Johane 10

₁“Ngicinisile, ngicinisile, ngitsi kini: Longangeni ngelisango esibayeni setimvu kodvwa asuke afohle, ekhwele kulenye indzawo, ulisela nemphangi. ₂Kepha longena ngelisango ungumelusi wetimvu. ₃Umgadzi welisango uyamvulela lowo, netimvu tiyaliva livi lakhe. Takhe timvu utibita ngemabito ato atiholele ngephandle. ₄Nasaphume nato tonkhe utihola embili, tona timlandzele ngemuva, ngobe tiyalati livi lakhe. ₅Ngeke timlandzele lomunye umuntfu, kodvwa tiyawumbalekela; ngobe atiwati emavi ebafokati.”

₆Jesu wabatjela lomfanekiso, kodvwa bona abazange beve kahle kutsi kuyini loku labekukhuluma kubo.

₇Ngako Jesu waphindza watsi kubo: “Ngicinisile, ngicinisile, ngitsi kini: Mine ngilisango letimvu. ₈Bonkhe labefika kucala kunami bangemasela nebaphangi; kodvwa timvu atizange setibalalele. ₉Mine ngilisango, umuntfu nakangena ngami uyawusindziswa; uyawungena, aphume, akhandze lidlelo. ₁₀Lisela litela kweba, nekubulala, nekubhubhisa. Mine ngitele kwekutsi bantfu babe nekuphila; babe nako kuphuphume.

₁₁“Mine ngingumelusi lolungile. Umelusi lolungile udzela kuphila kwakhe ngenca yetimvu. ₁₂Umuntfu locashiwe, longesiye umelusi wetimvu, naletimvu kungesito takhe, nakabona imphisi ita, ushiya letimvu, abaleke, imphisi itisukele itihlakate. ₁₃Ngobe phela lomuntfu ucashiwe, ngako akatinakekeli letimvu. ₁₄Mine ngingumelusi lolungile, ngiyatati timvu tami, nato futsi tiyangati. ₁₅Njengobe naBabe uyangati, nami ngiyamati, ngidzela kuphila kwami ngenca yetimvu. ₁₆Nginaletinye timvu letingesito noko takulesibaya, nato futsi kufanele ngitiletse, titakuliva livi lami. Titawuba mhlambi munye tonkhe nemelusi munye.

₁₇“Ngaloko-ke Babe uyangitsandza, ngobe ngidzela kuphila kwami khona ngitawubuya ngikutsatse futsi. ₁₈Kute longangemuka kuphila kwami. Ngikubeka phansi mine ngekwami. Nginawo emandla ekukubeka phansi, newekuphindze ngikutsatse futsi. Nguloko lengikutfunywe nguBabe kutsi ngikwente.”

₁₉Kwaphindze kwaba khona kwehlukana futsi emkhatsini wemaJuda ngalamavi akhe. ₂₀Lamanyenti awo atsi: “Unelidimoni! Uyahlanya! Nine nimlalelelani?”

₂₁Kodvwa labanye babo batsi: “Lamavi akusiwo emavi emuntfu lonelidimoni. Lidimoni lingawavula yini emehlo emphumphutse?”

₂₂Kwase kufika sikhatsi sekugubha uMkhosi Wekuhlanjululwa kweliThempeli eJerusalema, bekungusebusika. ₂₃Jesu abehamba eMhubheni waSolomoni ethempelini. ₂₄Ase ayamkaka emaJuda atsi: “Kutawudzimate kube ngunini solomane usibambelela wena, ulibatisa tinhlitiyo tetfu? Nangabe unguKhristu sitjele ngalokuvakalako.”

₂₅Jesu wawaphendvula watsi: “Nganitjela, kodvwa anizange senikholwe. Imisebenti lengiyenta egameni laBabe, ngiyo lengifakazelako. ₂₆Kodvwa nine anikholwa, ngobe vele anisibo betimvu tami. ₂₇Timvu tami tiyaliva livi lami, nami ngiyatati; tiyangilandzela. ₂₈Ngitinika kuphila lokuphakadze, futsi tingeke tisabhubha naphakadze, kute nalongatihlwitsa esandleni sami. ₂₉Babe longinike tona mkhulu kunabo bonkhe; kute longatitsatsa esandleni saBabe. ₃₀Mine naBabe simunye.”

₃₁EmaJuda aphindza atsatsa ematje afuna kumgcoba ngawo. ₃₂Jesu wawaphendvula watsi: “Minyenti imisebenti lengiyente embikwenu lengiyinikwe nguBabe. Ngumuphi-ke lona lenifuna kungigcobela wona ngalamatje?”

₃₃EmaJuda amphendvula atsi: “Kute umsebenti lomuhle lesifuna kukugcobela wona, kuphela nje kutsi wena uyahlambalata; ungatsi kantsi ungumuntfu nje nawe, ube sewutenta Nkulunkulu!”

₃₄Jesu wawaphendvula watsi: “Akukabhalwa yini emtsetfweni wenu kutsi: ‘Ngitsite nibonkulunkulu’? ₃₅Wababita ngekutsi bonkulunkulu labo babenelivi laNkulunkulu, umBhalo ungeke uguculwe. ₃₆Mine ngingulowehlukaniselwe Babe, ngitfunywe nguye emhlabeni. Ningigwebelani ngekuhlambalata ngobe ngitsite: ‘NgiyiNdvodzana yaNkulunkulu’? ₃₇Nangabe angenti yona imisebenti yaBabe ningabongikholwa. ₃₈Kodvwa nangabe ngenta yona, nome ngabe anikholwa kimi, kholwani ngulemisebenti lengiyentako, kuze nitekwati, nihlale nati kutsi Babe uhlala kimi, nami ngihlala kuye.”

₃₉Aphindza futsi afuna kumbamba, kodvwa waphunyula etandleni tawo.

₄₀Jesu waphindze wancandzeka futsi, wahamba wewelela ngesheya kweJordane, lapho acala khona Johane kubhabhatisa, wefike wahlala khona. ₄₁Bantfu labanyenti beta kuye batsi: “Ngempela Johane akazange asente nasinye sibonakaliso, kepha konkhe Johane lakusho ngalomuntfu kuliciniso.”

₄₂Bantfu labanyenti lababekhona bakholwa kuye.