Jobe 34

₂“Vanini emavi ami,

nine labahlakaniphile;

lalelani mine, nine bantfu labafundze bagogodzela.

₃Ngobe indlebe iyawavivinya emagama,

njengobe nelulwimi lunambitsa kudla.

₄Asitibonele nje kwatsine kutsi ngukuphi lokulungile,

asifundze kanyekanye sonkhe kutsi yini lenhle.

₅“Jobe utsi: ‘Ngimsulwa,

kodvwa Nkulunkulu ungima kulunga.

₆Naloku ngilunge kangaka,

ngitsatfwa njengalonemanga,

naloku ngingenacala

umcibisholo wakhe uhlaba linceba lelingelapheki.’

₇Jobe kantsi ngumuntfu lonjani,

longenayo ngisho inseketse yenhlonipho kuNkulunkulu.

₈Uhlanganyela nalabenta lokubi,

umdzibimunye nalababi,

₉ngobe utsi:

‘Umuntfu akumsiti ngalutfo

kwetama kujabulisa Nkulunkulu.’

₁₀“Ngako lalelani lapha kimi,

nine bantfu labanekucondza.

Akube khashane naNkulunkulu kuba ngumenti walokubi,

kwenta bubi akube khashane naSomandla.

₁₁Umuntfu umkhokhela njengaloku entile,

ambuyisele njengalokufanele kutiphatsa kwakhe.

₁₂Kumatima kucabanga kutsi Nkulunkulu

angahle ente lokubi,

nekutsi Somandla angaphambukisa umtsetfo.

₁₃Ngubani lowambeka lapha emhlabeni kutsi awubuse?

Ngubani lowamenta waba ngumphatsi

wemhlaba wonkhe?

₁₄Kube bekuyinhloso

yakhe kususa umoya wakhe nemphefumulo wakhe,

₁₅bonkhe bantfu bebangafisa kwetimphungane

bafe batsi ngco,

bonkhe babuyele elutfulini.

₁₆“Nangabe unako kucondza, lalela lapha,

lalela loko lengitakusho.

₁₇Umuntfu lotondza umtsetfo angabusa yini?

Ungamlahla yini longuSokulunga nalonguSomandla?

₁₈Akusiye yini lolawula emakhosi atsi:

‘Aninamsebenti walutfo,’

nakulabahlonishwako atsi: ‘Nibabi,’

₁₉longakhetsi ngisho nakuto tikhulu,

ngisho nakulabanjingile nalabamphofu,

ngobe phela bonkhe bangumsebenti wetandla takhe?

₂₀Bafa ngekushesha lokukhulu,

ekhatsi nebusuku,

bantfu bayatfutfumela bafe,

labanemandla besuka bangakatsintfwa ngumuntfu

ngisho nangesandla sakhe.

₂₁“Emehlo akhe abuka kuhamba kwemuntfu njalo,

ubona tonkhe tinyatselo takhe.

₂₂Kute bumnyama lobumnyama kuye,

kute nelitfunti lelimnyama,

lapho benti balokubi bangabhaca khona.

₂₃Nkulunkulu akadzingi kube solomane

aphilikishana nebantfu abavivinya,

kutsi bete kuye batekwehlulelwa.

₂₄Ngaphandle nje kwemibuto

uvele esuse labanemandla,

abeke labanye etikhundleni tabo.

₂₅Ngobe uyakunaka lokwenta kwabo,

ubaketula ngebusuku bunye nje kube bayaphela njalo.

₂₆Uyabajezisa ngetento tabo letimbi,

akwente ebaleni kubona wonkhe umuntfu,

₂₇ngobe bagucuka ekulandzeleni yena,

abanandzaba nanayinye nje yetindlela takhe.

₂₈Babangela kutsi lokukhala kwalabamphofu

kufike etindlebeni takhe,

wadzimate wakuva kukhala kwalabeswele.

₂₉Kodvwa kube uthulile,

ngubani labengamsola?

Nakangafihla buso bakhe,

ngubani longambona?

Noko ubusa etikwemuntfu netive ngalokufananako,

₃₀kuze avimbe longenaNkulunkulu angabusi,

angabekeli bantfu tingibe.

₃₁“Ake ngitsi nje umuntfu utsi kuNkulunkulu:

‘Nginelicala, kodvwa ngingeke ngiphindze ngone.

₃₂Ngifundzise loko lengingeke ngikubone,

nangabe ngonile, ngingeke ngisaphindza ngone.’

₃₃Nkulunkulu angakuvuza yini

njengekutsandza kwakho,

nawala kuphendvuka?

Nguwe lokufanele ukhiphe sincumo, akusimi,

ngako-ke, ngitjele loko lokwatiko.

₃₄“Emadvodza lanekuhlakanipha ayasho,

nemadvodza lanekucondza langivako, atangitjela:

₃₅‘Jobe ukhulunyiswa kungabi nalwati,

emavi akhe eswela kucondza.’

₃₆Cabangisisani ngaloku lokukhulunywa nguJobe,

ngobe uphendvula njengemuntfu lomubi longenangcondvo,

₃₇wengeta buvukelambuso kulesono sakhe,

ushaya tandla tendzelelo lapha emkhatsini wetfu,

alibale kutsakuta, abaliselana naNkulunkulu.”