Isaya 9

₂Bantfu labahamba ebumnyameni

bakubonile kukhanya lokukhulu;

kulabo labahlala eveni lelitfunti lekufa

kukhanya sekuchamukile.

₃Sewusandzisile sive,

wandzisa nekujabula kwaso;

siyajabula embikwakho njengebantfu bajatjuliswa sivuno,

nanjengebantfu nabajatjuliswa kwaba imphango.

₄Ngobe njengasemihleni yekwehlulwa kwakaMidiyani,

ulifohlotile lelijoko belingumtfwalo kubo,

nemgcala losindzako lobewusemahlombe abo,

nendvuku yemcindzeteli wabo.

₅Tonkhe ticatfulo temasotja labetisebentisa emphini,

nato tonkhe tembatfo tawo

letibhucabhucwe engatini titawushiswa,

tibe kudla kwemlilo.

₆Ngobe tsine sitalelwe umntfwana,

siphiwe indvodzana.

Umbuso uyawubasemahlombe akhe.

Uyawutsiwa nguMeluleki Lomangalisako,

nguNkulunkulu Lonemandla,

nguBabe Waphakadze,

yiNkhosi Yekuthula.

₇Umbuso wakhe uyawukhula,

kuthula nenhlalakahle kungeke kuphele.

Uyawubusa esihlalweni sebukhosi saDavide,

nasembusweni wakhe.

Uyakuwumisa awusekele

ngekwemtsetfocotfo nangekulunga,

kusukela kuleso sikhatsi

kuze kube nguphakadze naphakadze.

Inshisekelo yaSimakadze longuSomandla

iyawukwenta loko.

₈Simakadze utfume livi

kuyewumelana nebakaJakobe,

liyakwehlela ku-Israyeli.

₉Bonkhe bantfu bayakulati,

baka-Efrayimu kanye nalabakhile eSamariya,

labakhuluma bachoshe,

basho nangekutigabatisa kwenhlitiyo, batsi:

₁₀“Titini tidzilikele phansi,

kodvwa tsine sitakwakha kabusha

ngematje labatwe kahle.

Tihlahla temakhiwa tigawuliwe,

kodvwa tsine sitatenana ngetihlahla temisedari.”

₁₁Kodvwa Simakadze ubacinisele titsa takaResini

kutsi tikwati kubhekana nabo, wahlohla titsa tabo.

₁₂EmaSiriya ngasemphumalanga

nemaFilisti ngasenshonalanga,

asakhamisele kushwabudzela ema-Israyeli.

Noko ngako konkhe loku

lulaka lwakhe alukagucuki;

sandla sakhe sisephakeme.

₁₃Kodvwa bantfu abakaphendvukeli kuye

lowo lowabashaya,

futsi abakamfunisisi Simakadze longuSomandla.

₁₄Ngako Simakadze uyawujuba ka-Israyeli

inhloko nemsila kokubili,

ligala lelisundvu nemhlanga kokubili,

ngalanga linye.

₁₅Labadzala nemadvodza langimisumphe

ngubona bayinhloko.

Baphrofethi labafundzisa emanga

bona bangumsila.

₁₆Labo labahola lesive bayasedukisa,

nalabo labaholwako bayalahlekiswa.

₁₇Ngako-ke Simakadze ngeke ajabule ngemajaha abo,

futsi ngeke abadzabukele labo labangenaboyise

kanye nebafelokati,

ngobe bonkhe abanaNkulunkulu, futsi babi,

bonkhe bakhuluma emanyala.

Noko ngako konkhe loku,

lulaka lwakhe alukagucuki,

sandla sakhe sisephakeme.

₁₈Ngempela bubi buvutsa njengemlilo;

budla bucotfule tinchachabutane nemanyeva,

bulumeka emahlatsi etihlahla ngemalangabi,

kutsi titewushunca tibheke etulu

ngaletikhulu tikhatsa tentfutfu.

₁₉Ngelulaka lwaSimakadze longuSomandla

live liyawugagadzeka,

nebantfu bayawuba tinkhuni temlilo;

kute loyawuphephisa umnakabo.

₂₀Ngesekudla bayawushwabudzela,

kodvwa bachubeke balambe;

ngesancele bayawudla, kodvwa bangeke besutse.

Ngulowo nalowo uyakutondla

ngenyama yentalelwane yakakhe;

₂₁bakaManase bayawutondla ngebaka-Efrayimu,

nebaka-Efrayimu batondle ngebakaManase,

bonkhe bayawugucukela bakaJuda.

Noko ngako konkhe loku,

lulaka lwakhe alukagucuki,

sandla sakhe sisephakeme.