Isaya 64

₁Awu, shangatsi ungadzabula emazulu,

wehlele phansi.

Shangatsi tintsaba tingatfutfumela embikwakho!

₂Shangatsi kungafanana nemlilo nawulumekela tinsaba,

ushisise emanti aze abile!

Yehla, utekwenta kutsi titsa takho

tilati Libito lakho,

wente netive titfutfumele embikwakho!

₃Ngobe watsi nawenta tintfo letesabekako

lesasingazange sitilindzele, wehla,

tintsaba tatfutfumela embikwakho.

₄Kusukela kadzenidzeni kute lowase weva,

kute nendlebe leyase yeva,

kute liso lelase labona lomunye Nkulunkulu

ngaphandle kwakho,

lomelela labo labalindzele yena.

₅Uyabasita labo

labajabulela kwenta lokulungile,

labatikhumbulako tindlela takho.

Kodvwa tsine sachubeka sona,

wena wasitfukutselela.

Kepha siyawusindziswa kanjani?

₆Sonkhe sesifanana nebantfu labangcolile,

nato tonkhe tento tetfu letinhle

setifanana netidvwedvwe letingcolile.

Sonkhe siyabuna njengelicembe,

njengemoya tono tetfu tiyasiphephula.

₇Kute namunye lobita Libito lakho,

nome lotimisela kubambelela kuwe,

ngobe ubufihlile buso bakho kitsi,

wasicedza ngenca yetono tetfu.

₈Noko, wena Simakadze,

unguBabe wetfu.

Tsine silibumba, wena ungumbumbi,

sonkhe singumsebenti wetandla takho.

₉Awu Simakadze,

ungatfukutseli kwekwengca,

ungatikhumbuli tono tetfu phakadze naphakadze.

Awu, siyakuncusa, sibuke,

ngobe sonkhe sibantfu bakho.

₁₀Emadolobha akho langcwele asalihlane,

ngisho neSiyoni imbala seyilihlane,

iJerusalema iyincitsakalo.

₁₁Lithempeli letfu lelingcwele nalelikhatimulako,

lapho bobabemkhulu bebakukhonta khona,

selishiswe ngemlilo,

nako konkhe lebekuligugu kitsi

sekuyimfuhlululu nje.

₁₂Awu, Simakadze, emvakwako konkhe loku

utawuchubeka yini utibambe?

Wena utawuthula nje,

usijezise ngalokungetulu kwemandla etfu?