Isaya 45

₁“Naku lokushiwo nguSimakadze

kulogcotjiwe wakhe, kuKhuresi,

lengibambe sandla sakhe sangasekudla,

ngentela kwehlula tive embikwakhe,

ngemuke emakhosi tikhali tawo,

ngivule neminyango embikwakhe,

kuze emasango angetiwuvalwa, ngitsi kuye:

₂Ngiyawuhamba embikwakho

ngente tintsaba tibeke.

Ngiyakwephula emasango elitfusi,

ngijube imigcala yetinsimbi lengimishudvo.

₃Ngiyawukunika ingcebo yebumnyama,

bunjinga lobubekwe etindzaweni letiyimfihlo,

khona utewukwati kutsi mine nginguSimakadze,

Nkulunkulu wema-Israyeli,

lokubita ngelibito lakho.

₄Ngenca yaJakobe, inceku yami,

Israyeli lokhetsiwe wami,

ngikubita ngelibito lakho

ngikunika libito leludvumo,

noko wena awungemukeli.

₅NginguSimakadze,

futsi kute lomunye,

ngaphandle kwami kute Nkulunkulu;

ngiyawukuhlomisa, wena ungakangemukeli nje,

₆khona kutewutsi kusukela emphumalanga

kuze kube ngusenshonalanga,

tive tati kutsi kute lomunye ngaphandle kwami.

NginguSimakadze,

futsi kute lomunye.

₇Ngenta kukhanya, ngidale bumnyama,

ngiletsa lokuhle, ngidale lokubi,

mine Simakadze, ngitenta tonkhe letintfo.”

₈“Nisani kulunga, nine mazulu lasetulu;

emafu akakutfululele phansi.

Umhlaba awuvuleke kabanti,

insindziso ayihlume,

kulunga akukhule nayo;

mine, Simakadze, ngikudalile.

₉Maye kulowo lolwa neMenti wakhe,

kuye lowo loludzengelo nje

emkhatsini wetindzengelo temhlaba.

Libumba like lisho yini kumbumbi walo

litsi: ‘Ubumbani?’

Umsebenti wakho ungake usho yini utsi:

‘Ute tandla’?

₁₀Maye kulowo

lotsi kuyise: ‘Utele ini?’

nome kunina atsi: ‘Yini lena loyitele?’

₁₁“Naku lokushiwo nguSimakadze,

Longcwele waka-Israyeli, neMenti wakhe, utsi:

Macondzana netintfo letitako,

niyangibuta yini ngebantfwabami,

nome ningibekele umtsetfo

ngemsebenti wetandla tami?

₁₂Ngimi lowenta umhlaba,

ngadala nebantfu bonkhe labahlala kuwo.

Tandla tami taweneka emazulu,

ngalawula nemabutfo awo etinkhanyeti.

₁₃Ngiyawuvusa Khuresi ngekulunga kwami;

ngiyakwenta tonkhe tindlela takhe ticondze.

Uyawulakha kabusha lidolobha lami,

akhulule labatfunjiwe bami,

kodvwa loko akwente ngaphandle kwentsengo nemvuzo,

kusho Simakadze longuSomandla.”

“Umkhicito waseGibhithe nalokuhwebiwe kwaseKushe,

kanye nalawo maSeba,

bantfu labadze,

kuyawuta kuwe kube kwakho, Siyoni,

bayawuhamba badzembuluka emvakwakho,

bete kuwe baboshwe ngetinketane.

Bayawukhotsama embikwakho bakuncenge, batsi:

‘Ngempela Nkulunkulu unani, futsi kute lomunye,

kute lomunye Nkulunkulu.’ ”

₁₅Ngempela unguNkulunkulu lotifihlako,

awu, Nkulunkulu, neMsindzisi wema-Israyeli.

₁₆Bonkhe babumbi betithico

bayawuhlaziswa, bahlazeke;

bayawulahlwa badliwe ngemahloni kanyekanye.

₁₇Kodvwa Israyeli uyawusindziswa nguSimakadze

ngensindziso yaphakadze;

ningeke nidliwe ngemahloni

nome nihlazeke phakadze naphakadze.

₁₈Ngobe naku lokushiwo nguSimakadze,

lowo lowadala emazulu, unguNkulunkulu,

lowo lowadala wabumba umhlaba, wawusekela;

akazange awudalele kutsi ubete lutfo,

kodvwa wawubumbela kutsi uhlale bantfu, utsi:

“NginguSimakadze, kute lomunye.

₁₉Angikakhulumi ekusitsekeni,

kulenye indzawo lelive lebumnyama.

Angikasho etitukulwaneni taJakobe, ngatsi:

‘Ngifuneleni lite.’

Mine, Simakadze,

ngikhuluma liciniso,

ngikhuluma loko lokulungile.”

₂₀“Butsanani ndzawonye, nite;

hlanganani, nine lenibaleke etiveni.

Abati lutfo labo labetfwala tithico tetingodvo,

bathandaze etithicweni letingeke tisindzise.

₂₁Shanoni loko lokutako, nikwetfule;

abelulekane kanyekanye.

Ngubani lowase wakhuluma ngaloku kungakenteki kadzeni,

wakukhuluma kusesekhashane endvulo?

Kwakungesimi yini, Simakadze?

Futsi kute lomunye Nkulunkulu ngaphandle kwami,

Nkulunkulu lolungile nalonguMsindzisi;

kute lomunye ngaphandle kwami.

₂₂“Buyani kimi, nisindziswe,

nonkhe nine mikhawulo yemhlaba;

ngobe nginguNkulunkulu,

futsi kute lomunye.

₂₃Ngitifunge mine,

umlomo wami ukhulume ngabo bonkhe bucotfo

livi lelingeke liphindze liguculwe, litsi:

Emadvolo onkhe ayawukhotsama embikwami;

tonkhe tilimi tiyawufunga ngami.

₂₄Bayawukhuluma ngami, batsi:

‘KuSimakadze kuphela kunekulunga nemandla.’ ”

Bonkhe labemelene naye

bayawuta kuye badliwe ngemahloni.

₂₅Kodvwa kuSimakadze

tonkhe titukulwane taka-Israyeli

tiyawusindziswa, futsi tiyawumdvumisa.