Jobe 41

₁“Ungamdvonsa yini Leviyathani ngelidweba?

Ungalubopha yini lulwimi lwakhe ngentsambo?

₂Ungamfaka yini siwondvo ekhaleni lakhe,

nome-ke ungawubhobosa yini umhlatsi wakhe ngelidweba?

₃Angatincengela yini kutsi umentele umusa,

nome akuncenge ngekukhuluma kamnandzi?

₄Sivumelwane angasenta yini nawe

kutsi umtsatse abe sigcili sakho kokuphela?

₅Ungamenta yini kutsi abe silwane

lesingumnganakho njengenyoni,

nome uhambe umbophe ngentsambo,

khona atekujabulisa emantfombatana akho?

₆Labatsenga batsengise

bangantjintjiselana yini ngaye?

Bona bahwebi bangehlukaniselana yini ngaye?

₇Sikhumba sakhe ungasigcwalisa yini ngabondzangumadweba

nome-ke inhloko yakhe ngemadweba?

₈Nawungake ubeke sandla sakho etikwakhe,

ungeke uwukhohlwe umzabalazo wakhe,

futsi ungeke ukuphindze ukwente loko.

₉“Usuke utiyenga nawungatsi

ungenta nome yini ngaye,

kumbuka nje kukucedza emandla.

₁₀Kute lonesibindzi sekumchukuluta.

Pho, ngubani longakhona kumelana nami?

₁₁Ngubani-ke lenginelicala kuye

lokungafanela kutsi ngilikhokhele?

Konkhe lokungaphansi kwemazulu kwami.

₁₂“Ase ngikutekele ngemilente yakhe,

emandla akhe kanye nesimo sakhe lesihle.

₁₃Ngubani nje longamkhumula libhantji lakhe langaphandle?

Ngubani nje longamfaka ematomu?

₁₄Ngubani longaqunga avule umlomo wakhe,

wona lowo logcwele ematinyo akhe lesabekako?

₁₅Umhlane wakhe unemigca yemahawu

lahlanganiswe ndzawonye,

₁₆asondzelene lelinye kulelinye,

kuze kungangeni kwasamoya emkhatsini wawo.

₁₇Ahlanganiswa lelinye kulelinye,

anamatselane,

futsi angeke ehlukaniseke.

₁₈Kutsimula kwakhe kusakata imibane yekukhanya,

kantsi emehlo akhe afanana nemisebe yentsatsakusa.

₁₉Ukhafula imililo ngemlomo wakhe,

kusakateke tinhlase temlilo.

₂₀Emakhaleni akhe kutfucuka intfutfu,

kube shangatsi simoko

lesiphuma ebhodweni lelibilako

nalisemlilweni wetinhlanga.

₂₁Kuphefumula kwakhe

kuvutsela emalahle emlilo abe bovu,

kulavuke emalangabi emlonyeni wakhe.

₂₂Emandla ahlala entsanyeni yakhe,

tesabiso timhambela embili.

₂₃Imitsebe yakhe ihlangene

icinile, futsi ayehlukaniseki.

₂₄Sifuba sakhe silukhuni njengelidvwala,

silukhuni njengelitje lekusila.

₂₅Nakaphakama, labanemandla bayatfutfumela,

bahlehla nyova yena asengakagadli.

₂₆Inkemba legwaza yena ayenti lutfo kuye,

kanjalo nesikhali, nemcibisholo kanye nemkhonto.

₂₇Kuye insimbi ifanana nelutsi lwetjani,

litfusi linjengelukhuni lolubolile.

₂₈Imicibisholo ayimenti abaleke,

ematje esidubulelo afanana nemakhoba kuye.

₂₉Umshiza kuye ufanana nelutsi loluncane;

kukhehleta kwelutsi lwesikhali kuyamhlekisa.

₃₀Lingaphansi lakhe limagebhugebhu njengetindzengelo,

kusale umvila lomkhulu eludzakeni

lonjengewesihliphi sekubhula emabele.

₃₁Wenta kujula kucubuke

njengekubila kwelibhodo,

anyakatise lwandle

lube nemagwebu njengelibhodo lemafutsa.

₃₂Lapho ahambe khona kusala kunemagwebu,

ungaze ucabange kutsi kujula

kunetinwele letimhlophe.

₃₃Kute lokulingana naye emhlabeni,

usidalwa lesingesabi lutfo.

₃₄Utibukela phansi tonkhe tilwane letitiphakamisako,

uyinkhosi yato tonkhe tilwane letinkhulu

letitigabatisa ngemandla ato.”