Jeremiya 34

₁Kwatsi ngesikhatsi Nebukhadnezari, inkhosi yaseBhabhulona, nawo onkhe emabutfo akhe, nayo yonkhe imibuso yakhe, netive tonkhe letatingaphansi kwakhe tisalwa neJerusalema nawo onkhe emadolobha layitungeletile, kwefika livi kuJeremiya liphuma kuSimakadze, latsi: ₂“Naku lokushiwo nguSimakadze, Nkulunkulu wema-Israyeli, utsi: Hamba uye kuSedekiya, inkhosi yakaJuda, ufike umtjele utsi: ‘Naku lokushiwo nguSimakadze, utsi: Lelidolobha sengitalinikela enkhosini yaseBhabhulona, futsi italibhubhisa ngemlilo. ₃Ngeke uphunyule esandleni sakhe nase akubambile, kodvwa nakanjani utawutfunjwa unikelwe esandleni sakhe. Inkhosi yaseBhabhulona utayibona ngemehlo akho, futsi itawukhuluma nawe buso nebuso. Wena utakuya eBhabhulona.

₄“ ‘Noko vani setsembiso saSimakadze, wena Sedekiya, nkhosi yakaJuda. Naku lokushiwo nguSimakadze macondzana nawe, utsi: Ungeke ubulawe ngenkemba, ₅uyakufa ngekuthula. Njengobe bantfu benta umngcwabo wemlilo, bahlonipha boyihlo, emakhosi akucala lakwendvulela, kanjalo nawe bayawukwentela umlilo bakuhloniphe balile, batsi: “Maye! Awu, nkhosi!” Mine matfupha ngenta nasi setsembiso, kusho Simakadze.’ ”

₆Ngako Jeremiya, umphrofethi, konkhe loku wakutjela Sedekiya, inkhosi yakaJuda, eJerusalema, ₇ngesikhatsi emabutfo enkhosi yaseBhabhulona alwa neJerusalema kanye nalamanye emadolobha akaJuda labesabambelele angakehlulwa, iLakhishi ne-Azekha. Lawa bekungiwo odvwana emadolobha labebiyelwe labesele kaJuda.

₈Livi laSimakadze lefika kuJeremiya emvakwekutsi inkhosi Sedekiya seyente sivumelwane nabo bonkhe bantfu baseJerusalema kutewumemetela inkhululeko yetigcili. ₉Bonkhe bantfu kwakufanele bakhulule tigcili tabo letingemaHebheru, bonkhe labadvuna nalabasikati; bekufanele kubete namunye losagcilate umnakabo longumJuda. ₁₀Ngako tonkhe tindvuna nebantfu labangena kulesivumelwane bavumelana kutsi batatikhulula tigcili tabo letidvuna naletisikati, bangabe basabagcilata. Bavumelana, base bayatikhulula letigcili. ₁₁Kodvwa emvakwaloko bajikisa tingcondvo tabo, baphindze batibuyisa tigcili tabo lababetikhululile batigcilata futsi.

₁₂Livi laSimakadze lase liyefika kuJeremiya, latsi: ₁₃“Naku lokushiwo nguSimakadze Nkulunkulu wema-Israyeli, utsi: Ngenta sivumelwane nabokhokho benu ngesikhatsi ngibakhipha eGibhithe, eveni lebugcili. Ngatsi: ₁₄‘Njalo nje ngemnyaka wesikhombisa ngulowo nalowo wenu kufanele akhulule sigcili sakhe lesingumHebheru lotitsengise yena. Nasakusebentele iminyaka lesitfupha, kufanele umkhulule.’ Noko boyihlo abazange bangilalele, futsi abanginakanga nekunginaka. ₁₅Khona nyalo nje nike naphendvuka nenta lokuhle emehlweni ami, kwaba ngulowo nalowo wenu wamemetela inkhululeko kubantfu bakubo. Nidzimate nenta ngisho nesivumelwane embikwami nisendlini leneLibito lami. ₁₆Kodvwa manje senijikile nahlambalata Libito lami; ngulowo nalowo wenu sewubuyise letigcili letidvuna naletisikati lebese nitikhululile kutsi tihambe tiye lapho titsandza khona. Seniticindzetele kutsi tiphindze tibe tigcili tenu futsi!

₁₇“Ngako-ke, naku lokushiwo nguSimakadze, utsi: Anikangilaleli; anikayimemeteli inkhululeko yebantfu bakini. Ngako manje sengimemetela ‘inkhululeko’ yenu, kusho Simakadze, ‘inkhululeko’ yekubulawa ngenkemba, nangesifo lesibulalanako kanye nangendlala. Ngiyawunenta nenyanyeke kuyo yonkhe imibuso yemhlaba. ₁₈Lamadvodza lephule sivumelwane sami angete atigcwalisa timiso tesivumelwane lasente embikwami, ngiyakuwaphatsa njengalelinkhonyane lalihlahlela ekhatsi laba tincetu letimbili ase ahamba emkhatsini waletincetu acinisa lesivumelwane. ₁₉Baholi bakaJuda nebaseJerusalema, nebatsenwa, nebaphristi kanye nabo bonkhe bantfu belive labebahamba emkhatsini waletincetu talelinkhonyane, ₂₀ngiyawubanikela etitseni tabo, letifuna timphilo tabo. Tidvumbu tabo tiyawuba kudla kwetinyoni telizulu nekwetilwane tesiganga.

₂₁“Sedekiya, inkhosi yakaJuda, kanye netindvuna takhe ngiyawubanikela etitseni tabo letifunana netimphilo tabo, ebutfweni lenkhosi yaseBhabhulona leseyisukile kini. ₂₂Simakadze utsi: Ngiyawukhipha umlayeto ngibabuyise kulelidolobha. Bayakulwa nalo, balitfumbe bese bayalishisa. Emadolobha akaJuda ngiyakuwenta abe tindzala, kuze kusale kukhala libhungane kuwo.”