Jeremiya 16

₁Livi laSimakadze lase liyefika kimi, latsi: ₂“Awuyikutitsatsela umfati, futsi awuyikuwatala emadvodzana nemadvodzakati kulendzawo.” ₃Ngobe naku lokushiwo nguSimakadze ngemadvodzana nangemadvodzakati latalelwa kulelive, nangebafati lababonina nangemadvodza laboyise, utsi: ₄“Bayawukufa babulawe sifo lesibulalanako. Abayiwulilelwa, futsi bangeke bangcwatjwe, kodvwa bayawuba njengemfucuta nje lelahlwe phansi. Bayawubhubha ngenkemba nangendlala, netidvumbu tabo tiyawuba kudla kwetinyoni tasemoyeni kanye nekwetilwane tesiganga.”

₅Ngobe naku lokushiwo nguSimakadze, utsi: “Ungangeni endlini lapho kunekudla kwemngcwabo, ungayi khona kuyawukhala, nome ukhombise kuvelana nabo, ngobe sengisisusile sibusiso sami, nelutsandvo lwami kanye neluvelo lwami kulabantfu,” kusho Simakadze. ₆“Labaphakeme nalabaphansi bayawufela kulelive. Bangeke bangcwatjwe, futsi abayiwukhalelwa, futsi kute labayawubazilela nalabayawuhhula ngenca yabo. ₇Kute naloyawuphekela labo labafukeme kuze batewudvudvuteka, ngisho nalonguyise nome longunina, kute naloyawubanika sinatfo sekubadvudvuta.

₈“Ungangeni nasendlini lapho kunelidzili khona, uhlale phansi nabo, udle nabo, unatse nabo. ₉Ngobe naku lokushiwo nguSimakadze longuSomandla, Nkulunkulu wema-Israyeli, utsi: ‘Ngiyakwehlisela siphetfo, embikwemehlo enu nasemihleni yenu, siphetfo semisindvo yekujabula neyentfokoto, liphimbo lamakoti nelemyeni kulendzawo.’

₁₀“Nawubatjela tonkhe letintfo labantfu bese bayakubuta batsi: ‘Simakadze uwukhipheleni lomtsetfo lomelana natsi kangaka wesehlakalo lesikhulu kangaka? Soneni? Sono sini lesisentile kuSimakadze Nkulunkulu wetfu?’ ₁₁Ubobe sewuyabatjela utsi: ‘Kungobe boyihlo bangilahla balandzela labanye bonkulunkulu, babasebentela, babakhonta. Bangifulatsela mine, bangete bawugcina umtsetfo wami, kusho Simakadze. ₁₂Kodvwa nine senitiphetse kabi kakhulu kwendlula boyihlo. Bukani nje kutsi ngulowo nalowo wenu uyilandzela kanjani inkhani yenhlitiyo yakhe lembi, esikhundleni sekutsi ahloniphe mine. ₁₃Ngako-ke ngitanikhipha kulelive, nginiyise eveni leningazange senilati, nine kanye naboyihlo; lapho-ke niyawufike nikhonte labanye bonkulunkulu busuku nemini, ngobe angisayikuniphatsa ngesihe.’ ”

₁₄Simakadze utsi: “Noko, ayeta emalanga, lapho bantfu bangaseyikutsi: ‘Ngifunga kuphila kwaSimakadze, lowakhipha ema-Israyeli eveni laseGibhithe,’ ₁₅kodvwa bayakutsi: ‘Ngifunga kuphila kwaSimakadze, lowakhipha ema-Israyeli eveni lasenyakatfo, nakuwo onkhe emave lapho abebacoshele khona.’ Ngobe ngiyakubabuyisela kulelo live lengalinika boyisemkhulu.”

₁₆“Kodvwa nyalo sengitawutfumela badwebi babe banyenti, futsi batababamba baka-Israyeli. Emvakwaloko ngitawutfumela batingeli babe banyenti, batawubatingela yonkhe indzawo, ngisho nasetintsabeni, nasemagcumeni, nasemifantfwini yemadvwala,” kusho Simakadze. ₁₇“Emehlo ami asetikwato tonkhe tindlela tabo, atikafihlakali kimi, nesono sabo asikasitsakali emehlweni ami. ₁₈Ngitabaphindzisela ngalokuphindziwe ngenca yetono tabo nangebubi babo, ngobe balingcolisile live lami ngetinhlobonhlobo tetitfombe tabo letingenamphefumulo, bagcwalisa lifa lami ngetithico tabo letinengekako.”