Isaya 42

“Nayi-ke inceku yami, lengiyicinisako,

lokhetsiwe wami lengijabulako ngaye;

ngiyawubeka Moya wami kuye,

yena uyawuletsa umtsetfocotfo wami etiveni.

₂Angeke amemete, futsi ngeke akhale,

nome aphakamise livi lakhe etitaladini.

₃Umhlanga lofecekile ngeke awephule;

intsambo yesibane lebhunyako ngeke ayicime.

Ngekwetsembeka kwakhe uyawuletsa umtsetfocotfo,

₄ngeke angabate nome ajabhiswe,

aze emise umtsetfocotfo wami emhlabeni.

Tichingi tiyawubeka litsemba lato kulomtsetfo wakhe.”

₅Naku lokushiwo nguNkulunkulu longuSimakadze,

yena lowo lowadala emazulu, waweneka,

wendlala nemhlaba nako konkhe lokumila kuwo,

lonika kuphefumula kubantfu labakuwo,

nekuphila kulabo labahamba etikwawo, utsi:

₆“Mine, Simakadze, ngikubite ngekulunga,

ngiyawubamba sandla sakho.

Ngitawugcina ngikwente kutsi

ube sivumelwane sami nesive sami,

ube kukhanya kubetive,

₇uvule emehlo langaboni,

ukhulule tiboshwa ejele,

ubatfukulule emgodzini lolijele

labo labahlala ebumnyameni.

₈“NginguSimakadze; lelo libito lami!

Inkhatimulo yami ngingeke ngiyinike lomunye,

nome-ke ludvumo lwami etithicweni.

₉Buka la, tintfo takucala setentakele,

sengimemetela tintfo letinsha;

tisengakacali kubonakala ebaleni, senginatisa tona.”

₁₀Hlabelani ingoma lensha kuSimakadze,

netibongo takhe

kusukela emikhawulweni yemhlaba,

nine lenintjweza ngemikhumbi elwandle,

nako konkhe lokukulo,

nine tichingi,

nani nonkhe lenihlala kuto.

₁₁Lihlane nemadolobha alo

akuphakamise emaphimbo ako;

tabelo, lapho kuhlala khona bakaKhedari, atijabule.

Bantfu baseSela abahlabele ngekujabula,

abamemete baseticongweni tetintsaba.

₁₂Abanike Simakadze ludvumo,

bamemetele ludvumo lwakhe etichingini.

₁₃Simakadze utawushuca njengendvodza lenemandla,

njengelisotja uyawuchukuluta inshisekelo yakhe;

uyawumemeta ahlabe inyandzaleyo,

titsa takhe atehlule.

“Sesikhatsi lesidze ngibindzile,

bengibindzile, ngitibambile.

Kodvwa nyalo,

njengemfati nakabeleka,

ngiyakhala, ngiyacucumuka.

₁₅Ngitawucitsa tintsaba nemagcuma,

ngomise konkhe lokumila kuto,

ngitawugucula imifula ibe tichingi,

ngomise emachibi.

₁₆Labatimphumphutse ngitabahola

ngetindlela labangazange batati,

ngibahole ngetindlela letingakavami.

Bumnyama ngitabenta bube kukhanya embikwabo,

ngente tindzawo letimagebhugebhu tibe ngematsafa.

Leti tintfo lengitawutenta;

ngingeke ngitiyekele.

₁₇Kodvwa labo labetsembele etithicweni,

labakhuluma etitfombeni batsi:

‘Nine nibonkulunkulu betfu,’

bayawuncandzekiswa bajabhile bahlazeke kakhulu.”

₁₈“Vanini, nine tihhulu;

bukani, nine timphumphutse, nibone!

₁₉Ngubani loyimphumphutse ngaphandle kwenceku yami?

Ngubani losihhulu njengesitfunywa lengisitfumako?

Ngubani loyimphumphutse njengalotinikele kimi,

loyimphumphutse njengenceku yaSimakadze?

₂₀Ubone tintfo letinyenti,

kodvwa awukanaki,

tindlebe takho tivulekile,

kodvwa awuva lutfo.”

₂₁Kwamjabulisa Simakadze ngenca yekulunga kwakhe

kutsi ente umtsetfo wakhe ube mkhulu,

futsi ube neludvumo.

₂₂Kodvwa lesi sive lesiphangiwe sabuye sahlutjulwa,

bonkhe babambeke emigodzini nome bafihlakele emajele.

Sebayimphango,

kute nalongabephula;

bentiwe baba yimphango,

kwabate nalotsi:

“Bancandzeni.”

₂₃Ngubani emkhatsini wenu lotawulalela loku

akunakisise kulesikhatsi lesitako?

₂₄Ngubani lowanikela Jakobe kutsi abe yimphango,

wanikela Israyeli kubaphangi?

Kwakungesiye yini Simakadze lesone kuye?

Ngobe abazange bahambe ngetindlela takhe,

abazange bawulalele umtsetfo wakhe.

₂₅Ngako watfululela etikwabo intfukutselo yakhe levutsako,

nebudlwangudlwangu bemphi.

Yabasibekela ngemalangabi,

noko abazange bacondze;

yabadla, kodvwa abakufakanga enhlitiyweni.