Jobe 5

₁“Memeta nawutsandzako,

sibone kutsi ngubani lotakuphendvula!

Ngubani nje emkhatsini wabo bonkhe labangcwele

longajikela ngakuye?

₂Silima siyafa sibulawe tinhlungu tekutfukutsela kwaso,

nemona uyababulala labanengcondvo yebuntfwana.

₃Mine ngitibonele ngekwami,

silima lesibukeka shangatsi sivikelekile,

kodvwa sicalekiso sehlela etikwemuti waso masinyane nje.

₄Bantfwabaso bakhashane kabi nekuphepha,

kute namunye lobemelelako emacaleni asetinkhundleni.

₅Sivuno saso sidliwa ngulabalambile,

basikhosholote ngisho lesisekhatsi kulamnyama emacobhe.

Labomile bahahela umcebo waso

kutsi bawufuhlute bawucedze.

₆Bulukhuni abumane bumile phansi nje,

yebo, nenhlupheko ayivumbukisi kwemakhowe nje.

₇Kodvwa umuntfu utalelwe kuhlupheka,

njengaloku netinhlase tisuka tiye etulu.

₈“Kodvwa kube bekungimi,

ngabe ngiyatincengela kuNkulunkulu,

ngabe ngibeka yonkhe indzaba yami embikwakhe.

₉Yena wenta timangaliso letingeke tichazwe ngumuntfu,

ente nemigilingwane lengeke ibalwe ngumuntfu.

₁₀Unisa imvula etikwemhlaba,

ehlisele emanti etikwematsafa.

₁₁Uphakamisa labaphansi abayise etulu,

labalilako baphakanyiselwe endzaweni lephephile.

₁₂Ucitsa emacebo emacili,

kuze labakwenta ngetandla tabo kungaphumeleli.

₁₃Ubamba labahlakaniphile kuwo onkhe emacebo abo,

nemachinga alabangemacili uwaphambanisa onkhe.

₁₄Behlelwa bumnyama lobukhasa phansi emini,

litsi libalele lise nga,

bona bahambe baphumphutsa njengasebusuku.

₁₅Usindzisa labeswele emlonyeni wekufa,

abasindzise nasetidladleni talabo labanemandla sebababambile.

₁₆Ngako labamphofu ubanika litsemba,

bese kutsi kungetsembeki kuvalwe umlomo.

₁₇“Maye, ubusisiwe umuntfu locondziswa nguNkulunkulu!

Ngako ungakwedzeleli kuyalwa nguSomandla.

₁₈Ngobe yena nome angamilisa tilondza,

uphindze atipholise,

uyalimata aphindze aphilise ngetandla takhe.

₁₉Nome ungehlelwa tehlakalo letisitfupha,

uyakukusindzisa kuto tonkhe;

nome nguletisikhombisa kute lokuyakukulimata.

₂₀Ngesikhatsi sendlala uyakukusindzisa ekufeni,

nasemphini akusindzise enkembeni.

₂₁Uyawuvikeleka ekushayweni ngemagama,

ungesabi nome kufika imbhubhiso.

₂₂Uyawuyihleka lusulu indlala nembhubhiso,

nayifika ngakuwe;

awuyikwesatjiswa tilwane temhlaba.

₂₃Ngobe uyakuba nesivumelwane nematje asematsafeni,

netilwane tesiganga tiyawuhlalisana nawe ngekuthula.

₂₄Uyawukwati kutsi likhaya lakho livikelekile,

uyawubala kahle tonkhe timphahla takho

utikhandze tiphelele.

₂₅Uyawukwati kutsi bantfwabakho bayawuba banyenti,

nebatukulu bakho bayawuba ngangetjani besiganga.

₂₆Uyawuya ethuneni ugcwele emandla,

wenelisekile ngebudzala

njengetitfungo letibutfwa ngesikhatsi sato lesifanele.

₂₇“Sikuphenyisisile-ke loku,

sakukhandza kuliciniso lodvwa.

Ngako-ke kuve kahle utibute ukusebentisa kuwe.”