Genesisi 49

₂“Hlanganani ndzawonye, nive,

nine madvodzana aJakobe;

nilalelisise ku-Israyeli, uyihlo.

₃“Rubeni, wena ulitubulo lami, nemandla ami,

ngabona ngawe kutsi nami ngiyindvodza.

Uyingcwele ngesitfunti

nengcwele ngemandla.

₄Njengobe uyaluka njengemanti nje,

kodvwa utawulahlekelwa kuba yingcwele kwakho,

ngobe walala nenyoko lomncane,

wangcolisa umbhedze wami.

₅“Simeyoni naLevi nine ningematse nelulwimi,

tinkemba tenu tekususa lutfutfuva.

₆Shangatsi ngingete ngatingena tindzaba tenu,

ngingeke ngihlanganyele nani,

ngobe nitsi ningatfukutsela

nibulale bantfu ngebudlova benu,

nigawule imisipha yetinkhomo.

₇Intfukutselo yenu ayicalekiswe,

ngobe iyesabeka;

nelulaka lwenu lucalekiswe,

ngobe lunelunya.

Niyawusakateka nalo lonkhe lakaJakobe,

nicitseke nalo lonkhe laka-Israyeli.

₈“Juda, bomnakenu bayakukudvumisa.

Titsa takho uyawutibamba ngentsamo;

emadvodzana eyihlo ayawukukhotsamela.

₉Juda ufanana neliwundlu lelibhubesi,

ndvodzana yami, usukile enyamataneni loyibulele

wabuyela esikhundleni sakho,

waguca, walala njengelibhubesi

nanjengelibhubesikati,

ngubani nje longahle akucale?

₁₀Bukhosi bungeke busuke esandleni saJuda.

Titukulwane takhe tiyawubusa njalonjalo,

tive tiyakwetfula kuye timlalele.

₁₁Uyawuba nenala,

bantfu bayawubopha timbongolo tabo emivinini,

nematfole etimbongolokati tabo

emivinini lemihle.

Bayawugeza tingubo tabo ewayinini,

netembatfo tabo ewayinini lelibovu sangati.

₁₂Emehlo abo ayawuba bovu ngenca yeliwayini,

ematinyo abo ayawuba mhlophe ngenca yelubisi.

₁₃“Zebuloni uyakwakha elusentseni lwelwandle;

lusentse lwakakhe luyawuba sikhumulo semikhumbi,

umnyele wakakhe ubeseSidoni.

₁₄“Isakhari uyimbongolo lengumkhehlekhehle

leyalala emkhatsini wemitfwalo.

₁₅Watsi kube abone kutsi

lendzawo yekuphumula yinhle,

nekutsi lelive lihle,

wase uyagobondzela entela kwetfwala ngelihlombe,

waphoceleka kutsi asebente njengesigcili.

₁₆“Dani uyawumelela emalungela ebantfu bakhe,

bayawufanana naletinye tive taka-Israyeli.

₁₇Dani uyawuba yinyoka eceleni kwemgwaco,

abe yinyoka lenesihlungu eceleni kwendlela,

lehlalela kuluma titsendze telihhashi,

kuze umgibeli walo awe nyova.

₁₈“Simakadze, ngilindzele insindziso yakho.

₁₉“Gadi uyawuhlaselwa libutfo letigebengu,

kodvwa yena uyawuticosha.

₂₀“Live laka-Asheri liyawuba nesivuno lesikhulu.

Kudla kwalo kuyawufanela emakhosi.

₂₁“Naftali unjengenyamatane lekhululekile;

ukhuluma emavi lamnandzi.

₂₂“Josefa uligala lelitselako lemvini,

ligala lelitsela ngasemtfonjeni wemanti,

emagala akhe ayakhula acance lubondza.

₂₃Titsa takhe timhlasela ngalokwesabekako,

timcoshe ngebutjoki nangemicibisholo.

₂₄Kodvwa butjoki bakhe buhlala bucinile,

imikhono yakhe iciniswa

tandla taLonemandla waJakobe,

nguMelusi loliDvwala laka-Israyeli.

₂₅NguNkulunkulu weyihlo lokusitako.

NguNkulunkulu Somandla lotakubusisa

ngetibusiso tangetulu ezulwini,

nangetibusiso temfuyo netebantfwana.

₂₆Tibusiso teyihlo tinemandla

kunetibusiso letiphuma etintsabeni taphakadze,

tendlula ngisho nenala yasetintsabeni.

Shangatsi tonkhe letibusiso

tingehlela etikwaJosefa

nasebuntini lakhe lowehlukaniswa kubomnakabo.

₂₇“Bhenjamini uyimphisi lebefutelako;

ekuseni uchwaga lakuphangile,

entsambama akwabe loko lakuphangile.”