Jeremiya 47

“Buka kutsi aqubuka kanjani emanti ngasenyakatfo,

atakuba sikhukhula lesikhulu.

Atawukhukhula lelive kanye nako konkhe lokukulo,

emadolobha kanye nebantfu labahlala kuwo.

Bantfu bayawukhala bumayemaye,

bonkhe labahlala kulelive bayawulila,

₃nabeva umsindvo wetinselo temahhashi akhe,

nebukhehlekhehle betincola takhe temphi,

nemsindvo wemasondvo ato.

Boyise bangeke baphendvuke babasite bantfwababo,

ngobe tandla tabo tiyawulenga.

₄Ngobe lilanga lona selifikile

lekubhubhisa onkhe emaFilisti,

nekubhubhisa nekucedza bonkhe labayinsali

lababengasita iThire neSidoni.

Simakadze sewutawabhubhisa emaFilisti,

imisalela yalabo labaphuma eKhrethe.

₅IGaza iyawuhhula inhloko yayo ilile,

i-Ashkeloni yona iyawuvalwa umlomo, ibhubhe.

Awu, nsali yasetsafeni,

niyawutikhipha umkhuphulwane

kuze kube ngunini?

₆“Nikhala nitsi:

‘Awu, nkemba yaSimakadze,

uyawudzimate uphumule nini?

Buyela emgodleni wakho;

sale uma ubindzise.’

₇Kodvwa ingaphumula kanjani,

nangabe Simakadze akhiphe umyalo kuyo

kutsi ihlasele i-Ashkeloni nelusentse lwelwandle?”