Sivumelwane lesingenamsebenti saseGibhithe
1Simakadze utsi:
“Maye kulabo bantfwana labanenkhani,
nakulabo labakha emasu langesiwo ami,
nakulabo labenta sivumelwane kungesiko ngaMoya wami,
bengete sono esonweni,
2labo labehlela entasi eGibhithe
babe bangakaceli kimi,
labafunana nelusito kuFaro kutsi abavikele,
nesitfunti saseGibhithe sekuphephela.
3Kodvwa siphephelo saFaro siyakunijabhisa,
sitfunti saseGibhithe siyakunitsela ngelihlazo.
4Nome banetiphatsimandla eSowani
netigijimi tabo tefika eHanesi,
5bonkhe bantfu bayawuba nemahloni
ngenca yebantfu labangenamsebenti kubo,
nalabangasiti ngalutfo nalabangaletsi lutfo
ngaphandle kwenjabhiso nendlisamahloni.”
6Livi lesembulo lelimacondzana netilwane taseNegevu:
Emancusa adzabula eveni lebulukhuni nenjabhiso,
live lemabhubesi lamadvuna nalamasikati,
lemabululu kanye netinyoka letindizako,
ayalidzabula etfwala imicebo yawo ngetimbongolo,
neminotfo yawo ngemalundza emakamela,
aya kuleso sive lesingenanzuzo,
7kuyo iGibhithe lengenalusito lwalutfo.
Ngako-ke ngiyibita ngekutsi nguRahabi, uMenti Welite.
Sive lesingalaleli
8Hamba nyalo uyekubabhalela esibhelekeceni,
kucophe encwadzini legocotwako,
kuze kutsi ngemalanga letako
kube bufakazi baphakadze.
9Babantfu labahlubukako,
bantfwana labanemanga,
nalabangafuni kulalela imiyalo yaSimakadze.
10Bakhuluma kubaboniswa batsi:
“Sale ningabe nisayibona imibono,”
nakubaphrofethi batsi:
“Sale ningabe nisasitjela tembulo talokungiko.
Sitjeleni tintfo letikitalakitanako,
phrofethani emanga.
11Yishiyeni lendlela,
nisuke kulomkhondvo,
niyekele nalokumelana natsi
ngaLongcwele waka-Israyeli!”
12Ngako-ke naku lokushiwo nguLongcwele waka-Israyeli, utsi:
“Ngobe niwalile lomlayeto,
netsembela kumcindzeteli,
natesekela ngekuyengwa,
13lesono lesi siyawuba ngangelubondza loluphakeme kini,
loseluklatuka ekhatsi selugobana,
lona lolusuke selutawuhhibika masinyane.
14Lutawucetuka tincetu njengeludziwo
loluphihlitwe ngelunya,
kangangekutsi emkhatsini wetincetu talo
ungeke sewutfole ngisho neludzengelo
lwekubutsa emalahle etiko,
nome nje lwekukhelela emanti emgodzini.”
15Naku lokushiwo yiNkhosi Simakadze, Longcwele waka-Israyeli, utsi:
“Ekuphendvukeni nasekuphumuleni
ngulapho kunensindziso yenu khona;
ekuthuleni nasekwetsembeni
ngulapho kunemandla enu khona;
kodvwa ningeke nitsandze lutfo lwako.
16Natsi nine: ‘Cha, tsine sitawubaleka ngemahhashi.’
Ngako-ke nitawubaleka!
Nine natsi: ‘Sitawugibela emahhashini
lagijimisa kwembane.’
Ngako-ke laba labanicoshako nabo
bayawugijimisa kwembane!
17Inkhulungwane iyawubaleka
icoshwe kwetfuswa ngumunye nje,
ngekusonga kwalabasihlanu
niyawubhedvuka nonkhe nibaleke,
nize nisale seninjengesibhonga lesisiboniso
lesisele esicongweni sentsaba,
nanjengendvwangu lephakanyiswe egcumeni.”
18Noko Simakadze ulangatelela kangaka
kutsi abe nemusa kini.
Uyaphakama kutsi anihawukele,
ngobe Simakadze nguNkulunkulu
lowehlulela ngemtsetfocotfo.
Babusisiwe bonkhe labalindzela yena.
Nkulunkulu uyakusibusisa sive sakhe
19Awu, bantfu baseSiyoni, nine lenihlala eJerusalema, anisayikubuye nilile. Maye, uyawuba nemusa kini, nanikhala kuye nicela lusito! Uyakwenelela kuva nje, bese uyaniphendvula. 20Naloku Simakadze anipha sinkhwa sekuhlupheka nje, nemanti etinhlungu, bafundzisi benu abasayikufihlakala, seniyakubabona ngemehlo enu enyama. 21Nome nijikela ngesekudla nome ngesancele, tindlebe tenu tiyakuva livi emvakwenu litsi: “Nansi indlela, hambani ngayo.” 22Niyawube seniyatedzelela letithico tenu letembeswe ngesiliva, naletitfombe tenu letimbonywe ngegolide, niyakutilahla khashane, kube shangatsi tidvwedvwe letingcolile, nitsi kuto: “Sukani la.”
23Utawubuye anitfumelele imvula ngenca yenhlanyelo yenu leseniyihlanyele phansi emhlabatsini, kudla lokuphuma emhlabatsini kutawunona, futsi kube kunyenti. Ngalelo langa tinkhomo tenu tiyawukudla emadlelweni labanti nalaluhlata. 24Tinkhabi netimbongolo letiwusebentako lomhlaba tiyakudla lifolishi neluhlata lolwendlalwe ngetimfologo nangemafosholo. 25Ngalelo langa lekuhlaba lokukhulu, ngesikhatsi nakuwa imibhoshongo, imifudlana yemanti iyawugobhota kuto tonkhe tintsaba letiphakeme, nakuwo onkhe emagcuma lamadze. 26Inyanga iyawukhanya njengelilanga, nekukhanya kwelilanga kuyawuphindvwa kasikhombisa, ngangekukhanya kwemalanga lagcwele lasikhombisa, ngesikhatsi Simakadze nakabopha emanceba esive sakhe, elapha tilondza letavetwa nguye.
Nkulunkulu uyawujezisa i-Asiriya
27Bukani, Libito laSimakadze lichamuka khashane,
lita nelulaka loluvutsako
nangelifu lelimnyama lentfutfu,
tindzebe temlomo wakhe tigcwele lulaka,
nelulwimi lwakhe lungumlilo lodlako.
28Kuphefumula kwakhe kunjengesikhukhula
semanti lesigeletako,
nasikhuphuka size sifike ngasentsanyeni.
Unyakatisa tive esisefeni sakhe sembhubhiso;
ubeka emihlatsini yebantfu litomu
lekubaholela ekwedukeni.
29Niyawuhlabela njengalobo busuku
lenenta ngabo lidzili lelingcwele,
tinhlitiyo tenu tiyawujabula
njengesikhatsi bantfu bakhuphuka ngemintjingo,
bakhuphukela eNtsabeni yaSimakadze,
eDvwaleni lema-Israyeli.
30Simakadze uyakwenta bantfu kutsi
babuve bukhosi belivi lakhe,
uyawubabonisa kwehla kwemkhono wakhe
ngentfukutselo lekhephukako nangemlilo lodlako,
nangekucheketeka kwemafu,
nangekudvuma, nangesangcotfo.
31Livi laSimakadze liyawuphihlita i-Asiriya,
ngendvuku yakhe yebukhosi
uyakuyishaya ayilahle phansi.
32Kuyawutsi njalo indvuku yaSimakadze nayehlela e-Asiriya,
ngisho loluswati lwakhe lwekujezisa,
kuyawuhambisana nekushaywa kwemafahlawane nemahabhu,
asalwa nabo emphini ngengalo yakhe lematima.
33IThofethi seyalungiswa kadzeni,
yentiwa yalungela inkhosi.
Umgodzi wayo wemlilo sewagujwa
waba banti wabuye washona,
kwatfotwa netinkhuni letinyenti temlilo;
kuphefumula kwaSimakadze lokugeleta
njengemfula wesibabule lesivutsako
kuyakuyilumeka ivutse.
