Jobe 14

₁“Umuntfu lotelwe ngumfati

unemalangana nje lambalwa ekuphila,

nawo agcwele lusizi.

₂Ubhahela njengembali, bese uyabuna,

akakhonsi, usheshe anyamalale njengesitfunti.

₃Ungawabeka yini emehlo akho entfweni lenjengami?

Kona ungangiletsa yini embikwakho utengehlulela?

₄Ngubani longakhipha lokuhlantekile

kulokungakahlanteki? Kute!

₅Emalanga ekuphila kwemuntfu asancunywa,

nelinani letinyanga tekuphila kwakhe walimisa;

kwajutjwa ngisho nemikhawulo yakhe langeke ayengce.

₆Ngako ungamnaki, mshiye yedvwana,

abale ema-awa onkhe emalanga

njengesisebenti lesicashiwe.

₇“Nangabe sihlahla sesijutjiwe,

likhona litsemba lekutsi singahle

siphindze sihlume futsi,

kantsi nalawo mahlumela aso angeke abune.

₈Timphandze taso tingaguga emhlabatsini

nesiphunti saso sife lapha phansi,

₉noko ngekuva umswakama wemanti siyahluma,

kumile emahlumela njengesihlahla.

₁₀Kodvwa umuntfu uyafa angcwatjwe,

kube kuphela kwakhe,

kutsi kungaphuma umphefumulo

kube kuphela kwakhe.

₁₁Njengobe emanti anyamalala elwandle,

nanjengobe nesihlambo semfula siyahamuka some,

₁₂umuntfu ulala kanjalo-ke angabe asavuka,

kuyawuze kwendlule emazulu;

yebo, umuntfu angeke aphaphame,

futsi ngeke avuke ekufeni kwakhe.

₁₃“Ngifisa shangatsi ungangifihla ethuneni,

ungibhacise khona

kuze kwendlule intfukutselo yakho!

Nawungamane nje ungincumele sikhatsi, ungikhumbule!

₁₄Nangabe umuntfu afa, uyawuphindze aphile yini?

Kuwo onkhe emalanga ekusebenta kwami kamatima

ngiyakuma kuze kufike kuvuseleleka kwami.

₁₅Uyawungibita, mine ngikuphendvule.

Uyawufisa kubona leso sidalwa

lesentiwa tandla takho.

₁₆Uyawutibala tonkhe tinyatselo tami lengititsatsako,

kodvwa awuyikungibamba umbalo ngenca yetono tami.

₁₇Tiphambuko tami uyawutivalela esikhwameni;

sono sami uyawusisibekela.

₁₈“Kodvwa njengentsaba lekhukhulekako ibhidlike,

nanjengelidvwala lelisuswa endzaweni yalo,

₁₉nanjengobe emanti agugisa litje,

nesihhuhhula semvula sikhukhula umhlaba,

kanjalo nelitsemba lemuntfu wena ulibulala, life nya.

₂₀Umuntfu umehlula kube kanye, esweleke,

ugucula buso bakhe, bese uyamcosha.

₂₁Nangabe emadvodzana akhe advunyiswa,

loko yena akakwati;

nangabe ahlaziswa,

loko yena akakuboni.

₂₂Uva buhlungu bemtimba wakhe,

atikhalele yena yedvwa.”