Isaya 15

Ngebusuku lekwabhujiswa ngabo i-Ari,

live lonkhe lakaMowabi laphela laba tindzala.

Ngebusuku lekwabhujiswa ngabo iKhiri,

live lonkhe lakaMowabi lasala selitindzala.

₂IDiboni seyenyukele ethempelini,

endzaweni lephakeme yekukhontela, kuyawukhala.

Sive sakaMowabi sikhalela iNebo neMedeba.

Tonkhe tinhloko tihhuliwe,

tonkhe tilevu tihhuliwe.

₃Etitaladini bembetse emasaka,

bakhala etikwetindlu,

bakhale nasetinkhundleni,

etihlatsini tabo kugeleta tinyembeti.

₄Bantfu baseHeshboni nebase-Eleyale bayakhala,

emaphimbo esililo sabo evakala khashane,

ngisho naseJahasi.

Ngako-ke nemabutfo emphi akaMowabi lahlomile ayakhala,

tinhlitiyo tawo tiyatfutfumela.

₅Inhlitiyo yami ikhalela Mowabi,

bantfu bakhe babaleka kuye bacondza eSowari,

labanye bacondza e-Eglathi Shelishiya.

Benyuka bahamba bakhala baya eLuhithi,

bahamba ngemgwaco baya eHoronayimu,

bakhaliswa kubhujiswa kwabo.

₆Emanti aseNimrimu omile,

netjani bubunile;

lokumilako sekuphele konkhe,

sekute lokuluhlata lokusasele.

₇Ngako leyo ngcebo yabo

bese bayitfolile bayibutsisa ndzawonye,

bayetfwala, bahamba nayo;

bayawushona ngale kwemfudlana wemabhabhabhulomu.

₈Kulila kwabo kuhaza ngesheya kwemnyele wakaMowabi.

Kukhala kwabo kuvakala e-Eglayimu,

kulila kwabo kuvakale eBheri Elimu.

₉Emanti aseDiboni agcwele ingati,

kodvwa iDiboni ngisetayengetela;

yebo, libhubesi kulabo lababaleka kaMowabi,

nakulabo labangimisalela kulelo live!