Isaya 56

“Yentani umtsetfocotfo ningawuyekeleli,

nente lokulungile,

ngobe insindziso yami seyisedvute,

kulunga kwami kutakwembulwa masinyane.

₂Ubusisiwe umuntfu lokwentako loko,

umuntfu lobambelela kuko,

lowo logcina liSabatha angaloni,

abambe sandla sakhe singakwenti lokubi.”

₃Akubete wekuhamba losatibophele yena kuSimakadze,

lotsi: “Ngempela Simakadze

uyakungehlukanisa nesive sakhe.”

Akubete nemtsenwa lokhononako,

atsi: “Ngisihlahla nje lesomile.”

“Batsenwa labagcina emaSabatha ami,

bakhetsa kwenta lokungijabulisako,

babambelele esivumelwaneni sami,

₅labo ngiyakubanika sikhumbuto

ekhatsi ethempelini lami

nasemkhatsini wetibondza talo,

ngiyakubanika nelibito lelihle

kwengca emadvodzana nemadvodzakati.

Ngiyakubanika libito laphakadze,

libito lelingasoze laphela nakadzeni.

₆Betive labatibophela bona kuSimakadze

kutsi batemkhonta,

batsandze neLibito laSimakadze bakhonte yena,

bonkhe labagcina liSabatha bangaloni,

lababambelela esivumelwaneni sami,

₇labo ngiyakubayisa entsabeni yami lengcwele,

ngibanike kujabula endlini yami yekukhuleka.

Iminikelo yabo yekushiswa nemihlatjelo yabo

iyakwemukeleka elatini lami,

ngobe indlu yami iyawutsiwa

yindlu yemkhuleko yato tonkhe tive.”

₈INkhosi Simakadze,

lena lebutsa labatfunjiwe baka-Israyeli, itsi:

“Ngiyawubutsela kubo labanye

ngaphandle kwalabo lasebabutsiwe.”

₉Wotani, nonkhe nine tilwane tesiganga,

wotani nitewudla,

nonkhe nine tilwane telihlatsi!

₁₀Balindzi bema-Israyeli batimphumphutse,

bonkhe abati lutfo;

batigolwane,

abakwati ngisho nekutsi buku;

balibala kutsi bunyalala,

babhudze kuphela,

bayakutsandza kulala.

₁₁Batinja letitsandza kakhulu kudla, abesutsi.

Babelusi labangenakucondza,

bonkhe bajikela etindleleni tabo,

ngulowo nalowo bese utifunela kwakhe.

₁₂Ngulowo nalowo uyatikhalela atsi:

“Wotani, ngitalilandza liwayini!

Asinatseni tjwala njengekutsandza kwetfu!

Likusasa nalo litawuba njengalamuhla,

nome-ke libe ncono kakhulu!”