Sibonakaliso sa-Imanyuweli
1Kwatsi ngesikhatsi Ahazi, umsa waJothamu, umsa wa-Uziya, ayinkhosi yakaJuda, boResini, inkhosi yaseSiriya, naPhekha, umsa waRemaliya, inkhosi yaka-Israyeli, bashuca bayawulwa neJerusalema, kodvwa noko abazange bayehlule.
2Indlu yakaDavide yatjelwa kwatsiwa: “ISiriya itihlanganise nelaka-Efrayimu.” Ngako tinhlitiyo tabo-Ahazi kanye netebantfu bakhe tesaba tatfutfumela njengetihlahla telihlatsi, natinyakatiswa ngumoya.
3Simakadze wakhuluma ku-Isaya, watsi: “Phuma wena nemsa wakho Sheyari Jashubi niyewuhlangabeta Ahazi ngasemseleni wesitiba lesisenhla, emgwacweni loya eNsimini yeMgezi Wetingubo. 4Ubosho kuye utsi: ‘Caphela, uthule, ume sibindzi, ungaphelelwa ngemandla ngenca yaletiphintana letibili taletikhuni letishuncako, nangekuvutsa kwelulaka lwaResini nemaSiriya akhe nelwemsa waRemaliya. 5Siriya, na-Efrayimu, nemsa waRemaliya bakwakhela luzungu, batsi: 6“Asikhuphuke siyewuvimbetela lakaJuda silidzabule ekhatsi, sitehlukanisele lona, bese sibeka umsa waThabheyali kutsi abe yinkhosi etikwalo.” 7Kodvwa naku lokushiwo yiNkhosi Simakadze, itsi:
“ ‘Kungeke kwenteke, futsi kungeke kuphumelele.
8Ngobe inhloko yaseSiriya yiDamaseko,
nenhloko yeDamaseko nguResini kuphela.
Kusengakapheli iminyaka lengema-65,
baka-Efrayimu bayawube sebahlakateke kakhulu,
sebangasesiso sive.
9Inhloko yaka-Efrayimu yiSamariya,
nenhloko yeSamariya ngumsa waRemaliya kuphela.
Naningakemi nacina ekukholweni kwenu,
ningeke nisema nicinile.’ ”
10Simakadze wabuye wakhuluma ku-Ahazi, watsi: 11“Ticelele sibonakaliso kuSimakadze Nkulunkulu wakho, nome sibe ngulesisekujuleni nome-ke lesiphakeme njengelizulu.”
12Kodvwa Ahazi watsi: “Ngingeke ngisicele. Ngingeke ngivivinye Simakadze.”
13Isaya wase utsi: “Lalela lapha, wenandlu yakaDavide! Kuyini kini lokube solomane nihluphana netinhlitiyo tebantfu? Nyalo senifuna nekuhlupha Nkulunkulu wami yini kantsi? 14Ngako-ke, Nkulunkulu, yena cobo lwakhe, utawuninika sibonakaliso: Intfombi iyawukhulelwa itale indvodzana, yetsiwe libito kutsiwe ngu-Imanyuweli. 15Iyakudla tikhihli temasi netinyosi idzimate ikwati kwala lokubi ikhetse lokuhle. 16Kodvwa kuyawutsi lomfana asengakakwati kwala lokubi akhetse lokuhle, lelo live lalamakhosi lamabili lowesabako, liyawube selingasenalutfo. 17Simakadze uyawuletsa kuwe nasetikwesive sakini, nasetikwendlu yeyihlo, sikhatsi lesingazange sesibe khona kusukela baka-Efrayimu bahlephuka kubakaJuda; uyawuletsa inkhosi yase-Asiriya.”
18Ngalelo langa Simakadze uyawushaya inkwela abite timphungane letingasemifuleni yaseGibhithe kanye netinyosi taseveni lase-Asiriya. 19Tiyawubuya tonkhe titewubutsana etihosheni letehlelako kanye nasemifantfwini yemadvwala, nasetikwato tonkhe tihlahla temanyeva nasetimbotjeni tonkhe temanti. 20Ngalelo langa Simakadze uyawusebentisa insingo lecashwe ngesheya kweMfula, inkhosi yase-Asiriya, kutsi itewuhhula ngayo tinhloko tenu, kanye netiboya letisemilenteni yenu, isuse netilevu tenu. 21Ngalelo langa indvodza iyawufuya litfokati linye netimbuti letimbili. 22Ngenca yekutsi tiyawube tehlisa kakhulu, iyawuba netikhihli temasi letinyenti tekutondla. Bonkhe labayawube basele kulelo live bayawudla tikhihli temasi kanye netinyosi. 23Ngalelo langa kuto tonkhe tindzawo lapho kwakunenkhulungwane yemivini leyayingabita tinhlavu letiyinkhulungwane tesiliva, sekuyakwena kube netitfwetfwe nemanyeva. 24Emadvodza ayakuya lapho aphetse butjoki bawo nemicibisholo yawo, ngobe lelo live liyawube selene ngetitfwetfwe nangemanyeva. 25Mayelana nato tonkhe tintsatjana letake talinywa ngemakhuba etandla, ningeke nisaya kuto, ngenca yekwesaba titfwetfwe nemanyeva; setiyawuba tindzawo lapho kudla khona imihlambi yetinkhomo, kugcobagcobe khona netimvu.
