Genesisi 11

₁Umhlaba wonkhe wawukhuluma lulwimi lunye lunemagama manye etintfo. ₂Batsi basahambahamba ngasemphumalanga, bakhandza litsafa eveni laseShinari, bafike bahlala khona. ₃Base bakhulumisana bodvwana, batsi: “Wotani, asente titini, sitishise.” Basebentisa titini esikhundleni sematje, nelitiyela esikhundleni seludzaka. ₄Batsi: “Wotani, sitakhele lidolobha, nembhoshongo lotawufikela ezulwini, sitentele ligama, sitekwatiwa, khona singetiwulahlekelana sisakateke nemhlaba wonkhe.”

₅Simakadze wehla atewubona lelidolobha nalombhoshongo lowawakhiwa bantfu. ₆Simakadze watsi: “Ase nibheke labantfu basive sinye, nelulwimi lunye; loku kusicalo saloko labatakwenta, kute labatawutsi nabatimisele kukwenta behluleke kukwenta. ₇Wotani, sehle, siyewusanganisa lulwimi lwabo, khona bangetiwuvana.” ₈Ngako Simakadze wabahlakata nemhlaba wonkhe, bayekela kulakha lelo dolobha. ₉Ngako-ke wetsiwa libito kwatsiwa yiBhabheli, ngobe Simakadze wasanganisa lulwimi lwemhlaba wonkhe. Kusuka lapho Simakadze bantfu wabasakata nemhlaba wonkhe.

₁₀Nati-ke titukulwane taShemi. Emvakweminyaka lemibili kwendlule zamcolo, Shemi abesaneminyaka lelikhulu, watala Aphakshadi. ₁₁Emvakwekutalwa kwa-Aphakshadi, Shemi waphila iminyaka lengema-500, watala emadvodzana nemadvodzakati.

₁₂Aphakshadi abesaneminyaka lengema-35, nakatala Shela. ₁₃Emvakwekutalwa kwaShela, Aphakshadi waphila iminyaka lengema-403, watala emadvodzana nemadvodzakati.

₁₄Shela abesaneminyaka lengema-30, nakatala Ebheri. ₁₅Emvakwekutalwa kwa-Ebheri, Shela waphila iminyaka lengema-403, watala emadvodzana nemadvodzakati.

₁₆Ebheri abesaneminyaka lengema-34, nakatala Phelegi. ₁₇Emvakwekutalwa kwaPhelegi, Ebheri waphila iminyaka lengema-430, watala emadvodzana nemadvodzakati.

₁₈Phelegi abesaneminyaka lengema-30, nakatala Rehu. ₁₉Emvakwekutalwa kwaRehu, Phelegi waphila iminyaka lengema-209, watala emadvodzana nemadvodzakati.

₂₀Rehu abesaneminyaka lengema-32, nakatala Serugi. ₂₁Emvakwekutalwa kwaSerugi, Rehu waphila iminyaka lengema-207, watala emadvodzana nemadvodzakati.

₂₂Serugi abesaneminyaka lengema-30, nakatala Nahori. ₂₃Emvakwekutalwa kwaNahori, Serugi waphila iminyaka lengema-200, watala emadvodzana nemadvodzakati.

₂₄Nahori abesaneminyaka lengema-29, nakatala Thera. ₂₅Emvakwekutalwa kwaThera, Nahori waphila iminyaka leli-119, watala emadvodzana nemadvodzakati.

₂₆Thera waphila iminyaka lengema-70, watala telamani bo-Abrama, naNahori, naHarani.

₂₇Nati-ke titukulwane taThera: Thera abenguyise wa-Abrama, naNahori, naHarani. Harani abenguyise waLoti. ₂₈Harani wafa kucala kuneyise, Thera; wafela eveni latalelwa kulo, i-Uri yemaKhaledi. ₂₉Bo-Abrama naNahori batsatsa bafati. Libito lemka-Abrama kwakunguSarayi; libito lemkaNahori kwakunguMilkha, indvodzakati yaHarani, uyise waMilkha naJiskha. ₃₀Sarayi abeyinyumba, ate bantfwana.

₃₁Thera watsatsa Abrama, indvodzana yakhe, naLoti, umtukulu wakhe umsa waHarani, namalukatana wakhe Sarayi, labengumka-Abrama, umsa wakhe, wahamba nabo esuka e-Uri yemaKhaledi, bacondze eveni laseKhenani. Batsi kube befike eHarani, bakha khona. ₃₂Thera wafela lapho eHarani asaneminyaka lengema-205.