Isaya 54

₁“Hlabela, wena mfati loyinyumba,

wena longazange sewumtale umntfwana;

hlokoma uhlabele,

memeta ngekujabula,

wena longazange sewuhelwe,

ngobe banyenti bantfwana bemfati lolahliwe

kunebemfati lonendvodza,” kusho Simakadze.

₂“Yandzisa indzawo yelithende lakho,

yendlala tindvwangu telithende lakho,

ungatibambi, yelula tintsambo takho,

ucinise tikhonkhwane takho.

₃Ngobe utalendlalela ngesekudla nangesancele,

titukulwane takho tiyakudla emave etive,

tihlale emadolobheni ato latindzala.

₄“Ungesabi, ungeke ube nemahloni.

Ungakwesabi kuhlazeka, ngeke wehliswe.

Utalikhohlwa lihlazo lebusha bakho,

ungaphindzi uwakhumbule emahloni ebufelokati bakho.

₅Ngobe uMenti wakho yindvodza yakho,

nguSimakadze longuSomandla libito lakhe,

Longcwele waka-Israyeli unguMhlengi wakho,

ubitwa ngekutsi nguNkulunkulu wemhlaba wonkhe.

₆Simakadze uyawukubita ubuye,

kube shangatsi bewungumfati lolahliwe

nalodzabukile emoyeni,

umfati lowendza asemncane wabuye futsi waliwa,”

kusho Nkulunkulu wakho.

₇“Kwesikhashana nje ngakushiya,

kodvwa ngesihawu lesikhulu ngiyawukubuyisa.

₈Ngemfutfo wentfukutselo yami

ngakufihlela buso bami kwesikhashana,

kodvwa ngemusa waphakadze ngiyawuba nesihawu kuwe,”

kusho Simakadze uMhlengi wakho.

₉“Kimi loku kufanana nemalanga aNowa,

ngesikhatsi ngifunga kutsi emanti aNowa

angeke aphindze awumbonye umhlaba.

Ngako-ke manje sengifungile

kutsi ngingeke ngiphindze ngikutfukutselele,

ngingeke ngiphindze ngikutsetsise.

₁₀Nome tintsaba tingatanyatanyiswa nemagcuma esuswe,

noko lutsandvo lwami lolungapheli

lengikutsandza ngalo,

lungeke lutanyatanyiswe,

nesivumelwane sami sekuthula singeke sisuswe,”

kusho Simakadze lonesihawu kuwe.

₁₁“Awu, wena, dolobha lelihlushiwe

lashaywa tivunguvungu langete ladvudvutwa,

ngiyawukwakha ngematje lamahle,

tisekelo takho ngitakhe ngemasafire.

₁₂Imibhoshongo yakho ngiyakuyenta ngemarubhi,

emasango akho ngiwente ngematje lamanyatelako,

nato tonkhe tibondza takho ngitente ngematje laligugu.

₁₃“Bonkhe bantfu bakho bayawufundziswa nguSimakadze,

inhlalakahle nekuthula kwebantfwana bakho kuyawuba kukhulu.

₁₄Uyawusinyiswa ekulungeni:

Kubuswa ngelunya kuyawuba khashane nawe;

kute loyawukwesaba.

Luvalo luyawususwa lulahlwe khashane,

lungasondzeli kuwe.

₁₅Nakukhona lokuhlaselako,

kuyawube kungaveli kimi;

nome ngubani lokuhlaselako uyawutinikela kuwe.

₁₆“Buka la, ngimi lowadala umbumbi wetetinsimbi,

lovutsela emalahle kutsi abe lilangabi,

ente sikhali silungele umsebenti waso.

Futsi ngimi lowadala umbhubhisi

kutsi ente imbhubhiso;

₁₇kute sikhali lesilolelwa kulwa nawe

lesiyawuphumelela,

uyakuyicitsa yonkhe inkhulumo lekubeka licala.

Leli lifa letinceku taSimakadze,

loku ngukona kutivikela kwami,” kusho Simakadze.