulendzawo lengcwele, bangabe basangena esibuyeni lesingephandle, bangakakhumuli tingubo labatembatsako nabakhontako, ngobe leti tingcwele. Kufanele bembatse letinye timphahla basengakasondzeli etindzaweni tebantfu.”

₁₅Yatsi kube icedze kukala lokungekhatsi ethempelini, yangikhipha ngelisango lelingasemphumalanga, yakala yonkhe leyo ndzawo ngephandle. ₁₆Yakala umhlubulo wangasemphumalanga ngendvuku yekukala; kwaba ngemamitha labengaba ngema-250. ₁₇Yakala umhlubulo wangasenyakatfo ngalendvuku yekukala; kwaba ngemamitha labengaba ngema-250. ₁₈Yakala umhlubulo wangaseningizimu ngalendvuku yekukala; kwaba ngemamitha labengaba ngema-250. ₁₉Yabe seyigucukela emhlubulweni wangasenshonalanga yalukala ngalendvuku yekukala; kwaba ngemamitha labengaba ngema-250. ₂₀Ngako yabe seyikala lendzawo kuyo yonkhe imihlubulo yomine. Yayinelubondza lolwaluyitungeleta, kwakungemamitha labengaba ngema-250 budze, nemamitha labengaba ngema-250 bubanti, lwehlukanisa lokungcwele kulokungengcwele.