Levithikusi 11

₁Simakadze wakhuluma kuboMosi na-Aroni, watsi: ₂“Tjelani ema-Israyeli nitsi: ‘Kuto tonkhe tilwane letiphilako emhlabeni ningadla nati: ₃Tonkhe tilwane letinetinselo letehlukene naletihlabulako. ₄Kodvwa leti letihlabulako kuphela naletehlukanisa tinselo kuphela ningabotitsintsa. Likamela liyahlabula, kantsi alehlukanisi tinselo; lona-ke lingcolile kini. ₅Imbila iyahlabula, kodvwa ayehlukanisi tinselo; nayo ingcolile kini. ₆Umgwaja uyahlabula, kodvwa awehlukanisi tinselo; ungcolile kini. ₇Ningayidli ingulube. Ingcolile, ngobe nome tinselo tayo tehlukene, kodvwa ayihlabuli. ₈Letilwane ningatidli, futsi ningatsintsi ngisho netidvumbu tato, ngobe tingcolile kini.

₉“ ‘Ningatidla tonkhe tilwane letihlala elwandle nasemifuleni letinetimphiko tekuntjweza netincwencwe. ₁₀Kodvwa tonkhe tilwane letihlala elwandle nasemifuleni letite timphiko tekuntjweza netincwencwe kufanele tingadliwa; yebo, tonkhe leto tilwane tisinengiso kini. ₁₁Leto tilwane tonkhe nititsatse ngekutsi tisinengiso kini. Ningacali nitidle, ngisho netidvumbu tato tisinengiso kini. ₁₂Ningacali nidle nome ngangusiphi silwane lesihlala emantini lesite timphiko tekuntjweza netincwencwe, ngobe sisinengiso kini.

₁₃“ ‘Nati-ke tinyoni lekungakafaneli kutsi nitidle, ngobe tisinengiso: lusweti, nelingce, nengculungculu, ₁₄nanhloyile, nalohheya ngetinhlobo takhe; ₁₅nemahhwabayi, ngetinhlobo tawo, ₁₆nenshi, nenkovazana, nenkanku, naloklebe ngetinhlobo takhe; ₁₇nemswelele, nesahhukulu, nemphishamanti, nesikhova, ₁₈nemfuketi, nelivuba, nelilanda, ₁₉nadvoye, namatalatingwenya ngetinhlobo takhe, natsekwane, nelilulwane.

₂₀“ ‘Tonkhe tilwanyakatana letinetimphiko letihamba ngetinyawo letine kufanele tibe sinengiso kini. ₂₁Tikhona, noko, tilwane letinetimphiko, letihamba ngetinyawo letine leningatidla: nguleto letigcumagcuma emhlabatsini ngemilente lengemancondvo. ₂₂Tintsetse leningatidla nguleti: sikhonyane ngetinhlobo taso, nemaboni ngetinhlobo tawo, nemadziya ngetinhlobo tawo, nemahhwele ngetinhlobo tawo. ₂₃Tonkhe letilwanyakatana letinetimphiko naletinabutela phansi ngetinyawo letine tingcolile ngekwemtsetfo.

₂₄“ ‘Nati-ke tilwane letingcolile nome letiyawuningcolisa; wonkhe lotsintsa tidvumbu tato uyawuba ngulongcolile kuze kuhlwe. ₂₅Lowo lowetfwala tidvumbu tato uyawuhlanta tingubo takhe abe ngulongcolile kuze kuhlwe. ₂₆Tonkhe tilwane letehlukanisa tinselo tingayidzabuli kabili kantsi atihlabuli kufanele titsatfwe ngekutsi tingcolile; lowo lotsintsa tidvumbu tato uyawuba ngulongcolile. ₂₇Tonkhe tilwane letihamba ngetidladla letine tingcolile kini; lowo lotsintsa tidvumbu tato uyawungcola kuze kuhlwe. ₂₈Lowo lowetfwala tidvumbu tato kufanele ahlambulule timphahla takhe, ngobe tingcolile; utawuhlala angcolile kuze kuhlwe. Tingcolile kini.

₂₉“ ‘Nati-ke tilwane letingcolile kini letihamba emhlabeni: nguchakidze, neligundvwane, netibankhwa ngetinhlobo tato, ₃₀nentfulo, naholoholo, nachamu, nelunwabu. ₃₁Leto-ke tingcolile kini, tonkhe tilwane letihamba ngesisu. Wonkhe lotsintsa tidvumbu tato uyawuba ngulongcolile kuze kuhlwe. ₃₂Yonkhe intfo lekuwele kuyo nome ngusinye saletilwane nasifile, leyontfo iyawuba ngulengcolile: nome ngabe leyontfo yentiwe ngelukhuni nome ngendvwangu yemasaka, konkhe lokusetjentiselwa nome yini, kufanele kwenyiwe emantini; kuyawuba ngulokungcolile kuze kuhlwe, emvakwaloko-ke bese kuyahlanteka. ₃₃Nangabe lesinye saletilwane siwela esitjeni selibumba, leso sitja kufanele siphihlitwe; konkhe lokukuso kuyawuba ngulokungcolile. ₃₄Konkhe kudla lebekungekhatsi kwaso lebekufanele kudliwe, nako kutawube sekuba ngulokungcolile, kanjalo konkhe lokunatfwako bekungekhatsi nako sekuyawuba ngulokungcolile. ₃₅Nangabe sidvumbu saso nome ngusiphi siwela nome etikwani, leyontfo itawuba ngulengcolile ngekwemtsetfo: kungaba litiko nome yimbita yekupheka, kufanele kubhidlitwe, ngobe kungcolile ngekwemtsetfo kini, futsi kutawuhlala kungcolile kini, ₃₆noko umtfombo nome sicobho nome umfula wemanti uyawuhlala uhlantekile. Kodvwa wonkhe lotsintsa lesidvumbu salesilwane uyawuba ngulongcolile. ₃₇Nangabe sidvumbu saso siwela etikwenhlanyelo, leyo nhlanyelo iyawuhlala seloku ihlantekile. ₃₈Kodvwa nangabe lenhlanyelo imanti bese-ke sidvumbu sesiwela etikwayo, itawuba ngulengcolile kini.

₃₉“ ‘Nangabe silwane lenivunyelwe kusidla sesifile, lowo lotsintsa sidvumbu saso uyawuba ngulongcolile kuze kuhlwe. ₄₀Lowo lodla ingcuba yaso kufanele ageze timphahla takhe, utawuba ngulongcolile kuze kuhlwe, nalowo lotsintsa leso sidvumbu uyawuba ngulongcolile kuze kuhlwe.

₄₁“ ‘Sonkhe silwane lesihamba ngesisu emhlabeni sisinengiso; akukafaneli sidliwe. ₄₂Kufanele ningasidli silwane lesihamba ngesisu nome lesihamba ngemilente lemine nome leminyenti, leso silwane sisinengiso kini. ₄₃Ningacali nitingcolise ngaletilwane letihamba ngesisu; nicaphele ningatingcolisi ngato, ningangcoliswa nangito. ₄₄Mine nginguSimakadze longuNkulunkulu wenu; tehlukaniseleni mine, nibe ngcwele, ngobe nami matfupha ngingcwele. Ningatingcolisi nganome ngusiphi silwane lesihamba ngesisu. ₄₅Yebo, nginguSimakadze lowanikhipha eGibhithe kutsi ngitewuba nguNkulunkulu wenu; ngako-ke banini ngcwele njengobe nami ngingcwele.

₄₆“ ‘Lena-ke ngimiyalo nemitsetfo macondzana netilwane, netinyoni, nako konkhe lokuphilako lokuhlala emantini, nato tonkhe tilwane letihamba ngesisu.

₄₇“ ‘Ngiyo letawunenta nikwati kwehlukanisa tilwane letingcolile naletihlantekile, nehlukanise nasemkhatsini wetilwane letiphilako lekufanele tidliwe netilwane letiphilako lekungakafaneli tidliwe.’ ”